Aspalditik dabil mobilizazioetan aipatu plataforma eta azken manifestazioa martxoaren 26an egin zuten Iruñean, 0-3 zikloaren duintasuna aldarrikatzeko. Funtsean, hiru aldarrikapen nagusi dituzte: ratioen beherapena edo irakasle gehiago kontratatzea, lan baldintzen hobekuntza, eta 2 urteko haurrak biltzeko gelarik ez sortzea.

Azken puntu honen inguruan eztabaida dago Nafarroako Gobernua eta plataformaren artean, Carlos Gimeno Nafarroako Gobernuko Hezkuntza kontseilariak publikoki adierazi baitu hori egitea ez dagoela gobernuaren asmoetan. Plataformak azpimarratu duenez, ordea, Gimenok 2 urteko gelen sorrerari ateak ireki zizkion Nafarroako Legebiltzarrean otsailaren 27ko osoko bilkuran izandako agerraldian.

Apirilaren 6an Barañainen egindako batzarrean erabaki zuten langileek greba deialdia egitea, ulertzen dutelako hori dela bide bakarra Gimenoren departamendua haiekin serio hitz egitera esertzeko. Plataformak uste du egiten ari diren presioa eragina izaten ari dela gobernuan eta presio horrekin aurrera jarraituko duela adierazi du.

Alderdi guztiak plataformarekin, PSN izan ezik

Parlamentuan ordezkaritza duten alderdi guztiek –PSN salbu– adierazi dute ados daudela plataformaren aldarrikapenekin. Plataforman jakitun dira erraza dela hori oposizioan egonda, baina salatzen dute gero gobernuan egonda alderdiek ez dutela arazoa bideratu. Edonola ere egoera korapilatsuan daudela ikusten dute plataformatik: “Hezkuntza lege berriak 0-3 ikasturtean plaza publikoak sortzeko funtsak dakartza, eta hemen dago gakoa, alderdi batzuek itunpeko eskolak finantzatzeko aukera ikusten dute eta beste batzuek bi urteko geletara begira daude”.

Gimenok ostegun honetan legebiltzarrean adierazi zuenez, 0-3 urteko zikloa doakoa izango da hurrengo ikasturtetik aurrera 20.000 eurotik beherako errenta duten familientzat, eta 6.650 eurotik beherako per capita errenta duten guztiei matrikula tarifak arinduko zaizkie.

Plataformaren ustez, “Nafarroako Foru Erkidegoak ez du kalitatezko eskubide duina bermatzen. 3-6 zikloa doanekoa da, baina 0-3a garestia eta elitista da”. Salatzen dute 0-6 zikloari buruzko dekretu bat onartuko dela, modu opakoan eta 0-3 zikloko adituen parte hartzea gabe egindako zirriborrotik abiatuta: “Araudi horretatik abiatuta, zikloaren zatiketa eta ingelesa eskoletan sartzea sendotzen da, udalak edo Hezkuntza Departamentuak hala erabakitzen badute”.

Nafarroako 4.300 haur ari dira 0-3 zikloan eta mila pertsonatik gora ari dira lanean adin tarte horretan.