Azaroan egingo dira AEBetako hurrengo presidentetzarako hauteskundeak, eta aberatsak ari dira dagoeneko Donald Trumpi terrenoa preparatzen. Elon Musk, Twitter edo egungo X sare sozialaren jabea eta munduko bigarren pertsona aberatsena, ageriko propaganda egiten ari zaio bere baliabideak erabilita. Sare horretako erabiltzaile orok sumatuko zuen, ziur, algoritmoa norantz egiten ari den. Eduki sektarioa hedatzen ari da, hainbat ideia indartzeko, inmigrazioari loturikoak asko, eta Musk bera, kontu pertsonaletik, Alderdi Demokrataren aurka egiten ari da.

Hiru urteren ostean, aipaturiko sare sozialera itzuli da Trump. Urtebete eman du hortik kanpo, galarazita, Kapitolioko gertakariak bultzatzeko bozgorailu gisa erabili zuelako. Gerora egin zen sarearen jabe Musk, eta makina bat bider esan zuen "informazio-askatasun oro" bermatuko zuela. Alegia, Trumpi bozgorailua itzularaziko ziola, eta horrela egin du.

Ez da nolanahi bueltatu, gainera: Euskal Herrian gauerdia zenean bien arteko online solasaldia egin zuten bertan, milioika entzuleren presentzian. Hiru ordu laurden berandu hasi da, arazo teknikoengatik, antza eraso informatikoa jasan dutelako. Eta Muskek, zeharka bada ere, errua egotzi die Trumpen aurkariei. Bi ordu iraun du elkarrizketak.

Harrisi eraso, errukirik gabe

"Harrisi emango bazenioke botoa, buru-osasuna begiratzera joan beharko zenuke", esan du Trumpek milioika pertsonaren aurrean, eta jakina, Kamala Harrisek erantzuteko batere aukerarik ez zuela. Dozenaka gehiago ere izan dira, estilo bertsukoak, nazioarteko hainbat hedabidek jaso dutenez.

Musk, gidoirik gabe zihoala esan bazuen ere, aski argi ikusi da noren alde lerratu den. Esaterako, natural-natural esan dio Trumpi belarrian tiroa jaso zuenean kuraia handia erakutsi zuela, eta "horrelako kuraiadun liderrak" behar dituela munduak.

Oro har, solasaldi osoa Trumpen gustuko edukiz jantzia izan da. Inmigrazioari buruz lasai ederrean mintzatu dira biak, astakeriak eta gehiago esan dituzte, eta Trumpen kanpainako "promesa-plan handia" goraipatu dute: historian inoiz ikusi ez omen den deportazio operaziorik handiena, horixe egingo duela zin egin du Trumpek.

Horrez gain, eta espero bezala, aberatsetan aberatsenak izanik, ekonomiaren deshazkundea ekarriko luketeten demokraten ustezko planak kritikatu dituzte. Petrolio eta gas ustiategien defentsa egiteko baliatu dute bozgorailua.

Ikusita harrabotsa sortu duela elkarrizketak, Harrisi gonbita egin dio sare sozialean Muskek, berarekin "solastatzeko" prest dagoela esanez.

Europako araudia urratzen egon daiteke Musk

Europako komisario Thierry Bretonek bi aldiz deitu dio arreta Muski azken 24 orduetan. Bata, Trumpekin elkarrizketa egin aurretik, eta bestea ondoren. Izan ere, Europako legedia urratzen egon daiteke Musk, baina oraindik ez du zigorrik jaso.

Iaz sartu zen indarrean Europako Zerbitzu Digitalen Legea. Ordutik, ikerketapean dago X sare soziala, besteak beste desinformazioari aurre egiteko neurririk hartzen ez duelako. Gezurrak ugari hedatzen dira plataforman, eta asko eta asko mezu iraingarri, mingarri eta diskriminatzaileak izaten dira. Hori ere leporatzen zaio, eta ikerketapean dago. Bretonek iradoki dio Muski pasa den gauerdiko solasaldiak are gehiago indartuko zituela hainbat mezu diskriminatzaile.