Aldeko 67 boto jaso ditu eta soilik bost abstentzio –Elkarrekin-Podemos eta Vox-enak– EAJ eta PSE-EEk aurkeztutako Arartekorako Manu Lezertua hautagaiak ostegun honetan Eusko Legebiltzarrean. Lehen aldiz ezker abertzalearen babesa ere jaso du Lezertuak; 2015ean EH Bilduk beste hautagai bat aurkeztu zuen, baina oraingoan azken bost urteetan Ararteko izandakoa babestea erabaki du koalizio independentistak.

Hala, Lezertua da bigarrenez karguan izango den lehen Arartekoa, beste bost urtetarako. Elkarrekin-Podemosek azaldu duenez, abstenitu egin dira hautagaitza ez delako "oposizioarekin adostu", EiTBk EFE albiste-agentzia aipatuz dioenez.

Lezertua Bilbon jaio zen 1957an eta legelaria da; Europako Giza Eskubideen Auzitegiko abokatu gisa urte asko darama lanean.