Aldaketaren udalaren lana desmuntatu nahi du Maiak. 1997ko euskararen ordenantza ia osorik berreskuratzen duen proposamena eramanen du ostegunean osoko bilkurara. Xedea, maiatzean onarturiko ordenantza indargabetzea. Besteak beste, Maiak esan du gibelean utzi nahi dituela “gehiegikeriak” eta “mugarik gabeko erabilpena”.

"Euskararen erabileran normaltasunera itzultzeko premia” erabili du Maiak argudio moduan, neurria justifikatzeko. Nolanahi ere, aitortu du aldaketa egin beharko duela "eremu mistoan bete beharreko baldintzen" arabera eta "Nafarroako Kontseiluaren eta justizia auzitegien doktrina" kontuan hartuta.

Navarra Sumako alkateak adierazi duenez, udal aginte taldeak onartutako dokumentuak "ez du elebitasun osoa inposatzen administrazioen arteko harremanetan, baizik eta hartzailearen borondatearen menpe jartzen du hizkuntza baten edo bestearen erabilera".

"Udalari euskaraz hitz egiteko eta hizkuntza berean erantzuteko eskubidea bermatzen du, baina hizkuntza menperatzen dutenei mugatutako lanpostu ugari sortu gabe", gaineratu du.

Gainera, "elebitasuna modu orekatuan arautzen du udal-irudian, informazioaren helmugen arabera bereiziz, eta ez modu indiskriminatuan, indarrean dagoen arauak egiten duen bezala".

Publizitate instituzionalean, euskararen presentzia "guztizkoaren% 25era arte" murriztu nahi dute, eta egungo arauaren "% 100eko derrigorrezko presentzia saihesten da".

Hautazko balorazioa LEPetan

Lan-arloan, "hautazkoa da lanpostuak betetzean euskara baloratzea, indarrean dagoen arauan ez bezala. Horretarako, nahitaezkoa da euskararen ezagutza behar duten lanpostuak daudela aurreikustea, baina ez orokorrean". Zehazki, balorazioa "erkidegoko edozein hizkuntza jakiteari ematen zaiona baino % 25 handiagoa izan ahalko da, betiere lanpostuaren ezaugarrien arabera justifikatzen bada".

Horretarako, plantilla organikoak zehaztuko du zein lanpostutan behar den euskararen ezagutza, eta kasu bakoitzean zehaztuko du zeregin hori betetzeko behar den hizkuntzaren ezagutza-maila.

Erantzun elebiduna

Maria Garcia-Barberena Kultura eta Berdintasun zinegotzi delegatuak zehaztu duenez, ordenantza berriak "herritarrek udaletxera gaztelaniaz zein euskaraz jotzeko eskubidea dutela mantentzen du". Azken kasu horretan, "ni hizkuntzatan erantzungo zaie" eta, are gehiago, udal administraziora ahoz euskaraz jotzea erabakitzen dutenek "hizkuntza horretan" erantzungo zaiela ere jasoko litzateke.

Maiaren Euskararen Ordenantza murriztailea babestuko du PSNk

Maite Esporrinek dio “aurrekoak ez bezala” arau berriak “aukera berdintasuna” bermatzen duela.

“Euskara balora daiteke zenbait lanpostutan, batez ere pubikoarekin harreman zuzena dutenetan, baina ez guztietan, bestela aukera berdintasuna urratzen baita”. Hala mintzatu zaio PSNren udal taldeko eledun Maite Esporrin SER irrati kateari. Gauzak horrela, osteguneko osoko bilkuran aurrera eginen du Maia alkatearen euskararen ordenantza murriztaileak, Navarra Sumaren eta PSNren artean gehiengoa baitute.

EH Bilduko eledun Joseba Asiron oso kritiko azaldu da ordenantza aldaketaren aitzinean: “Ez dira gauza ulertzeko Iruñea bi hizkuntza dituen hiria dela, eta gure betebeharra biak babestea dela”. Asironen arabera, “gure hizkuntza bat baztertzen aridira”, eta “eskuineko hirukoaren obsesioei jarraitzen diete, bai mamian baita azalean ere”.

Geroa Baiko zinegotzi Patxi Leuzaren irudikoz, “herritarren hizkuntza eskubideei dagokienez bizitzen ari garen atzerakadaren beste adibide baten aitzinean gaude”. Horretaz gain, eztabaidarik eza nabarmendu du LEuzak: “Abiada biziko aldaketa egin nahi du Navarra Sumak, taldeekin lan egiteko denborarik eta espaziorik eskaini gabe”.