Antton Etxeberri kazetako zuzendariak eman du erabakiaren berri, egunkarian bertan argitaratutako eskutitz baten bidez. Arrazoi nagusi bat markatu du proiektuari amaiera emateko: prentsaren krisia. Diru arazoa “anitzak” eta “gupidagabeak” direla esan, eta hainbat faktore azpimarratu ditu: lehenik eta behin, internet eta sare sozialen garapenak zaildu egin du egitasmoak aurrera jarraitzea; bigarrenik, ezin dituzte “hilabeteetan metatuko zorrak” kitatu; eta hirugarrenik, hedabide txikientzako diru laguntzen murrizketak kalte egin die.

Hala, Etxeberrik “egundoko egitasmoa” bezala izendatzen duena bertan behera geratuko da.

Irakurle gehiago bai, erosle gehiago ez

Egungo prentsaren erronka nagusienetako bat izan du Le Journal du Pays Basquek aurpegiz aurpegi: inoiz baino pertsona gehiagok irakurtzen du, baina erosle kopurua ez da handitu. “Irakurle hitzak ez du zertan esan nahi erosle izatea”, zehaztu du Etxeberrik. Ondorioz, orain arteko publizitate eta erosle kopurua ez dira "aski” egitasmoa sostengatzeko.

Hedabideko zuzendaria penatuta azaldu bada ere, argitaratzeari uztea “bide bakarra” dela uste du.

Denei ahotsa eman nahian

“Gure herriarren errealitateari buruz ahalik eta zuzenen informatzen saiatu gara, denei ahotsa ematen”, dio. Horregatik, normalean entzuten ez diren ahotsen “bozgorailu” izan direla iruditzen zaio Etxeberriri; Euskal Herriko “milaka” biztanleen “erreferente”.

Ezkortasuna gaindituz

Ezkortasunetik harago joan nahi izan du zuzendariak: "Jakinarazpen honek ekartzen duen pertsonen damu, frustrazio eta sufrikarioez harago, egitasmoa abentura zoragarria gelditzen da, Euskal Herria eta bere borroka guztiak aitzinaraztea posible egin duena".

Atea irekita utzi die gerora sor daitezkeen proiektuei: "Baliatu dezagun hamabi urtetako ibilbide honetatik harturiko esperientzia, etorkizuneko erronkei erantzuteko".

Informazio gehiago:

Paperean argitaratzen diren hedabideen krisiari buruzko albisteak eta analisia Paperaren krisia kanalean.