Apirilaren 17an Kurdistanen aurkako oldarraldi berri baten berri eman zuen Turkiako Gobernuak. Hulusi Akar Turkiako Defentsa ministroak iragarri zuen Claw-lock (erpe-blokeoa) izendatu duten operazio militarra abiatu berri zutela Bashurreko (Hego Kurdistan, Irakeko iparraldea) zenbait eremutan, “helburu terroristen aurka”. Terroristatzat, hala jotzen baititu Turkiako Estatuak PKK (Kurdistango Langileen Alderdia), eta beren esanetan operazio honekin PKK-ko gerrillarien kontrolpeko eremuei eraso egitea dute helburu.

Zehazki, ustez PKK prestatzen ari zen “eskala handiko erasoa” izan da operazio militarra abiatzeko argudioa, Turkiako Defentsa Ministerioak apirilaren 18an argitaratutako oharrean jasotzen denez. Bertan irakur daitekeenez, “PKK/KCK eta bestelako elementu terroristak neutralizatzeko, Irak iparraldetik gure herriaren eta segurtasun indarren aurkako eraso terroristak ezabatzeko eta gure mugako segurtasuna bermatzeko, Nazio Batuen Gutuneko 51. artikuluan oinarritutako gure autodefentsa eskubidearen arabera, Paw-Lock operazioa abiatu da Irak iparraldeko jo puntu terroristen aurka”. Bideo honekin eman zuen operazioaren berri Turkiako Defentsa Ministerioak:

Bordo Berelilerimiz ve Komandolar?m?z Metina, Zap ve Ava?in-Basyan’da! ?? pic.twitter.com/H6fiMvcExL

— T.C. Millî Savunma Bakanl??? (@tcsavunma) April 17, 2022

Erresistentzia kaltetzeaz gain, Kurdistanen aurkako Turkiaren enegarren operazioak bestelako helbururik ere baduela iradokitzera datoz hainbat irakurketa. KNKren arabera (Kurdistango Kongresu Nazionala), adibidez, abiatutako “kanpaina militarrak” kurdistango herriari eremua jatea luke helburu: Hego Kurdistaneko Zap eskualdeko zenbait eremu okupatzea, hortik Metîna eta Ava?în-Basyan eskualdeak okupatzeari ekiteko. Apirilaren 20an argitaratutako oharrean zehazten zutenez, “mugaz gaindiko kanpaina ilegal honetan Turkiako Indar Armatuak artilleria astuna, konbateko hegazkinak, dronak eta helikopteroak erabiltzen aritu dira, eta paraleloan gauzatzen ari den lurreko ofentsiban, lurreko indarrak eremu horretara eraman ditu helikopteroz”.

Ponent amb Kurdistan Kataluniako plataformak apirilaren 20an sare sozialetan argitaratutakoaren arabera, erasoa hasi eta lehen bi egunetan aire eta artilleria bidezko 47 eraso zenbatu ziren, HPGak (Kurdistango Herri Defentsa, PKKren adar armatua) publiko egindako datuen arabera. Plataformak adierazi duenez, lehen erasoen aurrean gerrillak lortu du turkiar indar armatuei mendialdeko eremura sarrera eragoztea. Alabaina, azpimarratzen denez, “lurreko erasoa datozen egunetan zehar garatuko dela aurreikusten da”. Horrez gain, plataformak gogorarazi du Turkia ez dela ari bakarrik “Kurdistango mendi libreak” erasotzen, eta etengabe ari dela Rojavako muga-eremuak erasotzen (Siriako ipar-ekialdea).

Operazio militarraren aurrean, apirilaren 19an Irakeko Kanpo Harremanetako Ministerioak Turkiako enbaxadorea hitzartu zuen, Turkiari “ekintza probokatzaileak eta urraketa onartezinak” eten ditzala eskatzeko. Egun bateko tartean Al-Arabiya telebista kateak jasotako Turkiako presidente Recep Tayyip Erdoganen adierazpenek, ordea, balizko erasoen etenaldiari ateak ixten zizkioten: “Erdoganek baieztatu du Turkiak Sirian eta Iraken egiten dituen operazio militarrak jarraituko duela, bere segurtasunari laguntzen diola”.

Kurdistango gerra, Ukrainako gerraren itzalpean hauspotua

Turkiaren azken operazio militarraren aurrean Gera dezagun Kurdistango Turkiaren gerra inperialista! komunikatua plazaratu du Kurdistango Askapen Mugimenduak, eta bertan, besteak beste, beren aurkako erasoak denboran atzetik datozela azpimarratu dute: “Era berean, Siriako iparraldearen eta Rojavaren aurkako eguneroko erasoek etenik gabe diraute”. Alabaina, idatzia hasten du esanez Kurdistango egoera puntu kritiko batera heltzen ari dela eta Turkiaren erasoa nabarmen ari dela areagotzen. Eta horren arrazoietako bat Ukrainako gerraren karira sortutako testuingurua dela ematen da ulertzera.

A l'ombra mediàtica de la guerra de #Ucrainarussia el règim feixista de #Turquia conjuntament amb el KDP estan, de nou, atacant les regions de la resistència a les muntanyes del #kurdistan a Bashur (Kurdistan iraquià).

Comunicat del Moviment d'Alliberament del Kurdistan. pic.twitter.com/HR0Qq9JtId

— Ponent amb Kurdistan #Riseup4Rojava (@AzadiLleida) April 20, 2022

Kurdistango Askapen Mugimenduaren hitzetan, “maiz esan da Ukrainako gerraren itzalpean Erdoganek areagotu egin zezakeela bere okupazio gerra. Lehendik, mundu guztiaren aurrean gauzatzen zen Kurdistango gerra, berau zalantzan jarri gabe; egun, zuzenean isilarazia eta arreta orotik zokoratua da”. Beste hitz batzuekin esanda: mundu guztiaren arreta Ukrainara bideratuta, Turkiak are zigorgabetasun gehiagoz eraso diezaioke Kurdistango herriari.

Claw-lock operazioaren berri izan baino egun batzuk lehenago, Ukrainako gerrak Kurdistanen eragin zitzakeen albo-kalteez mintzatu ziren Radio Kobane irratsaioan. Los ecos de la guerra de Ucrania en Kurdistán (Ukrainako gerraren oihartzunak Kurdistanen) izendatutako saioan, ondoko irakurketa egin zuten: “Turkiak baliatu dezake Errusiaren ahultasun militar momentua. Eta egungo testuinguruan sortutako eta 80ko hamarkadatik ikusi gabekoa bezalako errusofobia olatuaren aurrean NATOk senti dezake Turkia inoiz baino beharrezkoa duela, eta hortaz haren ankerkeriak eta gehiegikeriak onartuak izan daitezke, orain arte izan diren bezala, edo are gehiago”.

Zentzu horretan, Ukrainako gerrarekin gertatzen ari den Erdoganen zuriketa seinalatu du KNK-k: “Recep Tayyip Erdogan turkiar presidentea Ukrainako gerran bitartekari papera betetzen ari den bitartean, bakegile gisa aurkeztu nahi du bere burua (…) Beste behin, Erdoganen egiazko aurpegia erasotzailearena eta okupatzailearena da, Kurdistanen hainbatetan agerian geratu den bezala”.

“Borondatea eta hedabideak eskura daude, azken asteetan nazioarteko komunitateak Ukrainarekin erakutsitako elkartasunarekin hori egiaztatu dugu. Baina ezin daiteke gerra bat kondenatu eta beste bat isilarazi, zer esanik ez europar herrialdeen arma esportazio masiboekin NATOren armada batek egindako bistako erasoaz ari garenean”, salatu du Kurdistango Askapen Mugimenduak.

Gerra zibil baten mehatxua

Aipatutakoez gain, beste aspektu baten gainean ohartarazpena egiteko ere baliatu du komunikatua Kurdistango Askapen Mugimenduak. Bertan jasotzen denez, Turkiaren azken erasoa hegoaldeko Kurdistanen gobernatzen duen KDP alderdiaren kolaborazioarekin gauzatu da; “aspalditik egon dira prestatzen eta orain abiatu da ofizialki”. Azaltzen denez, apirilaren 15ean KDP alderdiko lehen ministroa Erdoganekin eta MIT Turkiako zerbitzu sekretuko buruarekin bildu zen, eta komunikatua idatzi zuten egunean hegazkin militarrak Kurdistango hegoaldeko base militarretatik ari ziren aireratzen, “baieztatuz Turkiako Estatuaren eta KDPren arteko kooperazioa”. Horrek ekar dezakeena seinalatu dute: “Turkiaren gerrarekin batera, luzaroan kezka eragin duen gerra zibil kurdua antzeman daiteke”.