Gerediaga Elkarteak eta Durangoko Udalak laugarren urtez abian jarriko dute Sormen Beka DA!. Sariaren xedea euskarazko sorkuntza bultzatzea da, baita sortzaile berriei bidea irekitzea eta horien lana ezagutaraztea ere. Aurreko hiru edizioetan literatura, musika eta ikus-entzunezko alorretako proiektuak saritu dituzte, eta 2021ko edizioan kultur digitalaren alorreko proiektu bat sarituko dute.

Antolatzaileek jakinarazi dutenez, laugarren edizioak kultura digitala oinarri duten proiektuetan jarriko du arreta, eta praktika edota espresio artistiko baten oinarritutako lan digitala sarituko da. Alabaina, azpimarratu dute fisikotasunarekin uztarturiko lan digitalek ere tokia izango dutela hautagaien artean.

Beka deialdira beren proiektua aurkeztu nahi dutenek 2021ko irailaren 21a arte dute epea. Egun horretan itxiko da lanak aurkezteko epea, arratsaldeko 18:00etan. Proposamenak posta elektronikoz helaraziko dira gerediaga@durangokoazoka.eus helbidera. Proiektuak banaka zein taldeka aurkeztu ahalko dira, beti ere horien atzean dauden pertsonak artista berriak eta hemezortzi urtetik gorakoak badira.  

Behin lanak aurkezteko epea bukatuta, epaimahaiak laupabost lan aukeratuko ditu, eta horien egileek beren lanak defendatu beharko dituzte epaimahaiaren aurrean. Lan irabazlea 56. Durangoko Azokan ezagutaraziko da, eta sarituak urtebeteko epea izango du proiektua gauzatzeko.

Beka deialdiaren oinarriak, informazio gehigarria eta formularioak esteka honetan daude eskuragai: www.duragokoazoka.eus