Levik dio izen hauek publiko egitea gobernuen erabakia izan dela. Falcianik bazekiela, baina ez zegoela ados. “Bera informazioa publikatzearen alde zegoen, baina beti ere, helburuak lortzeko erabilgarri bazen: zigorgabetasunari eta injustiziari amaiera jartzea". Ekintzaileak dioenez, Falcianik pentsatzen du zerrenda beste modu batera erabili behar dela.

Zerrendaren kontuak iruzurgile asko izutzeko balio duela dio, askok pentsa baitezakete zerrendan daudela, bertan egon gabe. Hala ere, ondorengoa dio informazioa horrela publikatzeari buruz: "Ustelkeria minbizia bezala da: organismoan sartzea lortzen baduzu, gainontzeko guztia iker dezakezu. Baina ikertu nahi duzun horren izena publiko egiten baduzu, zantzu guztiak desagertzen dira".

"Zer gertatzen da filmetan gaiztoak bere argazkia ikusten duenean telebistan? Itxuraldatu eta ihes egiten du, ezta? Hemen gauza bera. Espainiako ogasuneko kupulako jende askok Botíni abisua pasa zioten: “E, ezkuta ezazu ahal duzun guztia, eta ezin duzuna osagarritu". Pujolekin berdin. Eraginkortasun kontua da. Borrokatzen ditugun egiturak oso boteretsuak dira, oso ongi antolatuak, eta diru asko daukate. Guk zuhurtasuna bakarrik daukagu, eta “guk” diodanean, borroka egiten dugun jendea eta erakundeetan dagoen jende serioaz ari naiz".

Levik dio Espainiako Estatuan "askotan lagundu diela Zerga Agentziak iruzurgile handiei". Bere hitzetan, dirua zor zutenak jazarri beharrean, ikerketak agindu eta atzeko tranpa guztia ulertzen saiatu beharrean, egoera erregularizatzen lagundu diete. Gogoratzen duenez, Bartzelonako epaile batek salatu zuen 558 iruzurgile handiri Espainiako Estatuak abisua igorri ziela, eta horri esker egoera erregularizatu eta fortunaren parte handi bat ezkutatzea lortu zutela.

Zergatik pasa da horrenbeste denbora Falcianik datuak filtratu zituenetik, izenak publiko egin diren arte? Galdera horri erantzuna eman dio ekintzaileak elkarrizketan.

“Batetik, gobernu erakundeek zerrendaren kontrola galtzeko beldurra zeukatela uste dugu, eta horregatik nahiago izan dute publiko egin, kontrola zezaketen moduren batean. Bestetik, erakundeen barnean tentsioak daude zerga iruzurraren aurka lanean ari direnen eta konplizitateak dituztenen artean. Eta horren guztiaren erdian, espero ez zuten aldagai bat agertu da: gizarte zibila". Bankiaren eta Pujolen kasuak aipatzen ditu, barnean tentsioak daudela adierazteko adibide gisa. "Tentsio konplikatua da, konplizitateak daudelako, zinismoa dago eta egoera zaintzen ari diren herritarrak daudelako. Ez da harrapatzea bakarrik, sistema eta mekanismo batzuekin amaitzeko modua jarri behar dugu".

Leviren hitzetan, Falcianik zerrendaren parte bat bakarrik eman du, "barnetik" inplikatuei abisatzen zietelako. "Kazetariek eskuetan daukaten zerrenda ez da osoa eta ez da sekula izango".