“Euskal herriak izan duen dinamizatzaile kulturalik handienetarikoa, eta garai ezberdinetako artisten inspiratzailea” bezala definitu dute Oteiza. Bere omenez egingo diren jardunaldien helburua “Oteizak euskal gizarteari, kanpokoari eta bere buruari planteaturiko galderen inguruan zituen ideia eta sentimenduak plazaratzea da”, azaldu du Doka Kafe Antzokiko arduradunak.

Artistaren oroipen-jarduerak Kukai dantza taldeak eta Ttanttaka antzerki taldeak batera eginiko antzerki batekin hasi dira. “Otehitzari biraka” du izena antzezlanak.

Gaur 19:30etan Jon Intxaustegik zuzendutako “Fragmentos” dokumentala botako dute leku berdinean. Asteazkenean hitzaldi bat egingo da, eta ostera “Casa vacía” dokumentala botako dute 19:30etan.

Ostegunean, azkenik, bertso saioa egingo dute Maialen Lujanbio eta Andoni Egañarekin. Sarrera bost eurokoa izango da, eta saioa hasi baino ordu erdi lehenago eskuratu ahal izango da Dokan bertan. Bertso saioaren ostean, Aldatzen Laguntzen antzerki taldeak bere obra erakutsiko du.

Bestalde, Alzuzako Oteiza museoan ere artistaren heriotzaren hamargarren urteurrena gogoratuko dute. Museoak ateak zabalduko ditu eta doako bisita gidatuak eskainiko ditu. Honez gain, maiatzaren 8a eta 12a bitartean hainbat jardunaldi antolatuko ditu Oteizaren omenez, eta beste zenbait ekintza egongo dira urtean zehar.