Zinemaldiak beste behin defendatu du Johnny Depp aktoreari Donostia Saria emateko erabakia. Emakume zinemagileen elkarteek eta alderdi politikoek salatu dute hautua, Deppek emazte ohiari tratu txarrak egin izanaren salaketak jaso baititu. Zinemaldiak, ordea, argi dauka: aktorea “ez dute atxilotu, akusatu edo kondenatu” indarkeria matxistagatik.

Sententzia irmo baten faltan, José Luis Rebordinos Zinemaldiko zuzendariak adierazi du “errugabetasun printzipioa” errespetatu behar dela. Festibaleko arduradunek “Hitz egin dezagun etikaz” izenezko komunikatua zabaldu zuten ostiralean, eta bertan nabarmendu dute “kulturaren eta ordenamendu juridikoaren oinarrizko printzipio” hori errespetatzea bereziki garrantzitsua dela “sare sozialetako lintxamenduak ohikoak diren garaiotan”.

Bestalde, nabarmendu dute Zinemaldiak emakumeen aurkako indarkeria kondetzen duela, eta lantaldean emakumeentzako “giro seguruak” eskaintzeaz arduratzen dela. Berdintasuna sustatzeko, “ikuspuntu kritikoa eta feminista” daukan urteroko programazioa daukatela ekarri nahi izan dute gogora.

Egindako kritikak

Euskal Herriko emakume zinemagileen elkarteak eta emakume zinemagileen eta ikus-entzunezko medioen CIMA elkarteak gizartearentzako eredugarri den aktore baten hautaketa defendatu dute. Haien ustez, zinemaren munduan ez ezik, bizitza pribatuan ere errreferente den pertsona bat aukeratu beharko luke Zinemaldiak. 

EH Bildu-k, berriz, aktoreari Donostia Saria emateak indarkeria matxista “normalizatzen” lagunduko lukeela adierazi du. Alderdi politikoak salatu du arazoa “erlatibizatzea” eta “bigarren planora baztertzea” eragingo lukeela Deppi aintzatespena emateak.

Eragileek erabakia atzera botatzeko eskatu diote Zinemaldiko antolatzaileei. Baina ezezkoa jaso dute bi aldiz. Rebordinosek aurreko astean adierazi zuenez, “festibalaren eginkizuna ez da zinema industriako kideen jokabidea epaitzea”. Oraingoan, errugabetasun printzipioa defendatu du.