Lau urte daramatza Osakidetzan lanean Aitor B. fisioak. Ez du abizenik eman nahi, ez duelako lanean eragitea. Lau urte daramatza ordezkapenak egiten eta bere inguruko zenbait ospitaletan aritu da lanean. Zerbitzuarekiko eta lan baldintzekiko begirada baikorra dauka: “Zerbitzua orokorrean ona da, baina gertutasuna falta zaigu”.

Fisioak artatu baino lehen, hiru pertsonen filtroa pasa behar du pazienteak: osasun etxeko medikuak, traumatologoak eta mediku errehabilitadoreak ikusi behar dute. “Nahiz eta gauzak ondo egin, guregana iritsi arte hiru hilabeteko prozesua izan daiteke”, azaldu du. Horrek pribatua indartzen duela salatu du: “Jendea pribatura doa azkarragoa delako: deitzen duz,u txanda ematen dizute, eta ordaintzen duzu. Azkarra, pertsonalizatua eta gertukoa, baina diru truke”. Hortaz, arreta hobetzeko gertutasuna eta irisgarritasuna landu behar direla nabarmendu du: “Fisioengana iristea kostatzen da”.

Arreta hobetzeko zenbait proiektu lantzen ari dira, helburua da osasun-etxeetan bertan pazienteak artatzea. “Kontuan izan behar dugu fisioterapia oso diziplina gaztea dela, eta oraindik bere bidea egiten ari dela”. Horrekin batera, fisioek dituzten ezagutzak balioan jarri behar direla azpimarratu du: “Fisio bakoitzak dituen ezagutzak indartu beharko genituzke; medikuntzan oso argi daude espezialitateak, eta erizaintzan gero eta gehiago. Ez dut esaten espezializatu behar garenik, baina ardura gehiago hartu bai”.

Funtzionamenduari dagokionez, zonaldeka antolatuta daude, eta bakoitza bere modura antolatzen da. Oraingo ospitalean paziente bakoitzarekin egoteko 30 minutu ditu: “Aurretik diagnostiko bat egin diotenez, badakizu nola lan egingo duzun; hortaz, arreta on bat emateko ondo dago”. Kasu konplexuagoak lantzeko ordubete egoten dira. Hala ere, beste zentro batzuetan, ohiko kasuetarako 20 minutuko txandak dituzte.

Dagoeneko lau urte daramatza lanean, eta ordutik ordezkapenak egiten ari da: “Lanean hasten garenean hori da ohikoena”. Horretarako bi zerrenda dituzte, oposizioak egin dituztenentzat eta egin ez dituztenentzat. Horrez gain, ordezkapen luzeak edo motzak hartzeko aukera dago: “Luzeetan atzean nagoenez motzetatik deitzen didate”. Lan bati uko egiten badiote penalizazioak egoten dira; hala nola zerrenda atzerago jarri edo sei hilabetez ez deitu. “Langile gutxi daudenez ezetz esan arren, berriz deitzen dute”.

Fisioaren ustez arrazoia da langile askok egonkortasun bila pribatura jotzen duela: “Osakidetzan, askotan ez dakizu noiz izanen duzun lana, igual bi aste zaude lanik gabe, eta gero kontratu luze batekin. Hortaz, jendea pribatura doa, urtebeteko soldata dauka eta lasai geratzen da”. Gaineratu du askotan jardunaldi murriztuak direnez ez duela gastu guztiak kubritzeko ematen: “Nik gastu gutxi dut eta  hala ere ez dit ematen; batez ere gazteak gara gabiltzanak”.

Hala ere, ikasketak amaitu eta lanean hasteko aukera ona dela uste du: “Ez daukazu egonkortasun handirik, baina ez duzu behar handirik”. Horrekin batera, ikasten jarraitzeko aukera ematen duela uste du. “30urtetik aurrera lehentasunak aldatzen dira”. Fisioaren ustez “zailena” hastea da: “Hasieran jardunaldi erdia egin nuen udan, ostean urte erdi egon nintzen ia lanik egin gabe, eta behin hori pasata ordezkapen luze bat hartu, eta lan bat bestearen atzetik lotu dut”.