Asteburuan aurkeztu dute publikoki Izitu, Hego Uribeko eragile politikoa. Berriki ezagutzera emandako eragileak, baina, badarama denbora itzaletan jardunean. Azken urteetan, hainbat ekimen aurrera ateratzeko martxan jardun duen “antolakuntza marko formal” baten fruitua da Izitu. “Hasieran gazte asanbladen koordinadora, ondoren hausnarketa eta eraketa prozesuan egon den talde politikoa” izan da, eta horren bidez burutu dituzte, besteak beste, Kapitala eta Birusa dinamika komunikatiboa, Urriko Martxa, Maiatz Gorria eta Euskal Herritik kanpoko borrokak ezagutzeko brigadak.

Udaberrian zeukan asmoa eragileak bere burua aurkezteko, behin “barne mailako eraketa prozesua” borobilduta. Alabaina, koronabirusaren agerraldiak planak atzeratzera behartu ditu, eta hilabete batzuren buruan ikusi du bere burua “publikoki eta formalki” aurkezteko parada. Behin beren jarduna ezagutzera emanda, Izituko kideek interesa duen orori beraiekin harremanetan jartzeko gonbita luzatu diote.

Helburu orokor zehatza du eragileak: “ikuspegi eta praktika politiko iraultzailea ahal bezain beste zabaldu eta gure inguruan txertatu”. Beren txoko xumetik, Hego Uribe eskualdetik, putz egin nahi dute “iraultzaren sukarrak Euskal Herriko kale, auzo, mendi, herri eta hiriak hartu ditzan”. Hortik eragilearen izena; “izitu” baita zeozer piztu nahi denean erabiltzen den hitza beren euskalkian. “Apal eta esaneko nahi gaituzten boteretsuen aurrean, iraganetik datozkigun txingarrak hauspotu eta su berri bat izitu” nahi baitu eragileak.

Ilunean argi bat pizteko unea delakoan daude Izituko kideak, egiten duten irakurketaren arabera Euskal Herria historikoak diren garaietan murgilduta baitabil. “60 urte luzez iraun duen ziklo politiko baten akaberan, ziklo berriaren nondik norakoak ezartze bideko trantsizioan gaude. Zaila da garai berri horren eduki, aldagai eta formak zelakoak izango diren aurreikustea, baina gauza jakina da Euskal Herriko askapen borroka ezaugarritu duen norabide iraultzailea galtzeko arrisku erreala egon badagoela”. Testuinguruan horretan esku hartzea eta eragitea erabakita sortu da Izitu.

Iraultzaren bideari segi

Eragilearen hitzetan, klase banaketan oinarritzen den, patriarkatuak zeharkatzen duen eta kolonialitateari eta nazio zapalkuntzari lotutako adierazpenak dituen jendarte egitura da egun indarrean dagoena. Eta hargatik, beren ustetan, “biolentzia adierazpen horien guztien konbinazio dialektikoak osatzen du egungo dominazio sistema, osotasun bezala ulertu behar duguna. Hau da, partzializatu ezin daitekeena, eta, hortaz, erantzun integral bat beharrezko duena. Dominazioa errotik suntsitu eta errealitate sozial berri oso bat eraikitzeko gai izango den erantzun organizatibo, politiko, ekonomiko, kultural eta nazionala. Erantzun iraultzailea, hain zuzen ere”.

Erantzun iraultzaile horren beharraz konbentziturik agertu den eragileak argi dauka betekizun apala duela iraultzara bidea egiteari dagokionez. “Askoren artean bete beharko dugun ozeanoan tanta bat baino ez baikara”, irakur daiteke beren aurkezpen agirian.

Helburu zehatzak abian den ikasturterako

Umiltasunetik egin nahi dizkio ekarpenak iraultzaren eraikuntzari Izituk. Eta zentzu horretan, identifikatuak ditu zenbait gako: “Komunitatearen eraikuntza eta horren bitartez herri eta langile boterearen eraikuntza; antolakuntza eta autodefentsa mekanismoen garapena; elkarlaguntza eta zaintza erdigunean jartzea; euskara eta euskal kultura bultzatzea; internazionalismoa; etika iraultzailea indartu eta mentalitate dominatzailea gainditzea...”. Beren egitekoen zerrendan zentraltasuna duten puntuak dira horiek, eta nahi dute “horiek guztiak bultzatzea eta maila lokalean ahalik eta adierazpen zabalena eta errotuena lortzea”. Xede horretara bidean, potentziala ikusten diete “herri boterearen espresio auto-antolatuei”, Galdakaoko Elkarlaguntza Sareari eta Batu Elkarlaguntza Sareari kasu.

“Horregatik, eta orain arte egin dugun bezala, berauek elikatzen eta indartzen buru-belarri arituko gara aurrerantzean”, jakinarazi dute. Eta horrez gain, eragile politiko gisa ikasturte honetarako xedatu dituzten helburuak ere eman dituzte ezagutzera: formakuntza ideologikorako saioak egitea, Euskal Herritik kanpoko borroka esperientziak ezagutzeko brigada gauzatzea, maiatzaren lehenaren harira aste gorria antolatzea, eta herri eta langile mugimenduen espresioak saretzen eta indartzen jarraitzea. “Beti ere eragile bakoitzaren autonomia eta beharrezkoak dituen denborak errespetatuz”, egin du ñabardura azken puntuari erreferentzian.