Itzaltzutik itzulian
Etxean goiz bazkaldu eta Itzaltzura egin dugu, aspaldiko partez. 16:00retarako egon nahi genuen han, bertso saiorako puntual. Heldu gara, 16:06. Karpa zurira bidean presaka gindoazela lonaren bestaldetik zetorren ahots bat entzun dugu, “arazo bat egon da eta ez da kaferik egonen… baina orain Xune eta Mikelot saskien zozketa eginen dugu eta hau da saski bakoitzean dagoena (...)”. Amane zen, 100 bat urteren ondotik Itzaltzun jaiotako lehen euskalduna. Urte batzuk geroago helduko zen bigarrena, Peru, Amanek oholtzakide zuena, bere neba.
Urtero bezala, karpa jendez lepo, bazkalosteko giro alai eta beroan. Zozketa bukatu eta bertsolariei utzi diete oholtza Itzaltzuko bi gazteek. “Bertso saio dinamikoa” dio eguneko afitxak, egia esan ez dakit oso ongi zer den. Ea ba.
Aimar Karrika eta Jon Maia. Bi bertsolari aski ezagun eta desberdinak. Gai librean hasi dira kantari biak, panoramaren berri ematen. Hasteko, Itzaltzuko bardoari egin diote biek erreferentzia, nola ez. Urte batzuk badira kondairak dioena pasa zenetik, baina Maiak gogorarazi digu egun fraideei kantatzen ez badiegu ere, alturaz eta profilez antzeko gabiltzala.
Hitz ezkutuaren jokoarekin jarraitu du saioak. Lehenengoari ekin diote, kostaldekoak pistak eman eta barnealdekoak asmatu behar. Pertsonaiaren inguruko pistak eman eta eman aritu da Jon: estatubatuarra, feminista, beltza, mundu mailan ezaguna... alferrik. Aimarrek, lotsatuta, erridikulua egiten ari dela besterik ez du esaten, mundu mailakoa hori ere. Publikoa barre batean. Jonek kidearen patxarana seinalatu eta “patxaranari h(An gela)” jartzeko gomendioa eman dio. Ona.
Hor hasi dira barreak, baina hitz ezkuturik onena etortzeke da. Hitza daraman kartela hartu eta Aimarri erakutsi ondotik publikoari aurkeztu dio Amaiak: “Satisfyer” dago idatzita. Irudi eta guzti. Oihuka, algaraka hasi da publikoa, baina baten batek ere ondokoaren belarrira egin du galdera, ez pentsa. Errazagoa izan zaie hitz hau asmatzea.
100 aldiz despeditu den musika taldeaz eta mukiez ere aritu dira eta Joni 15 urteko gazte baten azalean sartzea tokatu zaio, Hatortxu Rock jaialdira sartu nahi baina gurasoen baimenik gabe kanpoan geratuko denaren azalean.
Nor da nor jokoa izan da azkena eta Donald Trump-ez gain, Olentzero bezain euskal kulturaren parte den Doraemon ere asmatu behar izan dituzte publikoaren laguntzaz –eta ez dakit laguntza ala oztopo izan garen gehiago–.
Gauak luze joko du baina guri berandutu zaigu, alde egin behar dugu, penaz. Argi geratu zaigu, hala ere, hurrengorako zer egin: Otsagabiako kanpinean erreserba egin eta Elkorretara ibilaldia biharamunean.
Ah, eta bertsolariei agurtzeko ordua heldu zaienean aitortu digute baietz, haiendako kafea bazegoela.
Datorren urtean gehiago.
Biba Gartxot!
Gutxi ateratzen naiz azken urteetan. Askotan esan dut, badakit, baina badaezpada ere. Bertso saio batera joan naiz gaur. “Bejondeizula”. Bai, horregatik abisatu dut gutxi ateratzen naizela, pentsatzen dut zuek kultur ekitaldi askotara joaten zaretela, eta... [+]
19 urte ditu Maddik, Matematika Gradua ikasten ari da Leioan, EHUko Zientzia eta Teknologia fakultatean, musika ikasketak eginak ditu, eta gazteagatik ere, bertsolari iaioa da. Eta bertsolari ona baino hobea izateko zumitzak ditu, bateko eta besteko plazetan ikusi dugunez... [+]
Musika ondare tradizionala “berreskuratu, zaindu eta transmititzeagatik” irabazi du Eusko Ikaskuntzaren 2024ko saria Beltranek. Urte luzeetako “dibulgazio lan multidimensionala” aitortu nahi izan dio epaimahaiak.
Final-laurdenetako txartela lortu du Pagolak. Hurrengo saioak datorren asteburuan izango dira, Hondarribian eta Andoainen.