Hezbollahri eta bere aliatuei erabateko gerra hasteko arrazoi gehiago ari da ematen Israel azken egunotan. Astelehenean eraso zabala egin du Israelek Libanon eta milaka herritar beren etxeak utzi eta ihesean hasi dira, hirietan izugarrizko auto-ilarak eraginez. Astelehen gauean emandako datuen arabera, gutxienez 492 pertsona hil eta 1.645 zauritu ditu Israelek, Libano suntsitzen jarraitzen duen bitartean. Hildakoen artean 35 haur, dozenaka zibil eta bi mediku daude.

Libanoko Osasun ministro Firass Abiadek adierazi du Israel bonbardaketak zuzentzen ari dela ihes egiten saiatzen diren pertsonen etxeetara, osasun etxeetara, anbulantzietara eta jendearen autoetara, Al Jazeerak jaso duenez.

Israelek 400 aire-eraso inguru egin ditu Libano hegoaldeko dozenaka hiritan pare bat orduan. Israelgo armadak adierazi zuen Hezbolaren aurkako erasoak "sistematikoki zabaltzen" ari zela. Horren ondorioz, Libano suntsituta geratu da, Libano hegoaldean bonbardaketetatik ihesi doazen dozenaka libanoarrekin.

Ostiraletik hasita

Ostiralean Hezbollahren bi komandante garrantzitsu hil dituzte sionistek Beiruten, antolakunde xiitak berak aitortu duenez, beste hamabi kiderekin batera. Zibilez betetako zonalde batean bi eraikin eraitsi ditu Israelek bonbardaketekin. “Zehaztasun handiko erasoa” dela ziurtatu badu ere, gutxienez 45 pertsona hil dituzte bonbek, tartean hiru haur. Eraikinen hondakin artean gorpuak bilatzeko lanetan dabiltza oraindik. Libanoko Garraio ministroak ohartarazi du gerra krimena dela zibilen etxebizitzak bonbardatzea, eta Israel “eskualdea gerrara eramaten” ari dela salatu du.

Beiruteko erasoaz gain, Israelek Libano bonbardatzen jarraitu du asteburuan, batez ere hegoaldean. Al Jazeeraren arabera, larunbatean 400 eraso egin dituzte sionistek Libanon. Hezbollah prestatzen ari zen “eskala handiko” erasoa oztopatzeko egin dute azken operazio hori, Israelgo Armadaren esanetan.

Hala ere, ez dute saihestu Hezbollahk aurrekaririk gabeko erasoak egitea Israelen aurka. Libanon “zibilak hil izanari erantzunez”, larunbatean bertan dozenaka suziri jaurti ditu milizia xiitak Israelen kontrolpeko lurretara. Haifa hiriaren ingurura ere heldu dira, eta bertako Ramat David base militarra jo dute. Gatazka honetan Hezbollahren suziriak urrutien heldu diren aldia izan da, eta Israelgo hiri handi baten ingurua jotzeak zalantzan jarri du sionisten segurtasun sistema. Urriaren 7tik sionisten eta Hezbollahren arteko eraso handienak izan dira asteburukoak.

“Ez badute oraindik mezua ulertu, laster ulertuko dute”

NBEko idazkari nagusi Antonio Guterresek iragan asteko walkie-talkie eta bilagailuen leherketa kritikatu du, gogorarazita helburu militarretarako “objektu zibilak” erabiltzea nazioarteko legearen aurkakoa dela. Israelek eragindako leherketek ez dituzte bereizten borrokalariak eta biztanle zibilak. Leherketetako asko espazio publikoan gertatu dira, eta zibil ugari zauritu eta hil dituzte.

Israelgo Armadak ohikoa du halako erasoak bere gain ez hartzea, baina igande honetan Netanyahuk berak erreferentzia egin die agerraldi publiko batean, esanez “azken egunetan Hezbollahri irudikatu ezin zituen kolpeak” eman dizkiotela. Lehen ministro sionistak mehatxu egin dio Jainkoaren Alderdiari: “Ez badute oraindik mezua ulertu, laster ulertuko dute”.

Eskualde mailako gerra arriskua

Iranen parte hartzea da orain airean gelditzen den galdera nagusietakoa. Iranek hainbatetan adierazi du Israel Hezbollahrekin gerran hastekotan esku hartuko duela gatazkan. Hala ere, Israel marra gorriak gainditzen ari da bata bestearen atzetik, eta momentuz Iranek ez du tamainako erantzunik eman. Uztaila amaieran sionistek Teheranen bertan hil zuten Ismail Haniyeh, Hamas Erresistentzia Islamikoko buru politikoa, eta orduan ere “kalkulatutako erantzuna” hitzeman zuen Iranek, “momentu egokian” egingo zutela esanez, baina ez da halakorik heldu oraingoz.

Hezbollahren aurkako sionisten oldarraldiak gora egingo duela aurreikusten da. Yoav Gallant Israelgo Defentsa ministroak jakinarazi du “gerraren erdigunea” iparraldera mugituko dela, Gazatik Libanora. “Gure etsaiak jazarriko ditugu gure hiritarrak defendatzeko, eta Beiruten ere egingo dugu”, adierazi du. Beiruti eraso egitea Hezbollahk jarritako marra gorrietako bat zen, baina hiru aldiz bonbardatu dute jada hiriburua.

Israel eta Hezbollahren arteko gatazkan aditua den Gilbert Achcar irakasleak Berria egunkariari adierazi dio AEBen baimena behar duela Israelek Hezbollahren aurka gerra osoa abiatzeko, Iran gatazkan sartuz gero Estatu Batuen laguntza beharko lukeelako. Achcarren hitzetan, Israelek gerra betea hasten badu milizia xiitaren aurka, “Iranek erantzun egin beharko” du, bestela “sinesgarritasun oro” galduko lukeelako. Apirilean frogatu zuen Iranek Israel bonbardatzeko gaitasuna baduela. Sionistek Sirian bi agintari iraniar hil izanari erantzunez erasoaldi handia egin zuen Iranek Israelen aurka, huthiekin eta Hezbollahrekin batera.

Gaza bigarren planora?

Ikusteko dago sionisten indar militarrak Libanora bideratzeak zenbateraino ekarriko duen Gazako egoera leuntzea. Israelgo agintari militarrek hainbatetan adierazi dute Israelek ezin duela bi frontetan borroka egin aldi berean, eta indarrak iparraldera mugitzen ari dira orain. Hamasek adierazi du borrokan jarraitzeko gai dela, kalte handiak jasan baditu ere.

Orain arte, 41.400 pertsonatik gora hil dituzte sionistek Gazan, ia 100.000 zauritu, eta hondakin bilakatu dute Gazako Zerrenda gehiena, bizigarria izateko aukerak asko zailduz. Adituen arabera, laguntza humanitarioaren 1.000 kamioi inguru sartu behar dira Gazan egunero, genozidioak utzitako egoerari aurre egiteko, eta UNICEF erakundearen arabera Israelek egunean hamabost kamioiri besterik ez die sartzen utzi irailean.