Zisjordanian kolonoen bost kokaleku gehiago legeztatuko dituela iragarri du Israelgo Finantza ministro Bezalel Smotrichek. Nazioarteko legediaren aurkakoak izateaz gain, orain arte legez kanpokoak ziren Israelgo legearen arabera ere, nahiz eta urteak daramatzaten kolono sionisten kontrolpean, horietako bat 2002. urtetik. Hainbat herrialdek Palestinako Estatua aitortu izanari erantzunez hartu dute neurria, Smotrichen esanetan, baina erabakia bat dator Zisjordania anexionatzeko aspaldiko asmoekin. Smotrichek berak hainbatetan adierazi du bere asmoa dela Zisjordania eta Gaza guztiz menperatu eta palestinar guztiak kanporatzea. Bestalde, Palestinako Aginte Nazionalari boterea kentzea ere erabaki dute, lege israeldarra aplikatuz orain arte PANaren administraziopean zeuden hainbat zonaldetan, eta palestinar aginteari botere exekutiboa kendu diote Belen ekialdean eta Jerusalem hegoekialdean.

Bost koloniak ‘Israeletik’ isolatutako lurretan daude eraikita, Zisjordania barnealdean. “Aitzindariak” deitzen diete halakoei, bidea zabaltzen doazenak kolono sionista berriei. Beste kolonietatik urrun daude legeztatuko diren bostak, Nablus, Ramallah, Belen eta Hebrongo zonalde palestinarretatik gertu, Osloko akordioa urratzen duten kokalekuetan. Kasu guztietan palestinarren jabetzako lurrak lapurtuz eraiki dira koloniak, askotan apropos aukeratuak palestinar herriak isolatzeko eta Zisjordania barruko bideen loturak oztopatzeko.

“Duela hilabete iragarri genuen Palestinako Estatua aldebakarrez aitortzen duen estatu bakoitzeko kokaleku bat ezarriko genuela. Bost herrialdek egin dute akats hori, beraz, bost kolonia ezarriko ditugu, eta Palestina errekonozitu duten herrialde bakoitzaren izena izango dute koloniek. Hau da gure erantzuna. Palestinako Estatuak mehatxatu egiten du Israelgo Estatuaren existentzia, beraz, ez da inoiz ezarriko. Aurrerapausoa da, milioi bat kolono ekarriko ditugu hona, hau da etsaiari ematen diogun erantzuna”. Hitz horiekin jakinarazi du Smotrich Finantza ministroak Israelgo kabinetearekin hartutako erabakia, eta Yossi Fuchs kabinete buruak onartu du gerora, Netanyahuk oraindik ofizialki ezer esan ez badu ere.

Halako neurriekin pixkanaka Zisjordania anexionatzen doaz sionistak, lurralde okupatuetan kolonia gehiago sortuz. Nazioartean legez kanpokotzat jotzen dira Zisjordaniako kolonoen kokalekuak, eta horietako asko legez kanpokoak dira Israelgo legediaren baitan ere. Gobernuak, baina, onartu egiten ditu, eta legez kanpo sortutako kolonietako asko ondorenera legeztatzen joan da, estatuaren parte gisa aitortuz, eta eskura jarri dizkie ura, elektrizitatea, eraikitzeko baimenak eta finantzazioa.

Koloniak nazioarteko legearen aurka

1967tik 130 kolonia eraiki dira Israelgo Gobernuaren baimenarekin. Horiez gain, legez kanpoko 100 kokaleku “aitzindari” eraiki dira 1990. urtetik hona, eta Israelek legeztatu egin ditu horietako batzuk. Netanyahuk iaz azkartu zuen kokaleku berriak legeztatzeko prozedura, eta Smotrich ministroari eman zion koloniak kudeatzeko ardura.

NBEko Batzar Orokorrak, Segurtasun Kontseiluak berak eta Nazioarteko Justizia Auzitegiak askotan adierazi dute Israelen koloniek Genevako Laugarren Hitzarmena urratzen dutela. Bertan, indar okupatzaileari debekatzen zaio bere biztanleak mugitzea okupatutako lurretara. Nazioarteko Zigor Auzitegiak gerra krimen gisa hartzen ditu halako ekintzak.

Botere murrizketa Palestinako Aginte Nazionalari

Aginte palestinarrari botere administratiboa kendu diote Zisjordania okupatuko %25ean, 440 palestinar herrixka hartzen dituen zonaldean, eta boterea Kolonien Administrazioari eman, Smotrichek berak kontrolatzen duen erakundeari. Orain, Israelek agintzen du bertan eraikuntza eta lurralde plangintzari dagozkion auzietan, orain arte PANaren boterea mugatua bazen ere.

Finantza ministroaren ordezkariek adierazi dutenez, bost koloniak legeztatu eta administrazio boterea kentzearen “ordainetan”, Smotrichek “askatu” egingo ditu Palestinako Aginte Nazionalari dagozkion zerga bilketa batzuk. Izan ere, PANaren zerga bilketaren zati handi bat Israelek kudeatzen du, eta ondoren helarazten dio Mahmud Abbasek gidatutako erakundeari. Urriaren 7tik hona zerga bilketa horien gehiengoa izoztuta izan du Israelek, palestinarrak ekonomikoki itotzeko asmoz, salatu dutenez.

40 sarekada egunean Zisjordanian

Ia bederatzi hilabete igaro dira Israelek azken oldarraldia abiatu zuenetik eta, Gaza suntsitzeaz gain, Zisjordaniako palestinarren aurka etengabeko presioa eta indarkeria eragin du armada sionistak. 533 palestinar hil ditu gutxienez, horietako 137 haurrak, eta 5.300 baino gehiago zauritu. Ehunka sarekada egin dituzte Zisjordaniako hiri eta herrietan, eta milaka palestinar atxilotu dituzte azken hilabeteetan, Gazako iturrien arabera.

Zisjordaniako biztanleen bizi baldintzak okertzeko egindako ekintzen artean, Nida Ibrahim kazetari palestinarrak nabarmendu ditu, heriotza eta atxiloketez gain, ehunka eraikin eraitsi izana eta errepideak eta lurrak suntsitu izana hondeamakinen bidez. Ibrahimek adierazi du 40 sarekada egin dituela Israelek egunero, batez beste.

Uztaileko lehen egunean bi hildako eta beste hainbat zauritu eragin ditu Israelgo armadak Tulkaremgo errefuxiatu kanpalekuan. Hamabost urteko Mohammed Sarham tiroz hil zuten sionistek, bere etxeko atean geldirik zegoela, bideo batean ikus daitekeenez. Kolono sionistek ere eraso ugari egin dituzte, palestinar lurrei su eman diete bi herritan. Haaretz hedabide israeldarrak jakinarazi du juduen atxiloketa administratiboa debekatzeko legea aurkeztu duela Israelgo Gobernuak eta, honenbestez, Zisjordanian palestinarren aurkako erasoak egiten dituztenak babestuta geldituko dira.