Sektore turistikoak kontrasteen urtea bizi du aurten. Bisitari atzerritarren kopurua gutxienekora murriztu den arren, landa-guneek ohiko martxari eusten diote, uztailean %84 inguruko okupazioarekin. Iruñeko errealitatea bestelakoa da ordea, lau hotel-plazatik bakarra baino ez baita okupatuta egon. Ondorioz, uztailean iaz baino 2.505 pertsona gutxiago aritzen dira soldatapean sektore horretan.

Datu horiek Nafarroako Behatoki Turistikoak bildu ditu, sektoreko hainbat elkarterekin eta Mabrian plataformarekin egindako lankidetzari esker, tartean Big Data erabiliz oporretako alokairuen plazak monitorizatzen dituen ikerketa bat.

Kontrastea

Baztan eta Erribera izan dira turistek lehenetsi dituzten guneak, %95 eta %90eko okupazioarekin, hurrenez hurren. Sakanan, Aralarren eta Iratin, hotelak %80an egon dira, eta Erronkarin, berriz, %70ean. Ehuneko horiek Iruñearen % 40tik urrun daude, are gehiago kontuan hartzen bada iazko uztailean Nafarroako hiriburuko hotelen okupazioa % 72koa izan zela hilabete osoan. Jaitsiera nabarmenaren atzean San Fermin jaiak bertan behera uztea eta beste herrialdeetako gobernuek Espainiako Estatura ez joateko emandako osasun gomendioak daude. Oporretako apartamentuen alokairuari dagokionez, okupazioa %44koa izan zen, ekainean baino sei puntu gehiago.

Bestalde, Iruñeko Hotelen Elkarteak igorritako datuen arabera, Iruñeko erdigunean dauden hotelen baliogabetzeen kopurua %25,5ekoa da uztaileko azken astean, eta %50ekoa Iruñerri osoan.

Erreserbak

Oporretako alokairuari dagokionez, erreserbak gehituz joan dira egun guztietarako, abuztuaren 15etik 23ra bitarteko astean izan ezik, bertan behera utzi baitira batez beste 30 plaza egunean, hau da, plazen %1. Halere, irailerako eta urrirako bertan behera geratu diren arren, Gabonetarako erreserba berriak aurreikusten dira. "Kanpinetan eta landa-ostatuetan uda ona izaten ari da", onartu zuen Nacho Calvo Nafarroako Ostalaritza Elkarteko kideak, ostegun goizean datu horiek jakin baino lehen. Sektoreak, oro har, “oso une zailak” bizi ditu, fakturazioan eta enplegu-bolumenean islatzen direnak, azken sei urteetan etengabe hazi baitziren.

Langileengan eragina

Enplegu erregulazio txostenaren itzalpean jarraitzen duten langileak kontuan izan gabe, ostalaritzan 2.500 langile baino gehiago kaleratu dituzte azken 12 hilabeteetan, ia %14a. Martxoa eta apirila hondoratu zirenetik, ia ez du jarduerarik berreskuratu, nahiz eta uztailean kontratazioen gorakada apal bat izan zen.

Aierdiren balorazioa

Manu Aierdi Nafarroako Ekonomia Garapenerako kontseilariaren arabera, badirudi abuztuan “argazki hori mantendu egingo dela”. Hilabeteotako balorazioa egiterakoan azpimarratu duenez, “nazioartetik iritsitako turistak” izan dira gehien murriztu direnak. Turismo bulegoetako kontsultak erreferentzia hartuta eta Espainiatik Euskal Herrira egindako bisitak nazioartekotzat jo gabe, kontsulten %89 Espainiako Estatutik iritsitako biztanleenak izan direla ohartarazi du, eta %11, berriz, “kanpotarrak” izan direla dio, gehienak frantziarrak –Ipar Euskal Herriko turistak, atzerritar gisa hartuta–..

Bestalde, Europako zenbait herrialdetako gobernuek Hego Euskal Herrira ez joateko egin dituzten gomendioak ikusita, ondorengoa dio Aierdik: “Ez dira ez mezu positiboak, ezta bidezkoak ere”. Kalte handiena "ez-Sanferminetan" hautematen du ekonomia garapenerako kontseilariak: “Hor argi eta garbi ikusten da kanpotarren faltak eragin duen kaltea”.