2020-2021 ikasturtean, lau ikastetxetan jarri zuten martxan euskara ez dakiten umeei hizkuntza irakasteko Eusle murgiltze programa EAEn. Emaitzak “positiboak” izan direnez, beste 24 eskolatara zabalduko dute orain. Horrela azaldu dute Begoña Pedrosa Eusko Jaurlaritzako Hezkuntza sailburuordeak eta Lucia Torrealdai Aniztasunerako eta Hezkuntza Inklusiorako zuzendariak Bilbon egindako agerraldian. 

Hezkuntza Sailak kudeatutako programaren helburua haurrei eta gazteei komunikaziorako behar duten gutxieneko konpetentzia linguistikoa eskaintzea da. Eusle Lehen Hezkuntzako laugarren, bosgarren eta seigarren mailako ikasleei eta Bigarren Hezkuntzako lehenengo eta bigarren mailako gazteei zuzenduta dago. Programak 24 eta 36 hilabete artean irauten du, eta ikasleei A2 hizkuntza maila lortzeko aukera ematen die denbora horretan.

Haurrak bost eta hamar laguneko talde txikietan biltzen dira astean zehar hamar eta hamabi orduz. Eusle programako tutorearen laguntzarekin, bereziki prestatutako material didaktikoa baliatzen dute, “erabileran oinarritutako” hizkuntza ikasketa egiteko. Komunikatzeko gaitasun minimoa lortu eta gero, hizkuntza dakiten gainerako ikasleen ohiko klaseetan parte-hartzera bultzatzen dituzte.

Ikasleak pixkanaka integratzea da programaren helburua, beraz, hizkuntza ezagutza hobea lortzeaz gain, beste hainbat aspektu izan behar dituzte kontutan. Ikasleen eta taldearen “ongizate emozionalari” arreta berezia eskaini nahi diote, eta eskola alorrean, haurrak “gustura, seguru eta motibatuta” sentitzea nahi dute.

Ikastetxe gehiago

Aurreko ikasturtean, lau programa pilotu jarri ziren abian. 2021-2022 ikasturterako, berriz, beste 24 ikastetxe gehituko dira dinamikara: Arabako zortzik hartuko dute parte, Gipuzkoako hamalauk eta Bizkaiko seik. Bestalde, unibertsitateek ere izango dute zeresana, Hezkuntza Sailarekin batera haiek izango baitira programaren emaitzak ebaluatzeaz arduratuko direnak.