Honduraseko milaka migratzaile indarrez blokatu dituzte AEBetara bidean beste behin
Iragan astean 9.000 migratzailez osatutako karabana irten zen Hondurasetik AEBetara heldu nahian. Guatemalako poliziak indarrez egin du haien aurka igandean, eta 2.000 pertsona inguru blokatuta daude.
Iragan astearen amaieran abiatu zen migratzaileen karabana Hondurasetik, hainbat zutabetan, eta bat eginik igaro zuten Honduras eta Guatemala arteko muga ostiral eta larunbatean. Igandean mugatik 30 km ingurura Guatemalako Poliziak eta armadak migratzaileak inguratu eta haien bidea blokatu zuen. Bortizki ekidin zuten blokeoa gainditzen saiatu zirenen ahalegina. Karabanako partaideetako batzuk sakabanatu egin dira, eta milaka batzuk –2.000 inguru, zenbait iturriren arabera– bertan jarraitzen dute.
Pobreziatik ihesi
“Armadak makilakadaka gerarazten du migratzaileen karabana. Hondurastarrak dira, indarkeriatik, pobreziatik, pandemiaren inpaktutik eta bi urakanetatik ihesi doazenak”, idatzi du Twitterren Mexiko eta Guatemala arteko mugatik Iñigo Herraiz kazetariak. Honduraseko egiturazko pobrezia eta indarkeriari, azaroan Eta eta Lota urakanek herrialdean sortutako triskantza eta COVID-19aren ondorioak gehitu behar zaizkie. Familia osoak daude partaideen artean, haurrak tartean. 2018az geroztik mota honetako dozena inguru karabana irten dira Hondurasetik AEBetara heldu nahian.
Herraizen esanetan oso gutxi dira gaur arte blokeoa gainditu eta Mexikoko mugara heltzea lortu duten migratzaileak. Mugan Mexikoko Guardia Nazionala dute zain, Mexikoko Gobernuak propio bidalita migratzaileak igaro ez daitezen. Mexikon lanean diharduen Alberto Pradilla kazetari euskaldunak ziurtatu du Mexikoko gobernuak Guatemalara bertara bidali dituela lau polizia autobus, “Hondurasera migratzaileak itzultzen laguntzeko. Nazioarteko lankidetza pobreek miseriatik ihes egitea eragozteko”.
El ejército frena a palos la #CaravanaMigrante Son hondureños que huyen de la violencia, la pobreza, el impacto de la pandemia y dos huracanes, cuyo único delito es no haberse hecho una PCR porque, como centroamericanos, tienen todo el derecho a transitar libremente pic.twitter.com/Iz5eIpEQQb
— Íñigo Herraiz (@InigoHerraiz) January 17, 2021
Malen Garmendiak bi urte daramatza Greziako Lesboseko migranteen errefuxiatu gunean lanean , ZAPOREAK gobernuz kanpoko elkartearekin.
Gas negar-eragilea erabili dute Migratzaileen Karabanaren aurka Guatemalatik Mexikora igaro nahi zutenean. Migratzaileek Tecun Uman hirira (Guatemala) itzuli behar izan dute, atxilotu ez ditzaten.
Milaka ertamerikarren sufrimendua islatzen duten argazki ikusgarriak egin ditu Simone Dalmassok, eta Plaza Publica-k zabaldu ditu.
Ez aurrera eta ez atzera dago Ertamerikako migratzaileen karabana Mexikoko Tijuanan. Milaka lagunen ametsa zen, kolektiboaren indarraz baliatuta, AEBetako muga gainditzea. Hilabetea eman dute zain, baina tenperatura baxuak eta euriak larritasuna barreiatu dute kanpamentuetan... [+]
Muga zeharkatzea ezinezkoa da estatubatuar militarren begiradapean. “AEB ez da babeslekua” dio Trumpek. Ehun lagun inguru beraien herrialdera itzuli da dagoeneko.
Astebete baino gehiago daramate Tijuanan, muga zeharkatu nahian. Trumpek 6.000 militar baino gehiago ditu bertan. Igandean muga igarotzen ahalegindu ziren, eta gogor erantzun zuten AEBek.
Xenofobia nagusi da Tijuanan, Mexiko eta AEBen arteko mugan. 5.000 migratzaile inguru daude hirian, ez aurrera eta ez atzera, eta haien kontra manifestatu dira Tijuanako herritarrak.
Lehen 800 migratzaileak iritsi dira Tijuanako hondartzetara, eta hesiaren aurrean dira jada. Datozen ordu eta egunetan iritsiko dira gainontzekoak. Trumpek segurtasun indarrak areagotu ditu, eta muga abendura arte itxi du.