“Espainiak Ukrainari emandako babesa berretsi du Sanchezek, eta defentsaren sektoreari dei egin dio Europako Defentsa Estrategia Industrialean giltzarri izatera”, zioen Espainiako Gobernuaren webguneak bere lerroburuan. Albistearen arabera, Sánchezek esker oneko hitzak helarazi zizkien armagintzaren ordezkariei, eta beren garrantzia aitortu zien: “Gobernuburuak eskerrak eman dizkie defentsa industriako enpresetako zuzendariei, testuinguru geopolitiko oso konplexu batean hartutako konpromisoagatik; izan ere, Espainia lanean ari da segurtasun-mehatxuen aurrean prestatzeko eta autonomia estrategikoaren maila handitzeko”.

Etorkizun hurbileko asmoez eta erronkez hitz egin zuten politikari eta enpresariek. Negozioa biderkatu nahi dute: “Espainiak sektorea funtsezko eragile bihurtu nahi du duela egun gutxi aurkeztutako Europako Defentsa Estrategia Industrialean”. Horretarako, besteak beste, Europako programa militarretan “lidergoa” handitzea, I+G bultzatzea edo enpleguak areagotzea aurreikusi zituzten. Gobernuak albistean emandako informazioaren arabera, Espainiako Estatua Europako laugarren esportatzailea da armagintzaren sektorean, munduko zortzigarrena, eta 36.000 langile ditu lanean.

Goi bilkuran 23 enpresatako 24 pertsona egon ziren, denak gizonak Aciturri enpresako María Eugenia Clemente salbu. Moncloak bilkuraren lau argazki zabaldu zituen, guztiak talde argazkiak bat salbu, eta horretan Clemente agertzen da lehen planoan Sánchezi eskua ematen.

Heriotzaren eusko label merkatariak ere Moncloan

Moncloako bilkuran izan ziren Hego Euskal Herriko industria militarreko buru nagusiak: Aernnovako presidente Juan Ignacio López Gandasegui; SAPAko presidente Jokin Aperribay; ITP Aeroko Carlos Azola; eta Andrés Sendagorta, SENEReko presidentea. ARGIAk Gasteizkoak talde antimilitaristari eskatu dio iritzia bilkuraren dimentsio publikoaren esanahiaz –publikoa baina mugatua, apenas eman baitzuen bilkuraren berri inongo hedabiderik–. Martxoaren 18ko irudia ez dela ohikoa berretsi du Gasteizkoakek, “heriotzaren merkatariak jada ez dira ezkutatzen, euskaldunak ere ez”, agertu du harridura, eta ondorengo hipotesia luzatu:

“Moncloako ekimen bat balitz, hauteskunde-etekinen bila, enpresa horietako buru nagusiak ez ziratekeen bilerara joango eta argazkia atera. Eta Moncloak, irudien jabeak, egin duena baino askoz gehiago zabalduko lituzke. Logikoagoa da pentsatzea heriotzaren merkatari horiek inposatu dituztela irudiak, hain zuzen ere eszenaren instituzionaltasunak, tokiagatik eta pertsonaiagatik, gerrekin negozioa egiten dutenen irudia garbitzen lagun dezan”.

Gasteizkoak taldetik, horrez gain, azpimarratu dute irudiek erakusten duten euskal ordezkarien arteko “laguntasun eta konfiantza” giroa. “Adiskidetasun horrek salatzen du haien guztien arteko harremanak askoz ohikoagoak direla publikoki erakusten dutena baino”. Bilkurarekin armagintzaren enpresariei emandako babes politikoaz, oroitarazi dute ohikoa dela baita Euskal Herrian ere: “Lehendakari ezberdinek ‘posatu’ dute pertsonaia horiekin”. Babes politiko horrek “bultzatzen” du “gero eta larriagoa” den errealitatea: “Azken hamar urteetan industria militarrean parte hartzen duten Hego Euskal Herriko enpresen kopurua oso modu kezkagarrian biderkatu da, dagoeneko 200 baino gehiago dira”.

Gerran eta militarismoan sakontzen

Moncloako argazkia, bestalde, Mendebaldeko agintarien mezu militaristen ugaltze betean etorri da. NATOko buruek edo Ursula Von der Leyen Europako Batzordeko presidenteak hainbat aldiz eman dute segurutzat, esaterako, Errusia eta Europar Batasunaren arteko gerra zuzena epe ertainean, eta horren aurrean militarismoa eta gastu militarra indartzera dei egin dute. Derrigorrezko zerbitzu militarra berrezartzeko aukeraz hitz egin dute Frantziako eta Alemaniako gobernuek. “Gerra mehatxua erabatekoa da, eta gizartea ez da guztiz ohartzen”, adierazi zuen Margarita Robles Espainiako Defentsa ministroak, Moncloan industria militarraren buruekin bildu aurreko egunean.

Onargarri bihurtzen ari dira orain gutxi arte onargarriak ez liratekeen mezu eta politikak, eta horrek egiten du posible Moncloako argazkia. “Gero eta argiago dago: gerrak hemen hasten dira egiten, eta argazkikoak dira beraiekin aberasten direnak”, borobildu dute Gasteizkoak talde antimilitaristatik.