Zergatik greba?

Hamaika arrazoi dauzkagu grebarako. Egungo egoerak eskatzen du, pentsionisten, feministen, lan mundutik bultzatzen ari garen borroka horiek zer nolako indarra hartzen ari diren ikusita. Momentu egokia da borroka horiek guztiak batzeko eta hauspotzeko, bi punturekin: berreskuratzeko azken hamarkadan kendu dizkiguten eskubide guztiak lan munduan eta alor sozialean; eta aurrera egiteko gure agendarekin eta aldarrikapenekin, eta horiek agenda politikoan jartzeko.

Grebarako deia iragartzeko prentsaurrekoan, Hego Euskal Herriko bi gobernuak kritikatu zenituzten. Zer da egozten diezuena?

Greba batek beti dauka kontraparte bat, eta interpelazio eta eskaera zuzenak egin behar dira. Hego Euskal Herriko erakundeek ardura zuzena dute. Pentsioez ari garenean, ez gara Espainiako erakundeez soilik ari. Hemengoez ere ari gara. Pentsiodunek eta sindikatuek 1080ko gutxieneko pentsioaren muga ezarri dugu, eta hori hemendik konplementa liteke. 1.200 euroko gutxieneko soldata aipatzen dugunean, ezin da ahaztu gobernuok langile publiko asko dauzkatela. Bermatutako errendaterkin gauza bera gertatzen da. Hori jarri nahi dugu agendan.

CCOO kritiko azaldu da zuen greba deialdiarekin. Posible al da bazterrotan, bereziki gurea bezalako izaera propio eta bereiziko erkidegoan, greba batek arrakasta edukitzea batasun sindikalik gabe?

ELA eta LAB, eta beste eragileen presentzia handiagoa den lekuetan, arrakasta handiagoa izango da. Hori ez da sekretua. Bistakoa da. Baina azken urteotan ELAk eta LABek egin dugun ibilbideak gora bultzatu gaitu hauteskunde sindikaletan. Babes handiagoa edukitzera eraman gaitu. Beharbada CCOOren arazoa greba honekiko da kontraesan handi bati egin behar diola aurre. Greba honek pentsioen gaia erdian kokatu du. Eta 2011ko urtarrilaren 27an, ELA, LAB eta beste zenbait sindikatu greban ziren bitartean, CCOOk eta UGTk adostu zituzten Zapateroren gobernuarekin orain salatzen ditugun murrizketak. Hori da CCOOk greba honekin duen arazo larria.

Azaroaren 16an, pentsiodunen manifestazioak Hego Euskal Herriko lau hiriburuetan. Erretirauak abangoardia izaten ari dira.

Greba ulertzeko eta kokatzeko aintzat hartu behar da zer nolako urratsak egin diren azken hilabeteotan. Besteak beste, pentsiodunekin hitz egin eta gero erabaki dugu greba orokorrarekin aurrera egitea. Oso une aproposa da borroka horiek guztiak uztartzeko, eta aurrera egiteko. Greba eskubidea bera kolokan jartzen ari dira. Urkullu lehendakariak askotan aipatzen ditu grebaren aurkako jarrerak, eta sindikatuen aurkakoak. Geldirik eta isilik nahi gaituzte, eta grebak hain zuzen ere kontrakoa ahalbidetzen du.