Poliziak abuztuaren 31n xedatu zituen baso inguruak arrisku gune bezala, horrek eremua husteari dagokionez erraztasunak ematen baitzizkien (arrisku eremua ahotan hartuta identifikazio zenbakirik gabe jardun izan dute, adibidez). Ekintzaileen arabera, ordutik ia egunero esku hartu du basoan poliziak. Hambacheko basoa husteko lehen ahalegina, aldiz, irailaren 6an egin zuten, eta ordutik zuhaitzetan eraikitako 30 etxetik gora eraitsi dituzte. Pasa den urriaren 2an, astelehenean, ekintzaile guztiak kanporatu eta basoa guztiz hustu zuten polizia agenteek eta RWE konpainia elektrikoaren langileek.

Baso osoan zehar hainbat komunitate eraikiak zituzten ekintzaileek, eta polizia banan-banan joan da horiek husten. Komunitateak desagerrarazten joan ahala ekintzaileak okupazio berriak egiten joan badira ere, erresistentziak hiru komunitatetan oinarritzen amaitu zuen huste erabatekoaren aurreko egunetarako: Fendria, GhostTown eta Paragraph 11. P11 izan da eraisten azkena, asteleheneko operazioaren baitan.

Astelehen goizeko 08:00etarako polizia P11 inguruetan zen, eta ordu beteren buruan komunitateak hartzen zuen eremua inguraturik zeukaten. Polizia agenteek, RWE konpainiak kontratatutako jendearekin batera, barrikadak bota eta komunitatean sartzea lortu zuten. Ekintzaileek salatu dutenez, indarkeriaz jardun zuten bai inguruaren zen norbanakoen kontra.  

Indarkeria poliziala

Poliziak indarkeriaz jardun duela salatu dute hasieratik ekintzaileek. Indarkeria horren ondoriorik larriena irailaren 20an eman zen, 27 urteko Steffen M. kazetariaren heriotzarekin. Steffen zuhaitzetan eraikitako bi etxeren arteko zubian zen, 20 metroko altueran, eta bertatik erori ostean hil zen. Poliziak azkar batean zabaldu zuen bere bertsioa, kazetaria erori zen unean eta eremuan agenteak huste operaziorik egiten ez zebiltzala adieraziz. Hustea, baina, bertatik metro oso gutxitara ari zen ematen.

Gertakari honen ostean, Hambacheko ekintzaileek prentsaurrekoa egin zuten atsekabea adierazi eta Düsseldorfeko (Alemania) gobernuari “basoaren hustea, ebakuazioa eta suntsipena gelditzea” eskatzeko. Ostean, Renaniako Gobernuak polizia operazioa behin behinean bertan behera geratuko zela adierazi zuen. Husteari berandu barik ekin zioten berriz ordea.

Horren ostean zauritutakorik egon da, eta ekintzaileen eguneroko apunteetan jasotzen denez, irailaren 27an pertsona bat zaurituta eraman zuten larrialdi zerbitzuek. Behin baino gehiagotan jaso dutenez, esku-hartzeetan poliziak maiz jarri ditu bizitzak arriskuan.

Atxilotuak izatearekin eta kontrol biometrikoen erabilera egitearekin ere mehatxuak ditu poliziak erresistentzian aritu diren ekintzaileak.

Poliziak ekintzaileen kontra erabilitako indarkeria erakusten duten hainbat argazki eta bideo daude sarean:

#HambacherForst #Hambibleibt
"Ich begreife einfach nicht, wie brutal und kaltschnäuzig die Cops uns rausgeprügelt haben. Was soll das denn, noch zu treten nachdem Leute gestolpert sind? Gehts denen um die Räumung, oder haben die einfach Bock auf Gewalt?!" - eine Aktivistin pic.twitter.com/H6ZeGSVKzn

— Hambacher Forst (@HambiBleibt) 2018(e)ko irailaren 27(a)

RWEren indarkeria

Lignitoa ustiatu asmoz, RWE enpresa energetikoak dauka Hambacheko basoa mozteko interes gehien. Interes horri jarraiki, honek ere egin du indarkeriaren erabilpena eremua husteko operazioan zehar. Arnsberg (Alemania) barrutiko gobernuak Hambacheko meategiko plan operatibo nagusia onartu izanak ahalbidetu egiten dio RWE enpresari, urtero legez, urritik aurrera zuhaitz mozketak egitea. Halabaina, mozketan hilaren 14tik aurrera egiteko baimena zeukaten arren, desalojoa eman bitartean ehundaka zuhaitz moztu dituztela salatu dute ekintzaileek.

11:46 Behind the tripod #RWE and cops are cutting more trees in #Lorien. Remember yesterday they already citted 200 trees in Lorien, although its not allowed to cut until October 14. #HambacherForest #HambiBleibt #HambacherForst Image by @infozentrale pic.twitter.com/rTAIizdgjw

— Enough is Enough! (@enough14) 2018(e)ko irailaren 27(a)

Horrez gain, enpresaren segurtasun agenteen babesarekin, basoan zeuden saguzarren zuloak estaltzen aritu dira zenbait biologo. Ekintzaileen arabera, honekin saguzarrek eremuan hibernatzen ez jarraitzea bilatzen zuten, basoa behera botatzea errazteko.

Horrez gain, enpresak zuhaitzetan kamerak ezarri izan dituela ere salatu dute.

Enpresa jo puntuan, ekintzaileek hainbat ekintza egin dituzte, ikatz-trena blokeatzea kasu:

Hambacher Forst, urteetako borroka baten testigu

Ipar Renania-Westfaliako operazio luzeenetarikoa bezala izendatu dutenak izan ditu aurrekariak. Orain sei urte ekintzaile ekologistek Hambacheko baso eremua okupatu zutenetik, hirugarren hustea izan da honakoa -lehena 2011an izan zen, eta bigarrena 2014an-. RWE konpainia energetikoak lignitoa ustiatzeko harrobia handitzeko planari eta horrek eragingo lukeen basoaren suntsipenari aurre egiteko xedea izan du hasieratik okupazioak.

Asteleheneko huste erabatekoaren ostean ekintzaileek hurrengoa adierazi dute: “aurreko errepresio ekintza horiek erresistentzia indartu eta anplifikatu besterik ez zuten egin, esponentzialki ugaritu zuten ekintzaile, ideia eta basoko zuhaitzetako etxeen kopurua”. Eta deritzotenez, guzti honek indartu egiten du “austeritate, kolapso ekologiko eta klima aldaketa garaietan” halako proiektuak zergatik egiten diren planteatzen dituzten eztabaida publikoak. Bestalde, pozik agertu dira jasandako errepresioaren aurrean izandako elkartasunarekin.

Hambacheko basoa husteko xedearen atzean dagoena

Basoak 4.100 hektarea zituen hasieran, baina RWE enpresaren esku-hartzea tarteko, gaur egun 200 hektarea besterik ez dira geratzen moztu gabe. Zuhaitz mozketak onartzen zituen aurtengo planarekin, RWE enpresak geratzen den baso zatiaren erdia moztu nahi du. Alemaniako basorik zaharrenetarikoa denaren milaka urtetako eboluzioa epe motzean suntsitzen ari dira.

Bideo honek basoaren azken urteetako suntsiketa erakusten du:

They've already destroyed so much of the forest 🙁

Protect what's left: https://t.co/pHkcVd78AR #HambacherForst #HambiBleibt pic.twitter.com/RvTOcMkB1Y

— Greenpeace (@Greenpeace) 2018(e)ko irailaren 28(a)