Espainiako Segurtasun Nuklearreko Kontseiluari (CSN) egokituko zaio eskaera aztertzea, bi urtez luzatu daiteke erabakia hartzeko prozesua, eta zentrala irekiko den ala ez eta irekitzekotan zenbat denborarako izango den adostu beharko du.

Iberdrolarekin batera jarri nahi dute berriro ere martxan, Nuclenorren gestiopean. Endesa eta Iberdrolak osatzen dute Nuclenor, jabetzaren erdia du bakoitzak eta Garoña ustiatu zuen 2012ko abenduan itxi zuten arte.

Borja Prado, Endesako presidenteak astelehenean jakinarazi zuen Endesa beharrezko neurriak hartzen ari dela Garoña berriro ireki dadin: “Eskura dugun oro egiten ari gara, baina gure esku bainoago gobernuaren esku dago” adierazi zuen presidenteak, Oihan Vitoriak Berriarako jasotako hitzetan.

Oztopo ekonomikoak “desagertuta”

Berriako artikuluan baieztatzen denez, Espainiako Gobernuak araudian aldaketak egin zituen, Nuclenorren mesederako. 1999an onartutako zenbait artikulu moldatu zituen, eta zentralaren jarduera amaitu ostean urtebeteko epea gehitzeko aukera eman zion Nuclenorri.

Horretaz gain, zerga bereziak kendu eta berrirekierarako erraztasunak ezarri zituen Espainiako Gobernuak.

Endesako aholkulari Ana Brentaren esanetan “arrazoi ekonomikoengatik bakarrik” eten zuten Garoñaren jarduna, eta behin hondakin nuklearren gaineko fiskalitatearen atzeraegintasuna “desagertuta”, ez dago zentrala berriro irekitzeko “oztopo ekonomikorik”.

PPk Nuclenorri bidea erraztu dio

Dani Maeztu, EH Bilduko legebiltzarkideak Garoñaren irekierak dakartzan “arrisku larriak” gogorarazi ditu. “Arrazoirik gabeko neurria” dela esan du Maeztuk, gaur egungo eskaintza energetikoa eskaera baino askoz ere handiagoa delako.

Alderdiak Jaurlaritzari eskatu dio Garoñako zentrala irekitzen bada Iberdrola eta Endesarekin harremanak hautsi ditzala.

Izan ere, EAJk zentral nuklearraren aurkako jarrera azaldu du, eta “Garoña berriro irekitzea ahalbidetzeko, legedia aldatu izana” leporatu dio Ramiro Gonzalez Arabako Batzar Nagusietako EAJko bozeramaileak Alderdi Popularrari.

Gonzalezen esanetan zentrala itxita egon den artean “negoziazio isilak” mantendu ditu PPk konpainia elektrikoetako jabeekin, eta zergak enpresa elektrikoen mesedetan moldatu dituzte.