Ez hurbilegi, ez urrunegi, ez du lan erraza Pirinio Atlantikoetako prefetak G7koen gailurraren kontrakoei zer leku eman erabakitzeko. Baionako suprefekturan egin zuten bilkuran, kontra gailurra Hendaian (Lapurdi) egiteari buruz ados jarri ziren, baina Kotte Ezenarro PSko auzapezak kontrako iritzia agertu du jadaneko. G7 Ez plataformakoek abisatua dute, baimenarekin ala baimenik gabe, mobilizazioak egin eginen dituztela. Aurtengo Maiatzaren 1eko mobilizazioa G7koen gailurraren kontrako dinamikan kokatuko dute, eta heldu den uztailaren 13rako ere manifestazioa antolatuko dutela iragarria dute.

G7 Ez plataformakoek hiru bilkura izan dituzte Frantziako Gobernuaren ordezkariekin. “Herve Jonathan suprefetarekin bildu ginen bi aldiz, eta azken bilkura suprefetarekin eta Eric Spitz prefetarekin egin genuen, Baionan. Kontragailurra egin ahal izateko lekuen proposamenak ekarri genituen bi aldeek”, azaldu du Hartzea Lopez G7 Ez plataformako kideak. Akize (Landak), Donibane Garazi… berehala baztertu zituzten plataformako kideek. “Ez dugu onartuko gailur ofizialetik urrunegi ala bakartuak izatea”.

Hendaian egiteko proposamenarekin jarri ziren ados, baina herriko auzapezaren ahotsa da orduan altxatu dena. “Neguan, 17.000 herritar gara, baina, udan, 50.000 ere izaten gara hondartza eremuan bakarrik. Ez da posible, salbu jendea eta komertzioak arriskuan jartzen baditugu. Ez dakit nola har ditzakegun 7.000-8.000 pertsona”, deitoratu du Ezenarrok. Kanpotik etorriko diren taldeez, berriz, bere arrangura azaleratu du. “Nik tokikoak ezagutzen ditut, Bizi, LAB… Biziki ongi lan egiten dutenak. Baina kanpoko taldeen kasuan nik ez dakit nor zertaz arduratzen den. Eta ez dakidanean, ez ditut erabakiak nolanahika hartzen. Oraingoz, biziki dudakor nago”.

Plataformako kideen arabera, kontragailurra G7koen gailurraren ondorio bat besterik ez da, eta, beraz, prefetari dagokio kontrakoentzat lekua aurkitzea. “Haren esku Ezenarro konbentzitzea, eta, bestela, beste zerbait proposatu beharko digu”.

Hartzea Lopezen iritziz, Ezenarroren erantzunak erakusten du denak “deseroso” direla gailurraren antolaketarekin. “Garaiz dira dena bertan behera uzteko. Mantentzen badute, kontragailurra izanen da, modu batera edo bestera”. Frantziako komunikabide zenbaitetan, Poliziako eta Jendarmeriako buru batzuen adierazpenak zabaldu dituzte azken asteetan, G7koen gailurra uda betean eta eremu horretan antolatzearen kontra mintzatuz. “Gailurra ez du inork nahi. Denek erraten dute ez dela ideia ona”, gaineratu du Lopezek.

Euskal Herritik kanpora ere kezka sortu du G7koen gailurrak. Seignosse herriko auzapezak (Landak) deitoratu du turismoari kalte handia eginen diola agorril bukaeran. Hain zuzen ere, herriko hotelik gehienak beteak izanen dira, baina ez bakantzetara etorritako turistez, Miarritzeko gailurra zaintzera etorritako segurtasun indarrez baizik. Hotelentzat urte ona izanen dela uste badu ere, gainerako sektoreek normalean dituzten irabazien laurdena gal lezaketela uste du. Ororen buru, Seignosse herria helmuga turistiko gisa kaltetua izanen dela uste du. “Hona etortzeko ohitura dutenak aurten beste leku batera joanen dira; horrek erran nahi du beharbada ez direla ondoko aldi batean itzuliko”.

Azken asteetan, G7koen gailurraren kontra mobilizatzeko deialdiak zabaltzen ari dira Europako sare anitzetan. Berriki, Jaka Horien asanbladen asanblada agorril bukaeran Euskal Herrira etortzea aipatzen hasi da, ATTAC elkarteak ere bere udako unibertsitatea kontragailurrarekin batu nahiko luke, eta Notre Dame des Landeseko (Bretainia) Ambazadak antolatzen duen aste intergalaktikoa ere Euskal Herrian eginen dute aurten, agorrilaren 19tik 26ra. G7 Ez plataformari dagokionez, manifestaziora deitu dute uztailaren 13rako.

Gazteen saretzea

Otsailean abiatu zuten Oldartu gazte dinamika, eremu anitzetako Ipar Euskal Herriko gazteak G7ren kontra mobilizatzeko helburuarekin. “G7koen gailurrari aurre egiteko tresna bat nahi genuen, inolako etiketarik gabe eta ahalik eta gazte gehiena biltzeko”, azaldu du dinamikan parte hartzen du Unai Arkauzek. Gazteen prestakuntza eta ekintza bultzatu nahi dituzte, hilabetean ekinaldi bat antolatuta. Orain arte, internazionalismoari buruzko hitzaldiak eta Frantziako Poliziaren “errepresio estrategiez” aritu izan dira Oldartun, besteak beste.

Aurtengo Maiatzaren 1eko mobilizazioa G7koen gailurraren kontrako dinamikan hitzordu garrantzitsua izan zitekeela pentsaturik, gazteak saretzeko formula baten bila hasi ziren. Orduan iritsi zen LABen proposamena: sindikatu eta eragileen artean mobilizazio bateratua egitea. CGT eta LAB sindikatuekin batera, Bizi, talde feministak eta gazte blokea izanen dira. Hor, Oldartu, Aitzina, Klimaren aldeko gazteak, eta inoiz egitura batean inplikatu ez diren gazte andana elkartuko dituzte. “Elkarlan hori G7koen gailurrera arte atxiki nahiko genuke, eta espero dugu gazte eremu gehiago ere ukitzera iritsiko garela”.

Albiste hau Iparraldeko Hitzak argitaratu du eta CC-by-sa lizentziari esker ekarri dugu ARGIAra.