Azaroaren 27an argitaratu du Espainiako Estatuko Aldizkari Ofizialak (BOE) Arabako Armentia 2 putzua zulatzearen aldeko Ingurumen Inpaktu Adierazpena. 2010ean saiatu zen SHESA putzu berbera zulatzen, eta orduan ez zuen baimenik eskuratu. Oraingoan teknika konbentzionalak erabiliko direla adierazi du, baina helburua berbera izaten jarraitzen du: 1.400 km2 dituen Balmaseda lurpeko eraketatik gasa erauztea.

Fracking Ez mugimenduaren esanetan, aitzakiak aitzaki, “gas kantitate handiak ateratzeko putzu asko egin beharko dira”. Gainera, Balmaseda eraketaraino heltzeko Subillako akuiferoa zeharkatu beharko lukete makinek, “EAEko lurpeko ur-erreserba handiena, eta oinarrizko baliabide estrategiko gisa sailkatu dena larrialdietan Gasteiz hiria hornitzeko”.

Bertako erakundeen ardura

Espainiako Ingurumen Ministerioaren baimena du jada Armentia 2 putzuak. Ondorioz, eta proiektua berriz ere geraraztea helburu, Fracking Ez-ek “gertuen ditugun erakundeetan” jarri du begirada: Eusko Jaurlaritza, Arabako Aldundia eta Gasteizko Udala. Eusko Jaurlaritza da “proiektuaren bultzatzaile nagusia”, mugimendu ekologistaren arabera. 2020ko aurrekontuetan ez da Armentia 2 putzurako partidarik ageri, ordea. Jaurlaritzak aurrekontuekin iruzurren bat egiteko arriskua baztertzen ez badu ere, mugimenduak ez du uste 2020an putzuan lanak hasiko direnik. Susmoa dute hurrengo urterako Jaurlaritzaren helburua dela “bertako lanak hasteko behar diren lizentzien eta baimenen tramitazioan aurrera egitea”. Baimen horiek lortzeko zailtasunak aurreikusten ditu Fracking Ez-ek.

2010ean ere lur berbera zulatzeko Ingurumen Ministerioaren baimena eskuratu zuen SHESAk. Baina Enara 1 eta 2 putzuak ez ziren egin. Bi arrazoirengatik, Fracking Ez-en ustetan: mobilizazio herritar ikusgarria, eta Gasteizko Udalak baimena ukatu izana. Gasteizko HAPOak hirigintza kalifikazioa ematen zion lurrari, eta 2012an udal-teknikarien txostenak argi adierazi zuen hori zulaketekin bateraezina dela. Ondoko lurrak zulatzeko prozesu bat abiatu zuen SHESAk, baina bertan behera utzi zuen asmoa gerora.

2010era bueltatu nahi dela salatu du Francking Ez-ek. “Armentia 2 putzua zulatu ahal izateko, SHESAk jarduera lizentzia eskatu beharko du. Iraganean egindako jarduera bererako eta lurzati bererako”. Lurzatiak hirigintza kalifikazioa izaten jarraitzen du. Mugimenduaren ustetan bi arrazoik soilik azaldu dezakete sortutako egoera. Edo bultzatzaileen “erabateko gaitasun ezak”, edo “dena lotuta eta ondo lotuta” izateak. Bigarren aukerari dagokionez, kezka adierazi du EAJk bere “hegemonia instituzionala baliatu" dezakeelako hirigintza kalifikazioa aldatzen saiatzeko.

Fracking Ez-ek zuzenean interpelatu du Gorka Urtaran Gasteizko alkatea (EAJ) arrisku horren aurrean: “Zer jarrera du Urtaran jaunak horri dagokionez? Hirigintza-aldaketa hori ahalbidetuko du edo udaleko teknikarien jarrera defendatuko du?”. Azkenik, Arabako Aldundiari ere zuzendu zaio. Bi posizio daudela dio mugimendu ekologistak. Batetik, hainbatetan “zalantza garrantzitsuak” agertu dituzten teknikariena, eta, bestetik, “festa zulatzailea hasteko gogoa duela” adierazi duen ahaldun nagusia. “Zer irizpide ezarriko da kasu horretan?”, galdetu du.

Trantsizio energetikoaren alde

Tekniken inguruko eztabaidatik harago erregai fosilen erabilerarekin amaitzeko garaia dela aldarrikatu du Fracking Ez-ek. Armentia 2 putzuko lanen atzetik beste “ehunka” putzu etorriko liratekeela, eta horietan “ehunka milioi euro” gastatuko liratekeela salatu du: “Eusko Jaurlaritzak ezin du egun batean Larrialdi Klimatikoa deklaratu eta hurrengo egunean lur azpitik gasa ateratzeko plan handiak egiten hasi”. Industria horietan xahutzen den dirutza energia berriztagarrietara eta trantsizio energetikoa garatzeko politiketara bideratzeko eskatu du.

Amaitzeko, Fracking Ez-ek gogorarazi du urte batzuk igaro direla "arrakasta handiko” mobilizazio ziklo bat amaitutzat eman zuela. Beste eragile batzuk hartu zuten lekukoa ondoren, baina, beste modu batera bada ere, gertakariei adi eta “ingurua zulatu” nahi dutenak geldiarazteko lanean jarraituko du mugimenduak.