Aurrekontu proiektuari lotuta, lau puntu nabarmendu ditu Jaurlaritzak: inbertsio publikoa %50 gehituko duela 2021arekin alderatuta, I+G arloarekin “konpromiso irmoa” duela (%10 gehiago bideratuko du arlo honetara, gutxi gorabehera), 10 eurotik ia 8 jarriko direla gastu sozialetarako (proiektuaren %77 gizarte politikei dagokiela, alegia), eta Covid-programa hartzen duela bere baitan, 349 milioi eurorekin.

Bestalde, aurrekontuak erantzungo die “hiru trantsizio nagusiei: trantsizio teknologiko eta digitalari, trantsizio energetiko eta klimatikoari eta trantsizio sozial eta sanitarioari. Eusko Jaurlaritzak aurre egin behar die Covid-19ak eragindako krisialdiari eta krisialdi horren ondorio ekonomiko eta sozialei, baita gobernu-ekintzaren helburu nagusiei ere”.

EAEko defizita %0,9 izango dela eta zorpetzea 1.122,8 milioi eurotan murriztea aurreikusten dela ere jakinarazi du Jaurlaritzak.

Aurrekontu proiektua abenduaren 23an onartzea aurreikusten da.

Osakidetza, EHU, AHT, DSBE, EITB…

Sail bakoitzera bideratuko den diru publikoa honakoa izango da:

Osasuna: 4.352 milioi euro. Horietatik 3.333 milioi euro Osakidetzara bideratuko dira (116,6 milioi euro gehiago, Jaurlaritzaren esanetan).

Hezkuntza: 3.235 milioi euro. Langileen eta funtzionamenduaren gastuak 1.738 milioi eurokoak dira. 0 eta 3 urte arteko hezkuntzak eutsi egiten dio 30 milioi euroko aurrekontuari, Haurreskolak partzuergoak 59 milioi euroko aurrekontua du eta Euskal Herriko Unibertsitateak 356 milioi eurokoa.

Lana eta enplegua: 936,2 milioi euro. Diru-sarrerak Bermatzeko Errentako zenbatekoak %3 gehituko direla eta Etxebizitzarako Prestazio Osagarria %10 gehitu dela azpimarratu du Jaurlaritzak.

Ekonomiaren Garapena, Jasangarritasuna eta Ingurumena: 777,4 milioi euro. “Aurrekontua gehitu da industria-garapenean (41 milioi euro), teknologian (19 milioi euro), eraldaketa digitalean (10 milioi euro), portuetan (7,6 milioi euro), nekazaritzan (8,6 milioi euro) eta ingurumenean (7,7 milioi euro). Era berean, gehitu egin dira SPRI, SPRILUR eta Parke Teknologikoetako inbertsioak, ia 58 milioi eurora arte (40 milioi euro gehiago).

Segurtasuna: 725,1 milioi euro.

Lurralde Plangintza, Etxebizitza eta Garraioa: 564,4 milioi euro.  Euskal Y-rako eta Hego Saihesbiderako 56,4 milioi euroko zenbatekoa aurreikusten da. (2021ean baino 57,6 milioi euro gehiago, dio Jaurlaritzak).

Berdintasuna, Justizia eta Gizarte Politikak: 528,6 milioi euro. Emakundek 7,4 milioi euroko aurrekontua izango du, eta Garapenerako Lankidetzaren Agentziak 50,2 milioi eurokoa. Gizarte Larrialdietarako Laguntzarako eta pobrezia energetikoari aurre egiteko 42,5 milioi euro izango ditu. Barnean hartzen du Espetxeetako Programa berria, 70 milioi euro izango dituena.

Kultura eta Hizkuntza Politika: 322,4 milioi euro. 161,5 milioi euro EITBri dagozkio eta HABEk 46 milioi euro inguruko aurrekontua izango du.

Gobernantza Publikoa eta Autogobernua: 139,2 milioi euro. HAEEk 20,8 milioi euroko aurrekontuari eutsiko dio.

Ekonomia eta Ogasuna: 128,6 milioi euro. “Sail honetan deigarriena da Finkatuz funtsari Finantzen Euskal Institutuaren bidez egiten zaion 50 milioi euroko ekarpena, baita finantza-gastuak ordaintzeko 7 milioi euroko zenbatekoa ere”, azpimarratu du erakunde publikoak.

Turismoa, Merkataritza eta Kontsumoa: 52,1 milioi euro. 22,4 milioi euro bideratuko dira Turismo eta Ostalaritza Zuzendaritzara, 19,9 milioi euro Merkataritzara eta ia 6 milioi euro Kontsumobidera.

Lehendakaritza: 35,5 milioi euro. Berritasuna da EAEko ordezkaritza bat irekiko dela Parisen, eta horretarako inbertsioa 1,1 milioi euro ingurukoa izango da.

 

 

 

 

 

 

Aurreikuspen ekonomikoak

2021erako EAEn espero den hazkundea % 6,7an mantenduko dela jakinarazi du Eusko Jaurlaritzak, “nahiz eta zuhurtziaz jokatzera behartzen duten zenbait ziurgabetasun dauden, hala nola energiaren prezioa eta industria-hornigaien gabezia”. 2022rako aurreikuspenak hobetu egin dira: % 6,4ko hazkundea.