Datorren ikasturtean D-PAI hezkuntza eredua ezarrita duten ikastetxeek ingelerazko ordu bat gehiago eman beharko dute, euskarazko ikas orduetatik kenduta. Erabakia Hezkuntza Departamentuak hartu du PAI programako ereduak berdintzeko. Bitxia bada ere, gaztelerazko ereduei ingelerazko orduak kentzen zaizkien bitartean, euskarazkoei gehitzen zaizkie.
STEILAS sindikatuak erabaki hau salatu eta helegitea aurkeztu du haren kontra, Nafarroako hizkuntza ereduak ezartzen dituen 1988ko Foru Dekretuaren kontra egiten duelako. “Eredu horiek definitzeko euskara eta gaztelania baino ez ziren aintzat hartu, ingelesa aipatu ere ez zen egiten. D ereduari buruz honako hau dio: ´D ereduan irakaskuntza euskaraz da erabat, gaztelania arloa izan ezik, maila eta ziklo guztietan´.
D-PAI eredua ezarrita duten eskolei ere erreparatu die STEILAS-ek. “D-PAI duten ikastetxe gehien-gehienetan euskararen presentzia ahul samarra da eskolatik kanpo, beraz euskaraz ongi ikastea are nekezagoa da ingeleseko ordu kopurua handitzen bada. Murgiltzea ataka larrian jartzen da, euskarazko gaitasun nahikorik ez baita erdiesten gainerako hizkuntzei transferitzeko. Hori gutxi balitz, ingelesez emandako arloetan maila akademikoa nabarmen jaisten da”.
PAI bezalako ereduen porrota agerian utzi nahi izan du STEILAS-ek. “Ikasle gehienentzat kaltegarria da eta horregatik jaitsiko dituzte gaztelaniazko ereduetako ingelera orduak, euskaraz murgiltze eredua egiten dela kontutan hartu gabe, atzerriko hizkuntzako klase ordu horiek igotzen diren une berean”.
STEILAS-ek Madrilgo Unibertsitateak egindako txostena azaldu du PAIren ereduaren eragin txarraz ikasleen mailan, “Hori gaztelera bezalako hizkuntza baten ondoan, beraz pentsa ze ondorio izan dezake euskara bezalako murgiltze eredu batean”. Hezkuntza sindikatuak gogoratu du Txibitek berak PAI ereduaren kontra sinatu zuela bere senatari garaian, “Non eta Balearetan, Catalanaren kaltetan joaten zelako…zergatik ez Nafarroan euskararekin?”.
