Ziegan hilik aurkitu dute euskal herritar bat, Palentziako Dueñasko espetxean
43 urteko bilbotar bat hilik aurkitu dute ziegan, Palentziako Dueñas espetxean. Salhaketa Arabak jakinarazi duenez presoak egunak zeramatzan osasun-arreta eske, bularrean min zuelako. Familiak beste preso baten eskutik izan du senidearen heriotzaren berri. Salhaketak salatu du espetxean jazotako azken heriotza hau ez dela kasu isolatua, eta zenbait neurri hartzea eskatu die Espainiako Gobernuari, Barne Ministerioari eta Espetxeetako Zuzendaritza Nagusiari.
Otsailaren 4an Palentziako Dueñasko espetxeko bere ziegan hilik aurkitu zuten A.E.J., 43 urteko preso bizkaitarra. Arabako Salhaketak jakinarazi duenez, egunak ziren presoa bularreko minez kexu zela, eta behin baino gehiagotan egin zuen osasun-arreta jasotzeko eskakizuna. Familiak elkarteari jakinarazi dionez, hil aurretik, egun berean, erizaintzara joan zen. Arratsaldeko presoen zenbaketan, baina, ziegan etzanda aurkitu zuten hilotza.
Zendutakoaren familiak preso dagoen beste pertsona baten eskutik izan zuen senidearen heriotzaren berri, espetxeak ez baitzien gertatutakoaren berri eman. Salhaketak jakinarazi duenez, familiak hiriko ospitale guztietara deitu zuen, eta hori egin ostean lortu zuen espetxeko zuzendaritzarekin hitz egitea. Zentzu horretan, elkarteak salatu du sistematikoa dela espetxean ematen diren heriotzak ezkutatzeko joera eta senideekin komunikazio falta. "Zer komunikazio-mekanismo ditu Espetxe Zuzendaritzak bere hormen barruan gertatzen diren heriotzen berri emateko? Nola jakin dezakegu nor hiltzen den barruan? Familia-sarerik gabeko zenbat pertsona ahazten dira? Zeintzuk dira heriotza horien arrazoiak?", galdegin dute.
Barrote arteko enegarren heriotza hau kasu isolatu eta salbuespen izatetik urruti dagoela ere salatu nahi izan dute, eta espetxeak bere horretan osasuna kaltetzen duela azpimarratu. "Isolamendua, harreman-dinamikak, elikadura txarra, ingurunearekiko mendekotasun-harremanak... Estrukturalki, espetxeak bertan bizi direnen buru osasunean eta osasun fisikoan ondorio suntsitzaileak sortzen dituzten egiturak dira".
Neurriak hartzeko eskakizuna
Espetxeetan gertatzen diren heriotzak saihesteko zein neurri hartuko dituzten galdegin die Salhaketak Espainiako Gobernuari, Barne Ministerioari eta Espetxeetako Zuzendaritza Nagusiari. Elkarteak, bere aldetik, neurri zehatzak indarrean jar ditzaten eskatu du: "dagokion moduan" Ministerio Fiskalak espetxean ematen diren heriotzak ikertzea, heriotzak zigorgabe gera ez daitezen; espetxeetako zuzendaritzek senideei heriotzen berri ematea, era inpartzialean; heriotzengatik dagozkien kalte-ordainak erreklamatu ahal ditzaten, auzitegien aurrean hildakoaren familiari informazioa eta laguntza ematea; laguntza psiko-soziala senideen eskura jartzea; gaixotasun larriak dituzten presoak espetxetik ateratzea, baita buru gaixotasunak dituztenak ere, suizidioak eragozteko; eta zigor- eta espetxe- legeriaren erreforma, egungoak kondenak luzatzen dituelako, baita irteera-baimenak, hirugarren gradua eta baldintzapeko askatasuna eskuratzeko aukera murriztu ere.
Salhaketak Eusko Jaurlaritzari eta Legebiltzarrean ordezkaritza duten euskal alderdi politikoei ere egin die eskakizunik. Zehazki, A.E.J.-ren heriotzaren aurrean iritzia emateko eskatu die, hildakoa bere bizilekutik urrun dagoen espetxe batean hil den euskal herritarra den heinetik.
Presoa ziegan aurkitu dute hilik ostegun iluntzean. Eusko Jaurlaritzak esan du suizidio kasu baten aztarnak dituela. Gainera, Jaurlaritzak 2021ean espetxeen eskumena jaso zuenetik hiltzen den zazpigarren presoa da.
Ostiralean aurkitu zuten hilotz, “gaindosi” zantzuekin, Naiz-ek argitaratu duenez. Jaurlaritzak ez du heriotza baieztatu asteartera arte, eta autopsiaren emaitzen zain dagoela adierazi du. EAEko espetxeen eskumena hartu zuenetik espetxean hiltzen den seigarren presoa... [+]
Espetxeetako osasun zerbitzuaren gabeziez mintzatu da Libertad Francés Lecumberri, Salhaketa Nafarroa elkarteko koordinatzailea: “Osasun arloko langileak espetxeko logikekin eta irizpideekin kutsatzen direnean, zenbait eskubideren bermatzaile izan beharrean,... [+]
Kartzeletako funtzionarioen protestak aitzakiatzat hartuta, milaka preso erabat giltzapetuta eduki dituzte Kataluniako sei espetxetan.
Iragan astean Oroitz Herrero 26 urteko irundarra hilik aurkitu zuten Arabako Zaballa espetxeko bere ziegan. Eusko Jaurlaritzaren arabera “heriotza naturala” izan zen. Gaztearen senideek ARGIAri adierazi diote, ordea, Herrerori ez diotela arreta mediku egokirik eman... [+]
Eusko Jaurlaritzak espetxeen transferentzia bere gain hartu zuenetik, duela bi urte eskas, laugarren heriotza izan da euskal kartzeletan, hirugarrena Zaballako espetxean.
Salatu du larunbatean bere burua urkatu zuen presoari ez zitzaiola suizidioen aurkako protokoloa ezarri eta ziegan bakarrik zegoela, aurreko egunetan “ondo ez zegoela” adierazi bazuen ere. Azpimarratu du Jaurlaritzak espetxeen eskumena hartu zuenetik bere buruaz... [+]
Salhaketa Arabak eman du heriotzaren berri. Elkartearen arabera, 47 urteko jatorri hegoamerikarreko gizonezkoa da hildakoa, eta bere burua urkatu du. Jaurlaritzak espetxeen eskumena hartu zuenetik Arabako espetxean hiltzen den bigarren presoa da.
Maiatzean ekin zioten gose grebari 17 preso politikok. Haien eskubide kultural eta territorialak errespetatzea, lege antiterrorista bertan behera uztea, Lanaren Nazioarteko Erakundearen 169 hitzarmena onartzea eta preso politiko maputxeen askatasuna exijitu dituzte.
Pasa den larunbatean (hilak 22) hasi ziren presoen arteko borrokak Ekuadorko Guayaquil hiriko Litoral espetxean. Iturri ofizialek jakinarazi dute 31 preso hil direla, eta hamahiru zauritu –baita polizia bat ere–. Poliziak eta Armadak "kontrola" berreskuratu... [+]
Presoen arteko liskar batek eragin ditu hilketak, polizia iturrien arabera. Azken urteetan Honduraseko espetxe batean gertatu den ezbehar handienetarikoa da.
Preso dauden pertsonen artean portaera suizida areagotu egiten da, faktore psikologiko eta soziodemografikoengatik. Hego Euskal Herrian, 2023an, bi presok egin zuten beren buruaz beste astebetean. Orain gutxi, Eusko Jaurlaritzak “laguntzarako presoen” irudia... [+]
Iragan urteko Frantziako Estatuko presondegien bilanak egoera gordina utzi du agerian. Dominique Simonnot txostenaren arduradunak azpimarratu du kartzelak jendez gainezka direla, beren edukieraren %200eraino batzuetan. Gain populakuntza horri lotzen dizkiete baldintza oker... [+]
Garikoitz Etxeberria Goikoetxea preso lizartzarrak gose greba hasi zuen Zaballako espetxean apirilaren 19an, zelda partekatzera behatu eta uko egin zionean zigor bezala isolamenduan jarri zutela salatzeko. Orain, beste zazpi preso batu dira gose grebara elkartasunez.