Bi urteko geldialdiaren ostean, berriro abian jarri dituzue brigadak. Amaitu dira pandemiak sortutako zailtasunak?

Bi urteko geldialdia egin dugu ez zegoelako bidaiatzeko baldintzarik, baina helburu politikoek bere horretan jarraitzen dute. Areago esango nuke, azken aldian sortu den nazioarteko egoerarekin eta COVID-19 pandemia aitzakia gisa hartuta hartzen ari diren neurriak nondik doazen ikusita, inoiz baino beharrezkoago jotzen dugu lan hau egiten jarraitzea. 35 urte daramatzagu taldeak antolatu eta nazioarteko esperientzietatik ikasiz. Helburua, ahalik eta herri gehienengana heltzea da.

Zer dira brigadak?

Joan etorriko elkartasunean oinarritutako tresnak dira brigadak. Erabilgarriak dira eragile eta herri ezberdinentzat, adibidez, aliantzak egiteko. Brigadan atzerrira doanak beste herria ezagutzen du, eta aldi berean, gure herriaren errealitatea azaltzen du han. Borroka tresnak partekatzeko balio dute, baita kanpoan ikasitakoa Euskal Herrira ekartzeko ere. Askotan diogu, brigadisten lana batez ere bueltan hasten dela, bidaian ikasitakoa hemen zabalduz, bai parte hartzen duten eragileetan, herrian eta abar.

Aurkezpenean esan zenuten ez zoaztela turismo politikoa egitera, laguntzera edo irakaspen iraultzaileak ematera...

Hori da. Gure brigadetan joaten direnei argi uzten diegu ezin garela inora joan lezioak ematera, praktika paternalistak baztertu behar ditugula edo bidai hauen helburua ezin dela indibidualista izan. Brigadak tresna kolektiboak dira eta beraz, han ikasitakoa ere kolektibizatu behar da, kasu honetan Euskal Herriko askapen mugimenduari ekarpena eginez.

Zein lekutara bidali ohi dituzue brigadak?

Latinoamerikara joan izan gara, batez ere azken urteetako prozesuetatik asko daukagulako ikasteko. Ekialde Hurbiletik ere bai. Eta horrez gain, Euskal Herria Estatu Frantziar eta Espainiarraren menpe dagoenez, Europako beste herriekin aliantzak egiteko hautua ere egina dugu. Aurten beste brigadez gain, Herrialde Katalanetakoa, Italia hegoaldekoa eta Greziakoa antolatuko ditugu.

Latinoamerikan Venezuelako brigada antolatzen dugu hango iraultza bolibartarraren praktika ezagutzeko, batez ere komunetako esperientzia; Bolivian bertako prozesua ezagutzen dugu, hango herrien eta hizkuntzen aldeko borrokaren berri izateko; Argentina eta Uruguain langile boterea aztertzen dugu, batez ere lantegi okupatuetako esperientziekin eta Uruguain memoria historikoa, 1994an Filtroko gertakarien berri zuzenean jasoz; Brasilen nekazaritza mugimendua ezagutzen dugu, batez ere MST eta Florestan Fernandes eskola politikoan egiten duten lana. Ekialde Hurbilean Palestinara joaten gara hango gatazka politikoa ezagutzera.

35 urte dira Askapena sortu zela. Zer moduz zaudete mugimendu gisa?

Ondo. Lanean jarraitzen dugu ikusten dugulako beharrezkoa dela halako antolakunde bat Euskal Herrian, internazionalismoa landuko duena. 35 urteotako balorazioa egiten badugu, ezin da positiboa izan, baldintza objektiboak okertuz doazela ikusten baitugu. Langile klasea geroz eta esplotatuago dago, eta aliantzak sortzeko behar larria ikusten dugu. Duela urte batzuk Askapenaren aurkako epaiketa egin zuten Espainiako Auzitegi Nazionalean, 2010eko atxiloketen harira, saiatu ziren gu legez kanpo uzten, baina ez zuten lortu eta hemen jarraitzen dugu, esan genuen bezala, internazionalismoa lantzen.

Ukrainako gerra eta NATOren hedapena salatu dituzue...

Inperialismoak gerra behar du etekinak biltzen jarraitzeko, eta kaltea beti langile klaseak ordaintzen du. Bloke atlantistak, OTANen bidez, inperialismoa garatzen jarraitzen du. Gogoratu behar da Ukrainan sortu duten gerra 2014an hasi zela, Donbassen aurka. Guk erabakia dugu munduko hegemonia lehia horretan atlantismoaren jokabideak salatzen jarraituko dugula, baita Donbasseko egoera ere. Europar Batasunak ardura nagusia du eta kontzientzia lana egitea dagokigu, adieraziz zer den gertatzen ari dena, zein diren NATOren interesak eta zein den panorama alderdi politiko eta hedabideek kontatzen digutenetik harago.

Noiz arte dago irekita brigadetan izen-ematea?

Apirilaren 19an amaituko da epea. Informazio lortzeko brigadak@askapena.eus helbidera mezua idatzi. Euskal Herriko militante eta pertsona guztiei dei egiten diegu brigadetan parte har dezatela, Euskal Herria internazionalista eraikitzen laguntzeko, eta Euskal Herriaren alde antolatu eta borroka egitera animatzeko.