Espainiako Auzitegi Gorenak eskatutako suplikatorioaren alde bozkatu du Europarlamentuaren gehiengoak. Eurodiputatu izango dira aurrerantzean ere presidente ohiak eta bi kontseilari ohiak, baina Espainiak euroagindu eskariak aktibatu ahal izango ditu.
Espero zena baieztatu du asteartean Europako Parlamentuak. Carles Puigdemont, Toni Comin eta Clara Ponsatiren kontrako suplikatorioaren inguruko bozketa egin zuten astelehen arratsaldean, eta asteartean jakinarazi du ganberak onartu egin dutela. Aldeko 400 boto, aurkako 248 eta 45 abstentzio izan dira. Europarlamentari izateagatik, hiru politikariek izoztuta zituzten haien aurkako estradizio eskariak, baina asteleheneko bozketaren emaitzak aukera emango dio Espainiari horiek berriz aktibatzeko. Behin-behinean immunitatea galduko badute ere, Puigdemontek, Cominek eta Ponsatik ez diote utziko eurodiputatu izateari. David Sassoli ganberako presidenteak emaitzaren berri eman beharko dio lehenbailehen Espainiari, baina baita Belgikari eta Eskoziari ere —azken horri dagokio Ponsatiren kasua aztertzea—, horiek erantzun beharko bailiekete estradizio agindu posibleei.
Bozketaren emaitza orokorrean baino gehiago, suplikatorioaren aurkako boto kopuruan zuten begia jarrita hiru politikari independentistek. Ehun parlamentari inguruk kontra egingo zutela jakina zen, Europako Alderdi Berdeak —73 eurodiputatu— eta GUE/NGL Europako Ezker Batua - Ezker Berde Nordikoak —39 eurodiputatu— hala egingo zutela esana baitzuten. Aurka zituzten EPP Europako Alderdi Popularra, Europako Alderdi Sozialista, eta Europa Berritu taldeko liberalak. Hiru talde horien artean 459 eurodiputatu dituzte. Azken emaitzak erakusten du, ordea, hasieratik immunitatea kentzearen alde bozkatzeko jarrera hartu zuten taldeen barnean ere izan direla posizio desberdinak.
Hori zen independentisten itxaropen nagusia, immunitatea kentzearen aurkako botoa handitu zezakeelako horrek, eta emaitza orokorrari zilegitasuna kendu. Bozketa sekretua egin zuten, gainera, eta horrek talde berean boto desberdinak izateko aukera handiagotu zezakeela uste zuten. Hala gertatu zen, hein batean, Europako Parlamentuko Auzi Juridikoen Batzordearen bozketan. Aldeko hamabost boto, aurkako zortzi eta bi abstentzio izan ziren orduan, eta horrek esan nahi du legebiltzarreko hiru talde nagusietako diputatu batek baino gehiagok ez zuela bete bere taldeak jarritako irizpidea.
Helegitearen iragarpena, segidan
Emaitzaren berri izan eta gutxira egin du agerraldia Puigdemontek, parlamentuan bertan, eta aurrez hainbatetan errepikatutakoa berretsi du: suplikatorioaren auzia Europako Justizia Auzitegira eramango dutela. «Arrazoi politikoengatik Europako demokraziari eragin zaion minetik osatzeko modu bakarra da Luxenburgora jotzea», nabarmendu duenez. Helegitea prestatzen ari direla jakinarazi du.
Suplikatorioa bertan behera uzteko eskatuko dute, haren prozedura hutsegitez eta irregulartasunez betea izan dela uste baitute. Argudiotzat jarri izan dituzte Auzi Juridikoen Batzordeko presidentearen partzialtasuna, batzorde horretako kideek egindako filtrazioak, eta Clara Ponsati kontseilari ohiari egindako akusazioan izandako akatsak —diru publikoa bidegabe erabili izana leporatu zioten hasieran, nahiz eta Espainiako Auzitegi Gorenak sedizio delituagatik soilik epaitu nahi duen—. Luxenburgok horren inguruan ebatzi bitartean Puigdemont, Comin eta Ponsati babesteko neurriak ere eskatuko dituzte haien abokatuek, estradizio eskaririk egiten bada etenda gera daitezen.
Halaber, Puigdemontek aitortu du Pablo Llarena Espainiako Auzitegi Goreneko epaileak zer egingo duen begira ere badaudela. Izan ere, euroagindu eskariak egin aurretik, baliteke Llarenak beste urrats bat egitea aurretik. Epailearen asmoa da judizio aurreko eskaera bat egitea Europako Justizia Auzitegiari, auzitegiak argitu dezan zer irizpide hartzen diren kontuan euroaginduak onartzeko edo atzera botatzeko.
Gorenak Lluis Puig Kataluniako kontseilari ohia estraditatzeko egindako eskaria baztertu egin zuen Belgikako Justiziak, iazko udan, eta hori egiteko arrazoiak auzitan jarri nahi ditu Llarenak, orain immunitatea galdu duten hiru politikarien kasuan gauza bera gerta ez dadin. Epaileak Europako Justizia Auzitegiari galdera hori egingo balio, euroagindu eskaerak ezerezean geratuko lirateke, auzitegi horrek erantzun bitartean. Aurrekaririk gabeko egoera batean geratuko lirateke hiru politikariak: immunitatea galduta egongo lirateke, baina ezingo lituzkete Espainiaratu.
Llarenaren mugimendua «arriskatua» dela Espainiako esan zuen Gonzalo Boye buruzagi independentisten abokatuak iragan larunbatean, Nacio Digital agerkari digitalari emandako elkarrizketa batean. «Europako Justiziak ez dio arrazoia emango, ez duelako. Europak ebatzia eta itxia du gai hori. Oinarrizko eskubideak urratzeko arriskua dagoenean, euroaginduak gauzatu behar dituen estatuak —kasu honetan, Belgikak— martxan ez jartzeko obligazioa dauka». Boyek azaldu zuenez, Europako Justizia Auzitegiak emandako irizpideetan oinarritu dituzte buruzagi independentisten inguruan Belgikako epaitegiek hartutako erabakiak, Gorenak iradoki izan duenaren kontrara: «Gertaeren ordena desberdina izan da: lehenik Europako Auzitegi Gorena mintzatu izan da kasu askoren inguruan, eta, jurisprudentzia horretan oinarrituta egin du Belgikako Justiziak egin duena».
Espainiako Gobernua, zatituta
Suplikatorioari buruzko erabakiaren inguruan hitz egiten lehenengoetarikoa izan da Arancha Gonzalez Laya Espainiako Atzerri Ministroa, eta txalotu egin du bozketaren emaitza. Haren arabera, Europako Parlamentuak Espainiako Justizia babesten duela erakutsi du, eta mezu argi bat eman: «Kataluniako arazoak Espainian konpontzen dira». Espainiako legedia urratu duten eurodiputatuek ere justiziaren aurrean agertu behar dutela defendatu du, eta asteleheneko bozketaren emaitzak hori erakusten duela nabarmendu du, bestek beste.
Bide beretik jo du Adriana Lastra PSOEren Espainiako Kongresuko bozeramaileak. «Ondo iruditzen zaigu Europako Parlamentuak auzitegiei euren lana egiten uztea, hori baita, azken batean, suplikatorio bat», adierazi du. Bere alderdiak gobernuan aliatu duen alderdiaz galdetu diote hedabideek, eta Lastrak esan du ez duela ulertzen Unidas Podemosen jokabidea. «Haiek eman beharko dituzte azalpenak», azpimarratu du.
Asteleheneko bozketan bere alderdiak izandako jarrerari eutsi dio, aldiz, Aina Vidal Unidas Podemosek Espainiako Kongresuan duen bozeramaileak. Suplikatorioa «antzerki bat» dela esan du, Kataluniako gatazka judizializatzen jarraitzeko, eta elkarrizketarako deia egin die PSOEri eta Junts Per Catalunyari.
Elkarrizketa mahaiaren bestaldean ERC Esquerra Republicana dago oraingoz, eta baita gobernua Madrilen sostengatzen ere. Babes hori kentzearekin mehatxu egin du Gabriel Rufian ERCren Espainiako Kongresuko bozeramaileak, Espainiako Gobernuak suplikatorioaren erabakia goratu duelako. «Horrela jarraitzen badute, euren etxean ospatuko dute, eta ez Moncloan», ohartarazi du.
Zerbaiti edo norbaiti agur esatea abandonuarekin, amaierarekin eta, azken batean, dolu-prozesuarekin lotutako ekintza izan ohi da. Seguru noizbait esango zenutela –edo norbaiti entzungo zeniotela– “ez zaizkit agurrak gustatzen” esaldi tipiko eta topikoa... [+]
2017ko erreferendumaren harira, U-1aren auzi judizialean diru publikoa bidegabe erabiltzeagatik zigortutakoei ez zaie Amnistia Legea aplikatu behar, Espainiako Auzitegi Gorenaren esanetan. Puigdemonti ez ezik, Junqerasi, Romevari, Bassari eta Turulli ere eragiten die ebazpenak.
Tren geltoki bateko nasa, bi lagun eta besarkada bat. Besarkada hori izoztuta geratuko da hurrengoan elkartu arte. Ni etxera itzuliko naiz, bera hor geratuko da. Han geratuko da aske izanda ere injustiziak harrapatu nahi gaituelako sentimendu mingarria ere. Jesús... [+]
Telefono-konpainiek serieko gurasoen kontrola nahitaez sartu behar dutela arautu du Espainiako Gobernuaren lege berriak. Legea aurrerapausotzat jo du kooperatibak, baina azpimarratuta ez duela ezertarako balioko gazteek hezkuntza digital egokia jasotzen ez badute.
Setio egoeran bizi gara euskaldunok eta katalanak Espainiako Estatuan, eta gainera ez dugu horren kontzientzia argirik, uste dut. Katalunian hori oso nabarmena izan da azken hauteskundeetan eta ondorengo egoeran.
Benetan aztertzeko modukoa da gertatu dena: Espainiako botere... [+]
ERCk hamahiru parlamentari galdu ditu joan den igandeko hauteskundeetan eta barne krisia ate joka du. Pere Aragonés Generalitateko jarduneko lehendakariak dimisioa aurkeztu du dagoeneko eta lehen lerrotik erretiratuko dela iragarri du.
Katalunian ere hauteskundeak izan dira. “Emozioak, pragmatismoa eta xenofobia: Kataluniako hauteskundeen klabeak” titulatu zuen Público egunkariak. Ezkerra dabil pragmatiko eta kudeatzaile han ere, eta emozioak Junts-i lotuta aipatu zituzten. Baina... [+]
Itxura guztien arabera, PSCko Salvador Illa izango da Generalitateko hurrengo presidentea, norbait izatekotan. Bestela, hauteskundeak errepikatzeko aukera dago. Egungo presidente Pere Aragonés eta ERCk jaitsiera handia izan dute. Abstentzioa %41ekoa izan da.
Kataluniako Parlamentuko gehiengo independentistaren galerak eta hemizikloa eskuinerantz eta espainolismorantz biratzeak gobernagarritasuna zailtzen dute. Maiatzaren 30eko Espainiako Diputatuen Kongresuko osoko bilkurak, Amnistiaren Legea bozkatu behar duenak, eta ekainaren 9ko... [+]
Igande honetan egingo dira hauteskundeak Katalunian, maiatzaren 12an. Procésaren ondorenak eta Carles Puigdemonten balizko itzulerak estali ditu zenbait mintzagai. Baina abian dira bi proiektu erraldoi eta esanguratsu, biak ala biak turismoari estuki lotuak: Hard Rock... [+]
Gurean ere agerikoa den errealitatea islatzen dute Kataluniako datuek: guraso elkarteetan, eskolako bilera eta zereginetan, gurasoei zuzendutako tailerretan… emakumeak dira gehiengoa. “Haurrak heztearen funtzioa amek hartzen dute eta sentsazioa dute gainezka... [+]
Joan den azaroaren 6an Espainiako Auzitegi Nazionaleko Manuel García-Castellón epaileak hamabi pertsona auzipetu zituen Tsunami Democratikoa auzia dela eta. Ostegun honetan ezagutu zen hiruk atzerrira ihes egin dutela, tartean Jesús Rodríguez La... [+]
Orain Senatura bidean joango da legea, han PPk ahal duen neurrian atzeratuko du –bi bat hilabetez– eta gero berriz itzuliko da Espainiako Kongresura azken onarpena izan dezan.
Pere Aragonès Generalitateko presidenteak asteazken honetan aurreratu ditu Kataluniako hauteskunde autonomikoak, En Comú-rekin batera atera behar zituen 2024ko aurrekontuek porrot egin ondoren. Juntsek iragarri du bere hautagaia Carles Puigdemont izango dela; azken... [+]