Asteazkenerako agerraldi masiboa deitu dute Gasteizko Martxoak 3 plazan, “errepresiorik gabeko Martxoak 3 herrikoiaren alde”. Aske antolakundeak astelehenean egin du protesta, eta atxilotuei elkartasuna adierazi die. EH Bilduk eta Elkarrekin Podemosek azalpenak eskatu dizkiote Jaurlaritzari; Erkorekari ohartarazi diote ezin diola “bizkarrik eman” gertatutakoari, eta salatu dute Ertzaintzak “neurrigabe” jokatu zuela.
Martxoaren 3an Ertzaintzak bortizki kargatu zuen 1976ko martxoaren 3ko biktimen omenez Gasteizen urtero egiten den manifestazioan. Oldarraldi horri buruz azalpenak emateko eskatu dio EH Bilduk Josu Erkoreka Eusko Jaurlaritzako Segurtasun sailburuari, eta galdera sorta erregistratu du legebiltzarrean. Legebiltzarra deseginda dago, baina Julen Arzuaga EH Bilduko legebiltzarkideak argitu du diputazio iraunkorra martxan dagoela, eta Mahaiak erabaki behar duela galderak bideratu edo ez. Elkarrekin Podemosek ere “neurriz kanpoko” kargak salatu ditu, eta Arabako Batzar Nagusietan eskatu du ikerketa bat abiatzeko.
Arzuaga legebiltzarkideak ohartarazi du “saihestezina” dela Martxoak 3ko manifestazioan Ertzaintzaren oldarraldiaren argipenak ematea, “interpelazio publiko bat” dagoelako, batik bat. Batetik, Ertzaintzak manifestazioan infiltratutako polizien egitekoari buruz galdegin du, eta ea horiek piztu zuten Brigada Mugikorraren erasoa. Bestetik, jaurtigaien erabilerari buruz galdetu du: foam jaurtigaien erabileraren ondorioak argitzeko eskatu du, eta ea legez kanpoko gomazko pilotak erabili dituzten, Gedar kazetak eta Jardun koordinakundeak salatu bezala. Gainera, zauritutako ertzainen mediku txostenak eskatu dituzte, Segurtasun Sailaren arabera zazpi polizia zauritu baitziren. Asteartean Erkorekak agerraldia egingo du gobernu bileraren ostean, ikusteke dago ea Martxoak 3ko gertaeren inguruan hitz egingo duen.
Segurtasun Sailari kargu hartu diote Ertzaintzaren azken asteetako jokabidearen gainean: “Lehenago Tolosan, gero Anoetan eta San Mamesen, orain Gasteizen. Hau al da proportzionaltasuna eta operatibo polizialaren kongruentzia? Hau da segurtasunaren gobernantza normalizatua?”, kritikatu du Arzuagak. Arkaitz Rodriguez Sortuko idazkari nagusiak salatu du ez duela “ezerk” justifikatzen Martxoak 3koa bezalako “jokabide eta bortizkeria polizialik”: “Premiazkoa da Ertzaintzaren depurazioa eta polizia-ereduaren erreforma sakona”, zehaztu du.
Martxoak 3ko manifestazioa antolatu zuten ELA, LAB, ESK eta Steilas sindikatuek eta Martxoak 3 elkarteak Ertzaintzaren portaera salatu dute, eta agerraldi masiboa deitu dute asteazkenerako, 18:00etan Martxoak 3ko monolitoaren aurrean. Martxoak 3 herrikoiaren alde, errepresiorik gabe lelopean protestara batzeko deia egin diete herritarrei. Antolatzaileek salatu dute Ertzaintzak “neurriz kanpoko dispositiboa” jarri zuela: “Karga guztiz basatiak egin dituzte, ez bakarrik borrekin eta dozenaka foam pilotekin, polizi furgoiekin ere oldartu dira manifestarien aurka”.
Aske antolakundeak ere errepresioa salatzeko protesta egin du astelehenean, Atxilotuekin elkartasuna lelopean. Izan ere, igandeko istiluetan lau gizon atxilotu zituela baieztatu zuen Segurtasun Sailak, eta desordena publikoak eta agintaritzaren aurkako atentatua leporatu dizkietela. Igande arratsaldean askatu zituzten atxilotuak, karguekin. Aske antolakundeak elkarretaratzean atxilotutakoei elkartasuna adierazi die, eta azpimarratu du igandekoa ez dela “kasu isolatu bat”: “Egituraz sistema kapitalistan poliziak betetzen duen funtzio sozialari erantzuten diote igandeko gertakariek”. Halaber, Askek gogorarazi du Martxoak 3ko irudiek frogatzen dutela “Euskal Herri Langilearen zapalkuntzak bere horretan” dirauela, baita errepresioak ere. Horren aurrean antolatzeko deia zabaldu du.
Azken astean ezagutarazi moduan, Eusko Jaurlaritzaren Balorazio Batzordeak txosten banatan aitortu ditu estatuaren biktima gisa. Justizia sailburuak ekitaldi pribatu banatan entregatu dizkie dokumentuak.
Rosa Zarra Ertzaintzaren pilotakada baten ondorioz hil zela da Eusko Jaurlaritzako Poliziaren Biktimen Balorazio Batzordeak atera duen ondorioa, Berria-k jakinarazi duenez. Orain arte, Ertzaintzak beti egin dio uko bertsio horri, eta Rosa Zarra berak zuen gaixotasunaren ondorioz... [+]
Ustez, lokalaren jabetza eskuratu dutenek bidali dituzte sarrailagileak sarraila aldatzera; Ertzaintzak babestuta aritu dira hori egiten. Birundak epaiketa bat irabazi du duela gutxi.
Ertzaintzak martxoaren 13an Bilbon zauritutako bi pertsonaren testigantza jaso ditugu. Athleticen partidaren ostean larriki zauritu zituzten aita-semeak, borra-kolpeka, eta atxilo eraman zuten haietako bat. Furgonetatik ikusi zuen ertzainek nola egin zuten tiro jendearen kontra,... [+]
ERNE, ESAN eta SIPErekin egin du akordioa Eusko Jaurlaritzak 2025-2028 aldirako. Besteak beste, urteko soldatan 4.200 euro gordineko igoera "graduala" izango du ertzain bakoitzak. Sindikatuen iturriek El Diario Vascori azaldu diotenez, akordioarekin Ertzaintza Espainiako... [+]
49 urte eta gero Espainiako Poliziak Gasteizko Maria Sortzez Garbiaren katedralean eraildako bost langileak oroitu dituzte beste behin astelehen arratsaldean. Milaka pertsona batu dira Zaramagatik abiatutako eta katedralean amaitutako manifestazioan. Manifestari guztiek ez dute... [+]
.jpg)
31 urteko emakume kolonbiarra osasun zentrora eraman ordez ertzain etxera eramatean agenteek "akatsa" egin zutela aitortu du Segurtasun sailburuak, baina azpimarratu du ez zuela "jipoirik" jaso.
.jpg)
Karen Daniela Ágredok dioenez, zortzi bat ordu eman zituen ziegako zoruan etzanda Ertzaintzak ospitalera eraman aurretik. Segurtasun sailburu Bingen Zupiriak berak eskatu du Eusko Legebiltzarrean agerraldia egitea.
Karen Daniela Ágredok dioenez, atxilotu zutenean berak ez zuen ertzainik zauritu, haiek lurrera bota zuten eta konortea galdu zuen. Ondoren, Ertzaintzaren komisariaren zoruan iratzartu zen eta handik ospitalera eraman zuten.
Salburuako futbol kantxetan polizia-operazio planifikatu bat egin zuen igandean Ertzaintzak, eta Gasteizko GKSk nahiz Gasteiz Antirrazista eragileek salatu dutenez, bertan zeuden pertsona ugari identifikatu, miatu eta kolpatu zituzten.
Segurtasun sailburu Bingen Zupiriak adierazi du oraingoz ez dutela neurririk hartuko kasuaren inguruan, "gauzak ondo edo gaizki egin izanaren inguruko segurtasun edo ziurtasunik" ez duten bitartean. Ertzaintzaren agenteek eraso egin zioten emakumea "indarrik... [+]
Emakumearen familiako kideek jarri dute salaketa Bilboko Kolonbiaren kontsulatuan. Otsailaren 1ean jasan zuen erasoa, Donostiako Manterola kaleko diskoteka baten atarian. Hainbat testigantzen arabera, konorterik gabe egon arren berari kolpeka jarraitu zuen ertzain batek.
Gipuzkoako Fiskaltzak sei urteko espetxe-zigorra ezarri nahi dio Donostiako Herritarren Babeseko patruiletako buruari. Ertzainak kokainaren truke prozesu judizialean onurak eskaini zizkion droga trafikatzea egotzita atxilotutako gizon bati.
Eusko Jaurlaritzak isunak kendu dizkie ertzainei euskaraz hitz egiteagatik zigortuak izan ziren Donostiako herritarrei. Manex Ralla eta Amaia Abendaño dira herritar horiek, isunak kendu dizkietela baieztatu diote hedabide honi.
Polizia ez zegoen lanean ustezko gertakaria jazo zenean.
