Autonomo faltsuen lan eredua aldatuko duela esan du Glovok, jabea epaitua izan baino egun bat lehenago
Sei urteko espetxe zigorra ezar diezaiokete Oscar Pierreri langileen eskubideen aurkako hainbat delituengatik. Epaiketa asteartean izan da Bartzelonan, eta astelehenean iragarri du legearen pean kontratatuko dituela 15.000 rider. CGT sindikatuak “fiskaltzaren aurrean aurpegia zuritzeko” erabili duela salatu du.
Hainbat urtez legea betetzeari entzungor egin ostean, Glovo enpresaren sortzaile Oscar Pierrek 15.000 rider kontratatuko dituela adierazi du, orain arte erabili duen autonomo faltsuen eredua alde batera utzita. Langileen eskubideen aurkako delitua leporatuta epaitua izan baino egun bat lehenago iragarri du erregularizazioa, eta asteartean epailearen aurrean esan duenez, erabakiak “bake soziala” eta Lan Ikuskaritzarekin “eztabaida” berriak saihestea ditu helburu, nahiz eta hartutako erabakia abian duen auzi penaletik banandu.
Akusazio partikularra CGT sindikatua da eta jakinarazi du Glovok legea urratzeagatik Lan Ikuskaritzaren zenbait ikuskapen; langileen datuak espiatzeagatik eta datuen babes legea ez betetzeagatik hainbat zigor; eta legea urratzen jarraitzeagatik epaiketa penala dituela. Hala, Pierreren erregularizazioa “fiskaltzaren aurrean aurpegia zuritzeko” erabili duela dio sindikatuak.
440 eta 770 milioi euro arteko isun-kumulua
Kontratu berriek 100 milioi euroko eragina izango du enpresan, eta horri 500 milioi baino gehiago gehitu behar zaizkio, isunengatik, BEZagatik eta Gizarte Segurantzari atzeratutako kotizazioengatik.
Isuna orotara 440 eta 770 milioi euro artekoa dela dio zenbait adituk, baina Glovok helegitea aurkeztu du eta oraingoz ez du ordainduko. Aldi berean, banatzaileak enplegatu gisa kontratatuak dituen Just Eat enpresak 295 milioi euro eskatzen dizkio Glovori lehia desleialagatik.
2021eko Rider Legea
Banatzaileen eskubideak “ezabatzea” egotzi dio fiskaltzak Pierreri. Sei urteko espetxe-zigorra ezar diezaiokete 2020an Auzitegi Gorenak ilegaltzat jo ostean, Glovok autonomo faltsuen lan ereduari eutsi ziola egiaztatzen duten zantzu nahikorik egonez gero.
Espainiako Gobernuak 2021ean onartu zuen autonomo faltsuen sistema amaitzeko Rider Legea deiturikoa, baina Glovok errefusatu, eta Lanak salaketa penala aurkeztu zuen. Hala, Gorenaren epaiaren ostean banatzaileak autonomo gisa mantentzea “zilegi” zela esan du Pierrek asteartean epaiketan. Zuzendariaren defentsak azaldu du rider-en lan-baldintzak aldatu zituela orduan, Gorenak ezarritako baldintzetara egokituta, banatzaileak autonomo gisa mantentzeko.
Orain rider asko lanik gabe geratzeko beldur da. Izan ere, autonomo faltsuen sistemak egoera irregularrean zeuden migratzaileak esplotatzeko aukera ematen zuen. CGTk gogorarazi du Glovoko rider-ek autonomo faltsu gisa ordaindutako kotizazioak eskatu ahal izango dizkiotela estatuari.
Frantziako Estatua eta Alemania izan dira aurka kokatu diren estatu bakarrak. Direktibaren lanketa 2021eko abenduan abiatu zuen Europak, baina trabak eta presioak tarteko, hiru urte baino gehiago behar izan ditu onespenak. Europako Parlamentuak bozketa berrestea falta da.
Glovo, Just Eat eta Uber Eatseko janari banatzaileen %70-75ak paperik gabe lan egiten du EAEn, El Salto hedabideak Journalismfund Europe-rekin elkarlanean egindako ikerketa-erreportajearen arabera. Horrek asegururik gabe uzten ditu langileak lanean lesioren bat izanez gero.
Langileak espiatzeaz gain, ikerketa batek ondorioztatu du enpresaren app-ak datu pertsonalak eta geolokalizazioak bidaltzen dituela.
Nafarroako Sozial Arloko 1. Epaitegiak atzera bota du Glovok 2022ko azaroko epaiari jarritako helegitea. Helegitearekin, Glovok banatzaileak ez direla haren enplegatu berretsi nahi zuen.
Ziclo-P kooperatibako kide Leire Rodriguez Metropoli Forala saioan izan dugu hiri garraiobide jasangarriaz, solasean. Bizikleta erabiltzen dute haien banaketa lana egiteko.
Glovo eta haren gisako enpresek langileak autonomo gisa kontratatzen dituzte, oinarrizko langile eskubideak urratuz. Errealitate hori borrokatzen dabil Euskal Herrian LAB, eta fiskaltzak lekuko gisa deklaratzera deiturik, ostegun honetan sindikatuaren ordezkaritza bat egonen da... [+]
Gizarte Segurantzak ofizioz jarritako demandari erantzun dio Iruñeko lan arloko epaitegiak eta arrazoia eman: 2018ko abuztutik 2019ko urrira Glovorentzat lan egin duten 207 banatzaileen kotizazioak ordaindu beharko dizkio enpresak, soldatapeko langileak zirelako, ez... [+]
LABeko koordinatzaile nagusi Garbiñe Aranburuk prentsaurrekoan iragarri du Glovoko langileen erregularizaziorako urrats berri bat emango dutela. Zehazki, sindikatuak gatazka kolektibo bat planteatuko duela jakinarazi du, langile horiei Ostalaritzako Hitzarmen kolektiboa... [+]