Azkoitiko Udalak ekainaren 4an bilduko du Lurraldea Batzordea eta bigarrenez elkartuko dira astebetera, ekainaren 11n, erresoluzioa onartzeko. Horren ostean "Azkarateko eta Ipintzako plantak ez ahalbidetzeko dagokion tramitazioari ekingo zaio", Udalak jakinarazi duenez.

Bilera irekian herriko eragile ezberdinen iritziak

Maiatzaren 28an Azkoitiko Elkargunean elkartu ziren Iobeko teknikariak, Baskegur, Larke 360 SL (hondakindegia egin nahi duen enpresa), Lagunak eskabazio enpresa (herrian beste hondakin planta bat egin nahi duen enpresa), alderdi politikoetako ordezkariak, arau subsidiarioak idatzi dituen lantaldeko kidea, Urola Bizirik Natur Taldea, Azkarate Garbi auzotarren eta herritarren plataformak eta Gurasos.

Azkoitiko eraikuntza inguruko gremioek bi gutun atera zituzten (hemen lehenengoa), eta bigarren gutunak agerian utzi zuen bilera irekira gremioren bat joaten bazen, bere izenean hitz egingo zuela, ez dutela talde bat osatzen. Azkenean bilera irekian ez zuten gremioetako kideek parte hartu. Badirudi Udalari Azkarateko hondakin plantaren beharra argudiatu ahal izatea zaildu diola gremioen izena erabili ezin izateak.

Bilera osorik ikusentzungai dago bideo honetan.

EH Bildu: "Ez dago Azkoitian horrelako planta baten beharrik"

Iobeko teknikariek emandako datuen arabera, EAEn eraikin eta eraispen hondakinen (EEH) 60 planta daude gaur egun eta Lurralde Plangintza eta Etxebizitzako sailburuak martxoaren 4an argitaratu zuen aginduan dioenez, gaur egun tratamendu-instalazio finkoetan nahikoa gaitasun dago EAEn sortzen diren EEH guztiak balorizatzeko. EH Bilduk nabarmendu duenez, "beraz, ez dago Azkoitian horrelako planta baten beharrik, ez Azkaraten eta ez Ipintzan. Egin behar dena da 60 planta horiek identifikatu eta ahalik eta era eraginkorrenean funtzionatzea ahalbidetzea, beharrezko kontrolak ezarriz". Bere proposamena Azkarateko planta "Arau Subsidiarioen aldaketatik ateratzea eta Azkoitiko Hiri antolaketako Plan Orokorra egitea da". Herriko Arau Subsidiarioak zaharkituta daudela dio, "lur industrialaren %80 agortuta baitago".

Azkoitia Bai: "Tarteko biltegi txiki baten eraikuntza aztertzeko prest gaude"

Azkoitia Bai taldeak Maxixatzen hedabidean kaleratu du bilera irekiaz ondorengo bere jarrera. Berak ere dio "datuen arabera inguruan balorizazio nahikoa planta dagoela kontutan hartuta, gure taldeak Arau Subsidiarioetatik horrelako plantak egitea ahalbidetzen duten puntuak ezabatzea eskatuko dugu udaletxean". Baina gehitu du "obra handia denean, legeak balorizazio planta batera eraman aurretik, higiene eta segurtasun neurriak bermatzen dituen bilketa parke bat eraikitzea ahalbidetzen du, hori bai, lanorduz kanpo estali daitekeen edukiontziz osatua. Gaur egun, gremioen hitzak erabiliz, legez kanpoko isurketa asko egiten dutela garbi azaldu digute. Gure herriko bilketa parkea Izarre Jandalon dagoela dirudi, baina ez du inondik inora legeak eskatzen duena bermatzen. Hori bai, gure taldeak birziklatzea sustatu nahirik eta isurketa klandestinoak ekiditeko, tarteko biltegi txiki baten eraikuntza aztertzeko prest egongo litzateke. Kamioi bat osatu orduko, planta horietara bideratu eta bakoitzak eraman dituen kiloen arabera ordainduz. Gremioak eta udaletxeak, elkarlanean, benetako beharretara egokitutako biltegi hori diseinatuz. Bete beharreko legedia betez eta beste alderdien, plataformen eta ekologisten oniritzia dagoenean Arau Subsidiario berriak idatzi beharko genituzke".