Greenpeacek kanpaina berri bat abiatu du salatzeko Ecoembes –Espainiako Estatuan udal eta mankomunitateek gaika bildutako plastiko eta ontzi-jendea ustez birziklatzen duen enpresa– gezurretan ari dela. Erakunde ekologistaren arabera, ez da egia gaika bildutako plastikoen %75 birziklatzen dutenik; aitzitik, %25 baino gehiago ez du birziklatzen, gainerakoa bidaliz edo zabortegietan lurperatzera edo erraustegietan kiskaltzera edo herrialde txiroetara.
Hilabetean bigarren aldiz entzun da salaketa publiko gogorra Espainiako Ecoembes patronalaren kontra. Irailean Ecoembes "Ardi-larruz jantzitako otsoa" dela erakutsi zuen Changing Markets fundazioak "Talking Trash" txostenarekin. Orain Greenpeacek ekin dio #EcoembesMiente kanpainari, herritarrak animatuz erakundeari bere gezurrak aurpegiratu diezazkioten.
"Ecoembesek –dio Greenpeacek– bere burua agertzen du ontziak birziklatuz ingurumena zaintzen duen itxurak eginez. Baina gure ikerketarekin erakutsi dugunez, gezurretan ari da. Diote gaika bildutako plastikoen %75 birziklatzen dutela, baina ez dute horien %25 baino gehiago birziklatzen, gainerakoa bidaltzen dute edo zabortegietan lurperatzera edo erraustegietan kiskaltzera edo herrialde txiroetara. Baina zer espero genezake merkatuko enpresarik kutsatzaileenek osatutako erakunde batengandik? Mercadona, Nestlé, Carrefour, Pescanova, Coca Cola edo Bimbo dira Ecoembes logoaren gerizpean ezkutatzen diren izenetako batzuk. Horiei mozorroa kentzeko ordua da eta zuk lagundu dezakezu hori lortzen".
Ecoembes Miente txostenean Greenpeacek erakutsi duenez, deigarria da nola azken 18 urteotan, alde batetik mundu osoa bezala Espainiako Estatua ere plastikoz gainez egiteraino betetzen zen bitartean, bere aldetik Ecoembesek bostez biderkatu dituen bere diru sarrerak: 2018ko urtean 578 milioi euro. Dirutza hori bereganatu du nagusiki (%90) ontziak birziklagarriak direla adierazten duen puntu berdea delakoa eramateagatik produktu bakoitzak ordaindutako kanonetik eta gainerakoa herritarrek gaika entregatutako materialen arteko batzuen salmentatik. Beraz, Greenpeaceren analisian, Ecoembesek "kudeatzen ditu hainbeste milioika euro irabazitakoak ez birziklatutako ontzietatik (nahiz eta horretarako sortu zen), baizik eta kontsumitutako ontzi eta azaletatik".
Ecoembeseko administrazio kontseiluko kideek soldata estratosferikoak dauzkate: Espainiako erregeak urtean 242.769 euro kobratzen baditu eta lehen ministroak 82.978, konpainiako buruzagietako bakoitzak 211.000 euro kobratzen ditu. Eta hori soilik Ecoembeseko karguari dagozkionak, zeren eta postu horretan dago multinazional edo konpainia handi bateko goi-kargu den neurrian.
Birziklatzaile famaz beztitu nahi duen Ecoembes funtsean osatzen dute batetik plastiko, ontzi eta bestelako estalgarriak gehien merkaturatzen dituzten konpainia handiek (Bimbo, Danone, Nestle, Unilever, Johnson, Coca-Cola...), ontzion ekoizle nagusiek (Ecoacero, TetraPack...) eta komertzio sare nagusiek (El Corte Ingles, Eroski, Carrefour, Dia, Mercadona...).
Ontzi-jendez osatutako kutsadura sortu eta merkaturatzen duten konpainiok Ecoembes bidez kontrolatzen dute horien ustezko birziklatzea. Kontua da kobratzen dutela... ez birziklatzeagatik. Hasteko, haien ardura izan beharko lukeen arren, udalen esku uzten dituzte edukiontzi horietatik kanpo jaurtitako ontzi eta plastiko guztiak bildu eta tratamendu plantetara eramateko gastuak, urtean 30 milioi euro baino gehiago. Baina, gainera, edukiontzi horira bota behar diren ontzien ia erdiak ezin birziklatuak dira. 10 zentimetro baino gutxiagoko diametroko ontziak (yogurt poteak...) eta PET botila koloredunak, esaterako, ez dira birziklatzen. Edarietarako ontzirik erabilienetakoa bihurtu den TetraPack famatua birziklagarritzat saldu arren %25 uzten du zabortegirako, kartoia birziklatu ostean geratzen den polietileno eta aluminiozko osagaia.
Baina are eskandalagarriagoa da zer gertatzen den edukiontzi horian bildutako materialekin: Ecoembesek saltzen dizkie konpainia birziklatzaile homologatuei eta soilik horrekin birziklatutzat kontabilizatzen dute estatistiketan. Hala al da errealitatean? Ez, Greenpeacek salatu duenez. Plastikoetako batzuk (PEAD eta PET motakoak) saltzea lortzen dute errazago birziklatzen direlako baina beste batzuk (plastikozko film, zorro eta abarrak) norabait eraman ditzaten pagatu egin behar izaten die Ecoembesek birziklatzaileoi. Eta hor galtzen da hondakinon arrastoa. Greenpeacek erakutsi duenez, horietatik batzuk doaz zabortegietara, beste asko erraustegietara, batzuk zabortegi klandestinoetara eta beste asko Asia eta Afrikara, han birziklatzera bidaltzeko aitzakiarekin lurperatu ditzaten.
Ecoembesen monopolioaren babesean gertatzen da hori guztia eta gehiago, zeren eta birziklatze planta klandestinoak, legezko plantetan gertatzen diren suteak ere gertatzen baitira denen bistan eta inoren erreakzio handirik gabe. Horren esplikazioa egon daiteke, dio Greenpeacek, Ecoembesek egiten duen greenwashing-ean, hots, komunikazio estrategian: "Ecoembesek bere inperioari eutsi eta bere kudeaketa sistema defenditzeko egiten duen lobby lana oso handia da. Ecoembesek finantzatzen ditu unibertsitateko katedrak, egunkariak, irratiak, erakundeak eta publizitate kanpainak. Ingurumen atalak patrozinatzen dizkie El Pais, Público, El Mundo edo ElDiario.es egunkariei, baita Cadena SER irratiari ere".
Ororen buru, gogoraraziz ontzientzako alternatibarik egokiena dela ontziak itzultzeko sistema (SDDR gaztelaniazko sigletan), Greenpeacek Ecoembesi eskatzen dio bere gain har dezala beraiek merkaturatutako ontzi eta azal guzti-guztien birziklatzearen kostua –ez soilik edukiontzi horian lagatakoena– eta puntu berdea delakoarekin bildutako dirutzaren kudeaketa utz dezala udalen eta mankomunitateen eskuetan. Administrazioari eskatzen dio ez dezala onartu birziklagarria ez den inongo ontziren komertzializatzea eta hondakinen zirkuitu osoa hobeto kontrola dezala. Eta herritarrei eskatzen die jarrai dezatela ontzi arinak txukun uzten edukiontzi horietan eta uko egin diezaietela erabilera bakarreko estalki eta ontziei.
Nafarroako Ecofert Sansoain enpresa itxita dago 20.000 tona hondakin toxiko legez kanpo jasotzeagatik Zubietako (Gipuzkoa) erraustegitik eta Tuterako (Nafarroa) Oleofat enpresatik.
Artaxoako Ecofert enpresara baimendu gabeko hondakinak eramateagatik, Zubietako Ekondakin enpresari zigor-espedientea abian jartzeko eskatu dio Nafarroako Gobernuak Eusko Jaurlaritzako Ingurumen Sailari. Jose Maria Aierdi Nafarroako Ingurumen kontseilariak jakinarazi duenez,... [+]
Maiatzaren 18an, larunbatez, Zubietako Erraustegiaren aurkako martxa antolatu du Erraustegiaren Aurkako Mugimenduak (EAM). Lasarte-Oriatik abiatuko da, Okendo plazatik 11:00etan.
2022an errekor historikoa hautsi zen Espainiako Estatuan, ia 8.700 milioi litro ontziratu baitziren, Geologia eta Meatzaritza Institutuaren estatistikaren arabera. Aurreko urtean baino 580 milioi gehiago dira horiek, eta 2019an ezarritako mugarria baino % 4,8 gehiago.
Sektoreko enpresek hamarkadak daramatzate praktika sustatzen, nahiz eta ebidentziak izan ez dela bideragarria, Center for Climate Integrity-ren ikerketa baten arabera.
Zaldibar Argitu plataformak ekitaldia egin du igandean. Ez dago berririk “euskal oasian”, adierazi dute, “Eusko Jaurlaritzak dena ondo egin zuela errepikatu zuen”.
Bilboko Auzo Elkarteen Federazioak komunikatu bat eskaini du Gipuzkoako erraustegiko lixibiatuak Zorrotzara bidaltzeko asmoaren inguruan.
Artaxoako konpostatze plantara Gipuzkoatik Nafarroara bidalitako lixibiatuek Nafarroako Gobernuko eta Gipuzkoako Diputazioaren arteko hika-mika piztu dute. Ostegun honetan Jose María Aierdi kontseilari nafarrak gaitzetsi egin ditu atzo José Ignacio Asensio diputatu... [+]
Bi urtean 5.000 tona lixibiatu baino gehiago prozesatu ditu Ecofert Sansoain enpresak
Baionako Auzitegiak ezarri duenez, Basusarrin dagoen Etcheverry-Mindurri enpresak 150.000 euroko isuna ordaindu beharko du, eta Donibane Lohizuneko CBA Artolak 100.000 eurokoa.
Elkarrekin-Podemos taldeak informazioa eskatu du Eusko Legebiltzarrean, Lemoako Bistibietako zabortegian egon daitekeen hondakinen inguruan. Ekologistek sarritan salatu dute bertan gorde zituztela 2002an hondoratutako Prestige petroliontziak askatu eta euskal arrantzaleek itsaso... [+]
Abenduaren 16an Mendigorriako Biomendi txerri granja eta biometanizazio instalakuntzan elkarretaratzea egin du Nafarroako Makroetxaldeen Aurkako Plataformak. Bertan salatu du Biomendin 2022an 80.000 tona hondakin industrial-organiko tratatu zituztela, soilik 33.000 tonarentzako... [+]
EH Bilduk salatu du Jaurlaritza ez dela Hondakinak Prebenitzeko eta Kudeatzeko Plana betetzen ari. Azalpenak eskatu dizkio Arantxa Tapia Ekonomiaren Garapen eta Ingurumen sailburuari, argitu dezan zein den guztira EAEk esportatzen dituen hondakin kopurua eta zer neurri hartuko... [+]