Desazkundea Ikertzeko Institutua (Institutet För Nerväxtstudier suedieraz) elkarteak biltzen ditu akademikoak, ikasleak eta ekintzaileak herrialde nordikoetan eta mundu osoan desazkundeari buruzko eztabaidak berotzeko.

Malmöko Nazioarteko 6. Biltzar nagusiak beste bi batzar ‘biki’ edukiko ditu aurten: Mexiko hiriburuan irailaren 4tik 6ra bata eta Bruselan Europako Legebiltzarrak daukan egoitzan bete irailaren 18 eta 19an.

“Garai nahasietako elkarrizketak” titulua zergatik? Antolatzaileek argudiatzen dutenez, krisi ekologiko, sozial eta ekonomikoa elkarri lotuak egotea desazkundearen aldeko mugimenduak aspalditik esana daukan arren, justu garaiotan ari da denen begien bistan agertzen: gerren ugaritzea batik bat Ekialde Hurbilean, klimaren aldaketak azkartzen ari dela dioten azterketa berriak, migrazio masiboak… Hori gutxi balitz, itxuraz egonkorragoa zirudien Mendebaldean ere aldaketa dramatikoak ari dira gertatzen, Brexitarekin, AEBetako azken hauteskundeekin eta abar.

“Horregatik diogu garai nahasietan bizi garela, larritasun, segurtasunik ez eta beldurrez betetako garaietan. Txanponaren beste aldea, ordea, da ugaritzen ari direla antolaketa modu berriak, mundu mailako solidaritatea eta adorea eta handitu egin dela eraldaketarako ahalmena ere desazkundeak defenditzen duen moduan uztartuz iraunkortasun ekologikoa, justizia soziala eta gizakiaren aurrerapena. Potentzialitate hori mamitu dadin mundu mailako elkarrizketak behar dira, eskualde geografiko eta ikuspegi ezberdinen artean. Bai mundu akademikoan eta bai ekintzaileen testuinguruan, desazkundearentzako hil ala bizikoa da pentsakera eskola eta eraldaketa mugimendu ezberdinen arteko elkarrizketa antolatzea”.

Egunotan Malmön desazkundearen hainbat aurpegi erakusten ari da biltzarra. Egitarauan, alde batetik hitzaldi eta mahai inguru akademikoek osatu dute hezurdura, baina horien inguruan badira gaiari lotutako zine, antzerki eta kontzertuak, mundu osotik iritsitako elkarte eta ekintzaileen erakustazoka, munduko elikadura eta sukaldatze erakusketa, desazkunde ekintzen agertokia, eta abar.