Zer irakurketa egiten du GKS-k osasun ziurtagiriari buruz eta zergatik deitu dituzue elkarretaratzeak?

Guretzat COVID ziurtagiria ez da izurriteari benetako aterabide bat emateko osasun neurri bat, baizik, segregazioan, kontrol sozialean, oinarrizko eskubideen urraketan eta jazarpen polizialean sakontzeko neurri bat.

Gure ustez, aztertu beharreko gaia koronabirusari aurre egiteko kudeaketa eredua da. Kudeaketa eredu burgesa ari da aplikatzen hasieratik, eta neurri hau kudeaketa horren parte da.

Zer ondorio sortzen dituen ikusita, salaketa egitea erabaki dugu EAEko hiru hiriburuetan. Lehenagotik Ipar Euskal Herrian egin izan dugu, eta Nafarroan ere bai.

Zergatik diozue kudeaketa eredu hau burgesa dela?

Uste dugu koronabirusari aurre egiteko ezinbestekoa dela osasun baliabideak indartzea. Baina ikusten dugu baliabide horiek muga dutela gizarte kapitalista batean. Gizarte hau krisian dago eta ikusten ari gara diru partidak esparru estrategikoetara bideratzen ari direla, gehienbat esparru produktiboetara. Dirua jartzen dutenak enpresario handiak eta oligarkiaren instituzioak dira. Horrek baliabideetan erabateko limitea jartzen du, dakigun bezala, diru hori ez delako inbertituko osasungintza unibertsala eraikitzeko.

Testuinguru horretan, koronabirusari aurre egiteko neurriak eskubideen urraketetan oinarritutakoak direla ikusten ari gara: konfinamenduak, etxeratze aginduak, itxiera perimetralak... Orain COVID pasea jartzea eta horrekin batera datorren kriminalizazioa, jazarpenak, isunak... Horregatik diogu aterabide poliziala ematen ari zaiola. Hori guztia horrela egin dadin interesatuta daudenak ez dira pobreenak eta hau guztia gehien sufritzen ari direnak; boterea beren eskuetan dutenak baizik.

Koronabirusaren kudeaketa burges honekin batera pobretze orokortua bultzatzen ari da eta askatasunak desagertzen ari dira, eta gizartea hori guztia normalizatzen ari da. Pobrezia orokortzearen kausa une honetan egiten ari diren ofentsiba ekonomiko bat da, pobrezia ez baita besterik gabe fenomeno natural moduan sortzen.

Etorkizunera begira normalizatzen ari gara halako gizarte eredu bat, zeinetan eskubide gutxiago egongo diren, jendeak mobilizatzeko eta mugikortasunerako gaitasun gutxiago edukiko duen... Ez bakarrik arau hauengatik, baizik, besteak beste bizitza garestitzen ari delako (ezingo dituelako kotxe bat edo peageak ordaindu)...

Horren barruan ulertzen da, baita ere, demokrazian ematen ari diren murrizketak, gero eta politika totalitarioagoak ezartzen ari direla...

Horren guztiaren baitan ulertzen ditugu COVID ziurtagiriak sortzen dituen ondorioak.

Gazte koordinadora da zuena. Pasea gazteei zuzenduta dago batez ere?

Zeini zuzenduta dagoen baino gehiago, zer ondorio dituen da garrantzitsuena, zeinak gizarteko sektore handi batek jasango dituen, tartean gazteriak. Ikuspuntu politiko batetik, COVID ziurtagiriaren ezarpenak kontrol sozialaren areagotzea eta normalizatzea dakarren heinean, askatasun politikoen murriztapena dakar. Ikuspuntu sozial batetik, arrazoi desberdinengatik COVID ziurtagiria ez daukaten horien bizitza soziala erabat baldintzatzen du, eskubide zibil ugari urratuz.

GKS-k deitutako elkarretaratzeak gazteei daude zuzenduta?

Berez ez. Gazteak elkartuko gara, belaunaldi apurketa existitzen delako eta gure inguruan duguna gazte jendea delako. Baina mezua orokorra da eta mezuarekin bat egiten duen edozeini dago zuzendua.

Elkarretaratze hauetan ziurtagiriaren eskubide urraketak eta bereizketa soziala salatuko ditugu baina orokorrean pandemiari ematen ari zaion aterabide poliziala eta koronabirusaren kudeaketa burgesa ere bai.

COVID pasearen alde edo aurka egotea, lotua dago txertoa hartu edo ez hautuarekin?

Ez dute zertan lotuta egon. Esango nuke gure inguruan dabilen jende gehiena txertatuta dagoela. Baina norberak arrazoi desberdinak eduki ditzake txertoa ez hartzeko. Eta ikusten dugu txertoa hartu ez dutenen kopurua hemen ez dela arazo, batez ere txertatze tasak handiak baitira.

Horrelako ziurtagiriek erraztu egiten dute segregazioa eta marjinalizazioa, arrazoi ezberdinengatik txertatu ez direnekiko. Horiekiko kriminalizazio saiakera dago edo behintzat horretarako testuingurua sortzen du ziurtagiriak. Gainera, eztabaidaren fokoa txertatu gabekoen gainean jarriz,  osasungintza unibertsal eta kalitatezko baten inguruko eztabaida alboratzea lortzen dute.