Boterearen Eraztunak euskarazko azpidatziekin mundu osoan hasi da banatzen, Australiatik euskaldun batek ikusi ahal izan duen bezala. Irudi honetan, telebista batean erakusten dizegu (lagun honek pantaila-irudi gehiago partekatu ditu):

Eta gainera, Azpitituluak Euskaraz webgunera ere igo ditugu lehen bi atalen azpidatziak, gaur bi atal argitaratu baitira (eta hurrengo ostiraletan banaka osatuko dira, 8. ataleko denboraldia osatu arte). Egun edo aste batzuk barru atal hauek euskaraz bikoiztuta egongo direla iragarri du Amazonek. Katalanez hala omen daude jada, bikoiztuta, baina euskaraz enkargua ez da garaiz bideratu nonbait.

Bi atalekin hasten gara beraz, eta ikusiko dugu noraino dagoen aukera telesail hau euskaraz jarraitzeko... Bost denboraldi iragarri omen dira, eta telesailen kasuan, euskaraz artxibo bat edukitzekotan, errazagoa da telesail "mugatuak" lan oso bezala edukitzea geure katalogoan, denboraldiz denboraldi luzatzen diren telesailetan hutsune gehiago izan ohi ditugulako, zailtasun gehiago lan osoa guztiz euskaratzeko.

Hain zuzen ere, igaro berri den abuztu honetan gehitu ditugunetan, halako telesail azpidatzi batzuk igo ditugu webgunera, eta horien artean istorio hauek nabarmendu ditzakegu:

• Quiz: hau ere Erresuma Batuan gertaturiko kasu bat, iruzur bat telebistako lehiaketa ezagun batean.
• The Loudest Voice: Roger Ailes hedabideetako jauntxo estatubatuarraren historia, Fox News kate ultrako nagusia, eta Me Too mugimenduak salatu zuen abusatzaile bat. Aurreko biak bezala, hau ere benetako gertaeretan oinarritua.
• The Good Lord Bird. Fikzioaren alorrean, baina AEBetako esklabismoaren azken urteetan, benetako gertaera batzuek kontestua ematen dutelarik, hortxe kokatzen da telesail hau.
• Years and Years: hau zientzia fikzio distopikoa dela esan genezake, baina aldi berean ikuspegi politiko zorrotz batekin egina dago. BBCk izan duen azken urteetako ekoizpen txalotuenetako bat da.
• Lost Ollie: Netflixek aktoreak eta animazioa nahastuz sortu duen panpina galdu baten inguruko istorioa, zeina plataforma horretan euskarara bikoiztua ere eman duten.
• Pembrokeshireko Hilketak. Galesen kokatutako hiru parteko krimen misterioa, benetako gertaeretan oinarritua.

Gogorakizun gisa, azkenik, Eraztunen Jaunaren azpidatzi euskaratuetan, trilogia originala euskaratuta dago osorik. Haien zuzendari berak, Peter Jacksonek, egindako The Hobbit lanaren hiru filmetatik, bakarra dugu euskarazko azpidatziekin, azken alea: The Hobbit: The Battle of the Five Armies.

House of the Dragon telesailari dagokionez, bi atal eman ditu honezkero HBOk eta esan dezakegu, espoilerrik eragin gabe, Dragonstone delako eszenarioa aurrekoetan bezala euskal kostaldeko Itzurun eta Gaztelugatxe eraldatu batzuetan oinarritzen direla. Hori bai, dagoeneko nahikoa irudi eta modelo digital dituzte aktoeeekin Euskal Herrira etorri beharrik gabe atalak grabarzeko. Ikusi, hemen, Gaztelugatxeko bidea dragoiekin...

Aktoreak ere ageri dira eszenetan ingurune berean, baina ez dirudi horietako inor Bizkaian izan denik eszena hauek grabatzen. Eta oraingoz telesaila erdaraz bakarrik kontsumitu daitekeela ere, halaxe da hori.