Ez da Europako Batasunean errefuxiatuen aurka su-armak erabiltzen diren lehen aldia, baina honakoan pertsona bat zauritu dute, eta erasoa bideoan grabatuta geratu da. Urriaren 3an, Bulgariaren eta Turkiaren arteko mugan, EBko kide den herrialdeko agenteek errefuxiatu talde baten aurka tiro egin zuten, eta Siriako 19 urteko gazte bat eskuan eta bularrean zauritu zuten. Berarekin zihoan kide batek mugikorrarekin grabatu zuen gertaturikoa, eta Lighthouse Reports erakundeak argitara eman du orain, Bulgariako polizia zuzenean seinalatzen duen analisi forentse batekin batera.

Bulgariak onartu du bere agenteak mugako zonalde horretan zirela, baina suzko armak erabili izana ukatu du. Ikerketak, baina, argi utzi du tiroak mugako poliziak aurkitzen ziren lekutik egin zirela, bertan izan ziren lekukoen bertsioak berretsiz.

Lighthouse Reports-ek egun hartan gertatutakoa errepasatu du:

“Urriaren 3ko arratsaldearen bukaeran, mugako hesitik gertu, Europako Batasunean asiloa eskatu nahi zuten gazte batzuk zeuden. Bulgariatik kanporatu berri zituzten eta, protesta gisa, batzuek harriak bota zituzten mugara. Bat-batean tiro egin zuten, eta siriar nerabe bat lurrera erori zen”.

Zaurituriko gaztea Abdullah Mohammed deitzen da, eta ikerketa burutu duen erakundeari kontatu dio egun hartan jazotakoa:

“Niregana jotzeko modua oso zuzena izan zen, tirokatzeko asmo argiarekin. Haren [agentearen] eta nire arteko distantzia oso motza zen, hamar eta hamabost metro bitartekoa, eta hiltzeko asmoz egin zuen tiro”. Balak eskua gurutzatu zion eta bularrean sartu zitzaion, bihotzetik zentimetro batera geratuz eta birikei ere eraginez. “Medikuak esan zidan miraria dela bizirik jarraitzea”, adierazi du.

Haren aurkako erasoa berezia da, EBko muga batean pertsona errefuxiatu bat suzko arma batekin tirokatua izan dela lehen aldiz bideoan grabatu delako, baina halako edo antzeko gertakariak gehiagotan eman dira EBren mugetan. Grezian, esaterako, kostazainek behin baino gehiagotan egin dute tiro Mediterraneoa gurutzatzen ari ziren ontzien aurka. Espainian, bestalde, Guardia Zibilak gomazko pilotekin tiro egin zien 2014an Tarajaleko hondartzara heltzeko ahaleginetan igerian ari ziren dozenaka migratzaileri, eta haietatik hamabost hil egin ziren.

Europako Batzordeak azalpenak eskatu ditu

Bideoaren eta Lighthouse Reports-en ikerketaren argitalpenaren harira, Europako Batzordeak adierazi du “onartezina” dela errefuxiatu eta migratzaileen aurka indarkeria erabiltzea, eta Bulgariako mugan gertaturikoa argitzeko eskatu du. Asteartean eskainitako prentsaurrekoan, Anitta Hipper EBko Barne Ministerioko bozeramailea gaiaren inguruan mintzatu zen: "Espero dugu agintari nazionalek salaketa guztiak ikertzea eta salaketek jarraipen azkar eta eraginkorra izatea”.

Dena den, Hipperrek uko egin dio Batasuneko erakundeen bitartez gertakariaren gaineko ikerketa bat abiatzeari, gaia argitzea Bulgariaren ardura dela argudiatuz.