EAJri Bidegi auzia katramilatzen ari zaio egunez egun. Astelehen goizean, Eneko Goia eta Markel Olano AP-1eko obretako lur mugimenduetan atzemandako 3,4 milioi euroko zuloa argitu ezinik ibili ziren, Batzar Nagusietan auzia ikertzeko eratutako batzordean. Arratsaldean berriz, obretako ustezko iruzurra 20 milioi eurokoa izan daitekeela jakinarazi zuen Gipuzkoako Aldundiak.

Joseba Altube Errepide Saileko zuzendariak batzordean egindako agerraldian azaldu zuen 2011n 88 kontzepturen likidazioa puztu zuela Bidegik eta 20 milioi euro gehiago eman zizkiola autobidea egin zuen enpresa-taldeari.

Esaterako, hormigoian gastatu beharreko aurrekontua 288.940 eurokoa zen, enpresek 506.915 euro eskatu zituzten, baina horren bikoitza ordaindu zitzaien Aldundiaren esanetan, milioi bat euro baino gehiago. Halako desfaseak aurkitu ditu Errepide sailak bideen hoditeria, betelan eta garraio lanetan. Tartean leudeke Bergarako Basagoitin utzi beharreko lurrengatik ordaindutako 3,4 milioi euroak.

Azkeneko kasu horren harira kereila jarri du Aldundiak eta Azpeitiko epaitegiak Bidegiko teknikaria eta kudeatzailea inputatu ditu, dokumentuak faltsutu eta diru publikoa bidegabe erabiltzeagatik.

Salaketa judizialari “plano politikotik” erantzun dio EAJk

Aldundiko egungo gobernuak eskatuta perituek azterketa topografikoa egin dute eta haien esanetan likidazio dokumentuetan azaltzen dena baino 900.000 metro kubo gutxiago daude Basagoitin. March Fabregues autobidearen obra zuzendariak epailearen aurrean aitortu zuen Bergarako hondakindegi hori ez zegoela beteta eta dokumentazioa sinatu izana “hankasartzea” izan zela.

EH Bilduko  Batzar Nagusietako bozeramaile Iban Asenjoren esanetan, Aldundiak esku artean duen peritu-txostenean ordainketa irregular gehiago egon direla iradokitzen da: “EAJren ustelkeria politikoaren beste kasu baten aurrean al gaude?”. Zentzu horretan EAJk eta PSE-EEk beste peritu-txosten bat egiteko eskatu dute, Aldundiak duena kanpo-enpresa batek egina den arren.

Astelehenean, auzia ikertzeko Batzar Nagusietako batzordean Markel Olano ahaldun nagusi izateko EAJren hautagaiak eta Eneko Goia aurreko legegintzaldiko Azpiegitura foru diputatu eta egun Donostiako alkategaiak azpimarratu zuten Bidegik “egindako lanengatik ordaindu” zuela, baina ez zuten Aldundiaren akusazioak errefusatzeko zehaztapen teknikorik egin.

Olanok azaldu zuen “plano politikotik” egingo ziola aurre salaketei eta gogor kritikatu zuen EH Bilduren jarrera, “gezurretan” eta “matonismo politikoa” egiten ari dela esanez.

Ikerketa batzordearen ondorioak martxoaren 20an jakinaraziko dituzte baina auziak soka luzea ekarriko du oraindik, Azpeitiko epaileak martxoaren 26an eta apirilaren 8an hainbat peritu eta enpresetako ordezkariei deklarazioa hartu behar baitie lekuko gisa.