Scintia enpresa mexikarrak 2022-2023 ikasturtean erosi zuen eskola, baina, langileetako batek ARGIAri jakinarazi dionez egun berean eraikina berriro saldu zion higiezinen promotore bati. Langilearen esanetan, Scientia funtsaren estrategia argia da: ikastetxeak erosi, baliabideak xahutu eta eraikina berriro saltzea. Donostiako El Carmelo eta Madrilgo beste hainbat ikastetxe antzeko egoeran itxi dira, eta Bilboko ikastetxeak bide bera jarraitu dezake.

Irregulartasunen ondorioz Eusko Jaurlaritzak kontzertua ez berritzeko erabakia hartu du, El Correok adierazi duenez. Itunpeko ikastetxea izan denez, langile gehienen soldata gobernuaren mende zegoela adierazi dute, eta egoera “gero eta larriagoa” bilakatzen ari dela.

Enpresak aitzitik, langileei eta familiei mezu lasaigarriak helarazi dizkie, eta arazoa konponduko dela dio. Dirudienez, enpresa berak erositako Donostiako El Carmelo ikastetxea Eusko Jaurlaritzak erosteko prozesua abian du, eta transakzio horren bidez eskolako zorra kitatzeko dirua lortuko dela argudiatzen du Scientiak. 

Hala ere, langileek salatu dute “hitz hutsak” besterik ez direla izan orain arte, eta arazo ekonomikoak areagotu besterik ez direla egin. Eusko Jaurlaritzak hezkuntza kontzertua eten eta ikastetxea ixteko prozesua abiatu du, ikasleak beste ikastetxe batzuetan birkokatzeko asmoarekin. Hala ere, langileek salatu dute gobernuak beste modu batera esku hartu izan balu saihestu zitekeela egungo egoera. Itxiera prozesuaren erdian, langileak eta familiak babesik gabe geratu direla, eta komunitate “osoa kaltetuta” dagoela jaso du Radio Nervión-ek.

Mobilizazioak egiten ari diren arren, komunitatea oraindik informaziorik gabe dagoela azaldu dute langileek, eta egoeraren larria okertzen jarraitzen duela. Langileek eta familiek Eusko Jaurlaritzari erantzunkizunak hartzea eskatzen diote, espekulazioari aurre egin eta hezkuntzaren kalitatea babesteko.