Greba batzordea eta Baiko enpresako ordezkariak ostegunean bildu dira, gatazka konpondu aldera. Pilotariek azaldu dute zenbait punturi buruz "sakon" eztabaidatu ahal izan dutela, eta "hurbilketa bat" posible dela gaineratu dute. "Hala ere, enpresak oraindik ez dio inolako eskaintzarik egin greba batzordeari eta, hala izanik, greba bertan behera uzteko arrazoi nahikorik ez dago".

Pilotariek nabarmendu dute aldarrikapen asko ez direla ekonomikoak, eta enpresak ez duela puntu horietarako ere eskaintzarik egin. "Argi dago arazoa ez dela ekonomikoa, borondate arazoa baizik", diote. "Aurretik ere esan dugu, ez dugu nahi negoziazio hau gudu legal bat bilakatzerik, baina greba eskubidearen aurkako urraketak pilatzen ari dira". Hori dela eta, greba deialdi berri bat aurkeztea erabaki dute ondorengo egunetarako: urriaren 30a eta 31a eta azaroaren 1a, 2a, 6a, 7a, 8a, 9a, 13a, 14a, 15a, 16a, 20a, 21a, 22a, 23a, 27a, 28a, 29a eta 30a.

Bestalde, adierazi dute ez dutela bat egingo Aimar Olaizolak, Mikel Urrutikoetxeak, Joseba Ezkurdiak eta Jokin Altunak bultzatutako elkartearekin. "Hasiera-hasieratik defendatu dugu elkarte parte-hartzaile baten beharra, sektoreko pilotari guztiei lekua egingo diena, elkartean sartzeko eperik jarriko ez diena eta zuzendaritza karguak inposaketa bidez erabakiko ez dituena. Horregatik, beti izango gaituzte bidelagun halako elkarte bat sortzeko eta kolektibo gisa ditugun eskubideak eta beharrak defendatzeko. Jakina, guk defendatuko dugun elkarte horrek parte-hartze demokratikoa izan behar du, estatutuak kolektibo osoaren artean adostu beharko dira, lortu nahi diren helburuak guztion artean finkatu, eta bozketa bidez aukeratu elkartearen zuzendaritza, osaera, osaketa, funtzionatzeko moduak eta erabakiak hartzeko prozedurak".

Nolanahi ere, haien ustez "albiste ona" da Baikok eta EPELek hausnarketa bat egin izana eta talde gisa egiten ari diren aldarrikapenen "zilegitasuna" onartu izana. "Espero dugu jarrera hori greba-batzordearekin datozen egunetan egingo diren bileretan islatzea, greba bertan behera utzi ahal izateko eta asteburu honetan bertan berriro lan egiteko aukera izan dezagun".

Baiko: "Ezinbestekoa da greba bertan behera uztea"

"Greba Batzordearekin egindako bileraren ondoren, Baiko Pilotak nabarmendu nahi du zoritxarrez bi aldeak oso urrun gaudela balizko akordio batetik", irakurri daiteke enpresak sareratutako oharrean. "Baiko Pilotak urratsak emateko borondatea agertu du, betiere egungo krisi ekonomikoaren egoerara egokituta. Hala ere, greba-batzordeak hasierako planteamenduei eusten die. Ezinbestekoa da greba bertan behera uztea, langile guztien ordezkariekin giro lasaian eta elkarrizketa eraikitzaile eta errespetuzkoan lan egiten hasteko".

Enpresak adierazi duenez, "krisi ekonomiko-sanitarioko egoera honetan, ezin du bere gain hartu Greba Batzordearen eskaerek eragiten duten gainkostua. Horrek, gutxi gorabehera %22,5 handituko lituzke enpresaren gastuak".

Asteburuko partidak, ETB1en

Bien bitartean, Baiko eta Aspe enpresek partidak antolatzen jarraitzen dute. Asteburuan, esaterako, hiru festibal egingo dira, Asteasun, Amurrion eta Tolosan.

ETBren eta EPEL Ligako telebista-eskubideak kudeatzen dituen Bainet enpresaren arteko akordioa medio, ETB1ek emango ditu hiru festibalak.

Bestalde, asteburuan hastekoa zen banakako txapelketa atzeratu egingo da.