"Asanblada Sozial Konstituziogilerantz bide egin dezagun" aurkezpen ekitaldia goizeko 11:00etan egingo dute, Bartzelonako Tres Xemeneies plazan.  "Elkartzera, pentsatzera eta antolatzera" dei egin diete herritarrei: "Bizitza justu eta duina eraikitzeko alternatibak partekatzeko, Errepublika ideia eta praktikekin josteko. Irudikatu, debatitu eta eraiki dezagun zer Errepublika nahi dugun". Errepublika plantan emateko zer urrats eman ditzaketen hausnartzeko garaia dela diote, beren esku dauden gaietan zentratuta. Aldi berean, prozesu konstitugilean eragile aktibo bihurtzeko bokazioa adierazi dute, "prozesuari eduki soziala, eraldatzailea eta haustailea gehitzeko".

Espainiako Estatuak Kataluniako erreferendumak adierazitako herritarren borondateari bideak ixten jarraitzen duen honetan, lema hau zabaldu dute: "Iluntasunaren aurka, argia: orainaren eta herri boterearen alderik onena".

Hona hemen abenduaren 2an goiz eta arratsaldez egingo duten jardunaldiaren egitaraua:

Informazio gehiago: Aixequem la República webgunean eta sare sozialetan.

Errepublika altxatzeko atxikimendua adierazi duten lehen eragileak

Assemblea Pagesa, Ateneu La Base, Ateneu Cooperatiu la Baula, La Ciutat Invisible sccl,  Casal Independentista El Forn, CDR Begues, CDR La Sagrera Navas i Congrès-Indians, CDB Poble Sec, CDLR Vallcarca, Clot Decideix, CDB del Clot-Camp de l'Arpa,  CDR Gòtic-Raval, CDR Mollet del Vallès, CDR Montgat, CDR Sant Adrià, CDR Sant Andreu, CDR Sant Antoni, CIEMEN (Centre Internacional Escarré per a les Minories Ètniques i les Nacions), Col-lectiu Maloka-Colombia,  Crida Constituent, CUP (Candidatures d'Unitat Popular), Dies d'agost sccl, Editorial Veusambveu, Embat (Organització Llibertària de Catalunya), Fundació Roca Galès, Gimnàs Social Sant Pau · Koitton Club sccl, Kop de mà sccl, L'Economat Social sccl, LAICA (Associazione Italocatalana antifascista), Les Llosses Participa (Agrupació Assembleària d'Electors), Lluita Internacionalista, Males Herbes (Secció sindical de CGT Parcs i Jardins), Marxes de la Dignitat, Observatori d'Antropologia del Conflicte Urbà (OACU), Parlament Ciutadà, Rereguarda en moviment, Sindicat de barri Poble Sec, Sindicato Popular de Vendedores Ambulantes, Som Alternativa, Withcatalonia, Grup Promotor.

Deialdiko adierazpena, osorik:

Hauxe da parte hartzeko deia eginez zabaldu duten egoeraren irakurketa eta hurrengo urratsen planteamendua:

Altxa dezagun Errepublika! Eraiki dezagun herri botere konstituziogilea!

2017ko urriaren 1ean, bi milioi pertsonak baino gehiago adierazi zuten 78ko erregimena bukatzeko eta Kataluniako Errepublika eraikitzeko borondatea. Eta auzo, herri eta hirietako autoantolaketa kolektiborako gaitasunari esker egin zuten: bozka-kutxak zainduz, bozka-paperak inprimatuz, eskoletan lo eginaz, jende heldua eta haurrak babestuz, mahaiak osatuz eta emaitzak kontatuz. Egin zuten lege injustuei aurre eginaz eta mila pertsonari zauriak eta tratu txarrak eragin zizkion Estatuaren polizien indarkeriari era baketsuan eutsiz. 2017ko urriaren 1a gure herriaren memoria kolektiboan izango da beti.

Aldiz, ez Erreferenduma eta ezta Errepublikaren aldarrikapena ere ez ditu Espainiako Estatuak aitortu, eta ez du ekarri ezta eztabaida edo negoziaziorako aukerarik ere. Alderantziz, mendekua eta zigorra erabili dute, itxuraz erregimen frankistak demokrazian izoztuta zituen mekanismo guztiak martxan jarriz: salbuespen epaitegiak, atxiloketa politikoak, eta erakunde katalanen erbesteratzea eta interbentzio autoritarioa. Inpunitatez dabilen eskuin mutur erasokorrarekin, monarkia makulu errepresibo izanik, polizia politikoarekin, ezpata hotsarekin eta hezkuntzaren eta komunikabideen aurkako erasoarekin. Xantaia ekonomikoa eginez eta kapital finantzario handia Espainiako autoritarismoaren alde paratuz. Berriz ere, iraganeko txarrena.

Iluntasunaren aurka, argia: orainaren onena. Auzolanak eta elkarri eusteak, protesta jendetsuek, ehunka asanbladek eta kazola-jotzeek duindu dute autodeterminazioaren eta askatasun politikoen aldeko borroka. Borroka, antolaketa eta itxaropen esparru bat ere ireki dute, kausa nazionaletatik, banderetatik eta identitateetatik kanpo sentitzen den jendearen artean. Era guztietako auzotarrak jaitsi dira plazara eta kalera, eta autoantolatu egin dira mobilizatzeko, erresistentziarako eta etorkizun duinago bat kolektiboki eraikitzeko. Gizartearen sektore zabalek ere (suhiltzaileetatik irakasleetara, ikasleetatik nekazarietara, zamaketarietatik bulegoko langileetara, etorkinetatik feministetara, sindikalgintzatik ekonomia solidariora, kultur mundutik auzo elkarteetara, munizipalismotik kazetaritza konprometitura) eraikuntza kolektiborako gaitasun txundigarria erakutsi dute. Idatzi izan den bezala, "Errepublika izan nahian, herri izaten ikasten ari gara". Eta horrela ari da sortzen, erresistentzian den Katalunia honetan, errealitate errepublikar autoantolatu bat, prozesu konstituziogilearen erroa dena, eta zaindu eta sustatu behar dena askapen politikoan oinarritutako agertoki politiko, ekonomiko eta sozial berriak sortzerakoan: askatasun politikoak, justizia soziala eta demokrazia ekonomikoa. Egungo erronka nazio edo identitate kontu batetik askoz harago doa. 78ko erregimena eta bere elite dominanteak hausteko aukera bat da. Nola bizi nahi dugun erabakitzeko ahalmen handiagoaz jabetzea da gakoa, eta hori egiteko baztertuta egon diren sektoreen parte-hartzea behar dugu, esaterako, pertsona migratuena. Ez dugu herrialde berri bat nahi soilik, herrialde hobe bat nahi dugu, oinarritik subiranotasun osoa plantan emateko.

Beraz, gaur, beste urrats bat eman behar dugu. Egungo erresistentzia agertokia zabaldu behar dugu ilusionagarria eta eraikitzailea den norabidean. Oinarri herrikoia duen eta debate sozial zabal bat sortzeko gai den prozesu konstituziogile bat hasi behar dugu, ez dagoena alderdi politikoei lotua, ez erakunde handiei eta ez aparatu juridikoei. Eztabaida zabal baterako marko izan behar du, gizarteak bere osotasunean eraiki ditzan Errepublika berria osatu behar duten proposamen politiko, sozial, ekonomiko eta kulturalak. Prozesu konstituziogilea ez baita prozedura juridiko hutsa, batez ere indar harreman materiala da: Errepublika ez soilik aldarrikatzen, batez ere, eraiki egiten da.

Nahi dugun errepublika inklusiboa da, demokratikoa, berdinzalea, feminista, antiarrazista eta guztion bizitza duina du politika ororen erdigunean. Inondik ere ezin du izan elite zahar eta berrien zerbitzura egongo den errepublika neoliberal bat, ezta ere ezin du izan herrialde berri bat antzinako klaseekin, injustiziekin eta betiko pribilegioekin. Ezin dugu kapitalaren interesen menpe jarraitu, ezin dugu gure bizitzen gain erabakitzen duten eta demokratikoki hautatuak izan ez diren estatuaren gaineko eragile eta egituren menpe jarraitu. Ez dugu onartuko, ezta ere, lurraldea explotatuz, arrazakeriaz eta matxismoaz eusten den gizartea mantentzea.

Horrela bada, animatzen dugu Kataluniako gizartea, bere erakundeak, gizarte eragileak eta gizarte mugimenduak, jarraitu dezatela prozesu, ekintza eta ekoizpen kolektiboak garatzen, gako konstituziogilean. Dei egiten dugu:

a) Elkartzera. Mobilizatzeko tresnak eta bizitza justu eta duina eraikitzeko alternatibak partekatzeko, aspaldidanik existitzen direnak, Errepublika ideia eta praktikekin josteko. Horregatik elkartuko gara larunbatean, abenduak 2an, 11:00etatik aurrera Batzelonako Parc de les Tres Xemeneies-en eta 19:00etatik aurrera Tres Xemeneies-ko polikiroldegian,  "Altxa dezagun Errepublika!" ekitaldian.

b) Pentsatzera. Irudikatu, debatitu eta eraiki zer Errepublika nahi dugun. Hausnartu dezagun, aurreko pentsamendu eta esperientzietatik edanaz, nola eman ditzakegun urratsak Errepublika plantan emateko, gure esku dauden gaietatik.

c) Antolatzera. Batu ditzagun indarrak Errepublika eraikitzeko eta prozesuaren eragile aktibo bihurtzeko, prozesuari eduki soziala, eraldatzailea eta haustailea gehitzeko.

Iluntasunaren aurka, argia: orainaren eta herri boterearen alderik onena.

Altxa dezagun Errepublika!