Gasteizen bozkatzen dute arabarren 4tik 3k. Beraz, edo jeltzaleei hiribururako botoa ematen ez dieten batzuk EAJren zerrenda-orria sartuko dute Batzar Nagusietarako boto-kutxetan; edo, hiriburuaz gaindiko Arabako beste lekuetan, astindua emango dute jeltzaleek. Izan ere, Gasteizen berdinketa handia aurreikusten dute azken inkestek, boto-estimazioan %1,1eko aldea soilik jeltzale eta subiranisten artean, eta Batzar Nagusietan, berriz, EAJren nagusitasun nabaria espero da –ia %9ko aldea–.

Zifretan, Jaurlaritzaren azken soziometroaren arabera, honela geratuko lirateke emaitza nagusiak:

Gasteizko Udalean: EAJk jaso lituzke botoen %23,8a, eta zazpi eserleku eskuratu (2019an eskuratutako berak); EH Bilduren boto-estimazioa %22,7koa da, beste zazpi zinegotzirekin (2019an hirugarren indarra zen, sei kargudunekin); atzetik PSE-EE, botoen %21,2arekin eta sei zinegotzi (orain artekoak mantenduko zituen); PPk bost eserlekuak mantenduko lituzke eta Elkarrekin Podemosek, bat galduta, bi zinegotzi Udalean.

Arabako Batzar Nagusietan: EAJk botoen %31 jaso lituzke (%4ko igoera); EH Bilduk, ehunen batzuk galdu, mantenduko luke %22ko babesa; PSE-EEk, puntu erdi igota, %18 inguruan; Elkarrekin Podemosek %7ari eutsiko lioke, ehunenak galduta ere; eta PPk %15a, antzera.

Bilbon, EAJk botoen %44a soziometroan: CIS-en baino zortzi puntu gehiago

Kanpaina ofizialki hasi baino ordu gutxi lehenago argitaratu zuen CIS etxeak Espainiako Estatuko inkesta. Bilbon 600 inkesta egin zituen. EAJren jaitsiera nabarmena adierazi zuen, botoen %36a “soilik” jaso zezakeela-eta, eta hainbat hedabidek hori elikatu dute.

Jaurlaritzaren soziometroak 1.318 inkesta egin ditu Bizkaian –ez du zehaztu horietatik zenbat izan diren Bilbon–. Datu horien arabera, %2 igoko luke babesa Juan Mari Aburto jeltzaleak, %42tik %44ra, gehiengo absolututik oso gertu (15 eserleku behar lituzke; 14 eskuratu zituen 2019an eta inkestek gauza bera ematen diote).

PSE-EErekin osatu dezake udal gobernua EAJk, nahiz sozialistak bigarren indarra izatetik hirugarrengora pasatu. EH Bilduk %16ko boto estimazioa luke, zinegotzi bat irabazita.

Gipuzkoa: %2,7ko aldea, jeltzaleen alde

Eider Mendozaren eta Maddalen Iriarteren arteko lehiak indartsu jarraitzen du: 2019ko emaitzen ia %4ko aldea egon zen bi alderdi abertzaleen artean, eta Jaurlaritzaren azken soziometroaren arabera, %2,8koa aurreikusten da.

Donostian, moreen kalterako, subiranistek irabaziko lukete zinegotzi bat gehiago, eta Eneko Goia eta Juan Karlos Izagirre hautagaien artekoa, zinegotzitan, 10 eta 7koa da.

Hamarretik lauk ez du bozkatuko

Abstentzioa paretsu izango da Batzar Nagusietan eta hiriburuetako hauteskundeetan. Donostian, esaterako, %39ko abstentzioa espero da (2019an %34koa izan zen), eta aipaturiko gainontzeko lekuetan, oro har, %2 igoko da botoa eman ez dutenen kopurua. Gasteizen, esaterako, berdinketa teknikoa espero dela, 10etik 6k emango du botoa soziometroaren arabera.

Abstentzioan jarri du fokua EAJk kanpaina hasierako ekitaldian. Andoni Ortuzarrek azpimarratu duenez, botoa ez emateak “bi muturrak” elikatzen ditu. “Bozkatu egin behar da: abstentzioak ez du ezer konponduko, jakingo dugu zuen mezuak entzuten”, nabarmendu du EBBk.

EH Bilduko Arnaldo Otegik ere botoa eskatu zuen, baina beste era batera: “Hauteskunde hauek eskuinekoen zarataren eta irtenbideen artean aukeratu behar izango da. Batzuek lokatza dute herritarrei egiten dieten eskaintza bakarra. Guk irtenbideak eskaintzen ditugu”.