Zergatik Ederlezi Pastorala orain Iruñean?

Pastorala delako, baina batez ere ohiko pastoralari begirada berria eskaintzen diolako,  zalantzan jarriz gaur egun sakratutzat jotzen diren hainbat kontu. Kontatzen duen historia ere interesgarria da eta hori ez da beti gertatzen. Ohikoan sekulako mugimendua egoten da pastoralen inguruan eta hau pastorala ikusteko beste modu bat da, gainera Iruñean lehenengo aldiz ikusi ahalko da halakorik.

Zer azpimarratuko zenuke obrari buruz?

Nicole Lougarotek idatzitako Bohemiers liburuan oinarritua dago. Ederlezi emakumea eta bere zazpi alaben istorioa baliatuz, ijitoek Euskal Herrian menderik mende bizi izan dutena kontatzen da; gure kulturan izan duten eragina eta jasan duten jazarpena, gaur egun ere seguruenik jasaten jarraitzen dutena. XVI. mendetik XIX. menderako kontuak dira, esate baterako Baionan eta Maulen 1802an izan zuten deportazio handia. Bestetik, aritzale guztiak euskaldunak dira eta ulertzen dute esaten duten guztia, ez da beti gertatzen eta azpimarragarria da.

Iruñean bertan ere badira ijitoak, Alde Zaharrean besteak beste. Ba al duzue haiei buruzko informaziorik?

Jardunaldi batzuk antolatu ditugu eta gaur arratsaldean Ricardo Hernández Ijitoen elkarteko koordinatzaileak hitzaldi bat emango digu haien bizitzaren berri emateko. Kike Diez de Ulzurrunek, halaber, Iruñeko Buhameen bideak hitzaldi ibiltaria eskainiko du larunbat goizean. La Merced kalera joango dira, besteak beste, XX mende hasiera han bizi baitziren ijitoak; Jito Alai frontoia zenaren izenak ere ematen digu pistarik. Gaur egun batez ere Jarauta aldean daude kokatuak.

Antolaketa lanetan hainbat talde ari zarete elkarlanean. Horrela errazago eta eraginkorrago?

Karrikiri eta Zaldiko Maldikorekin Karrika dantza antolatu ohi dugu azken urteetan eta hor  harremanak sortu dira. Iruñean hiru euskara elkarte ditugu eta, esan zigutenez, orain arte ez da antolatu ekimenik elkarrekin. Egia esan, elkarteetan sumatzen da lanerako gogoa, jende langilea dago eta pentsatu baino errazago egin zaigu hau guztia antolatzea. Oso pozik gaude eta aurrerantzean ere horrelakoak antolatzeko gogoz.