Euskarazko komunikazioaren Argia Sariak 2022 banatuko ditugu astelehenetik larunbatera
Badatoz urteko euskarazko komunikazioko lanik txukunenak saritu asmo dituzten Argia Sariak. Aurten ere sarean emango dugu haien berri, urtarrilaren 31tik otsailaren 5era, egunero 10:00etan webgune honetan bertan.
Pandemia dela eta, bigarrengoz egingo da sarean Argia Sarien banaketa, Usurbilgo Atxega jatetxean egin ohi den ekitaldiaren ordez. Udazkenean hari guztiak mugitu genituen aurten sarien ekitaldi hori egiteko eta, egia esan, sasoi hartan bazirudien posible izan zitekeela. Gero etorri zen oraindik ere indarrean den pandemiaren seigarren olatua eta horrek bazkari ekitaldia bertan behera uztera behartu gintuen. Ehundik gorako lagunentzat bazkaria antolatzea ezinezkoa bilakatu da baldintza hauetan.
Edozein kasutan sariek aurrera jarraitzen dute eta astelehenetik aurrera Anton Mendizabal eskultoreak egindako sei sari banatuko dira. Haien berri emango dugu astelehenetik larunbatera gure webgunean, 10:00etan egunero bat. Urtero bezala, honako sariak banatuko dira: ikus-entzunezkoa, prentsa, internet, irratia, komunikazio kanpaina eta merezimenduzko saria.
Eskerrona adierazi nahi diegu, halaber, 2022. urteko argia sariak babestu dituzten eragileei:
* Arabako Foru Aldundia
* Bizkaiko Foru Aldundia
* Emakunde
* Eusko Jaurlaritza, Kultura eta Hizkuntza Politika Saila
* Gipuzkoako Foru Aldundia
* Kutxabank
* Laboral Kutxa
* Mondragon Korporazioa
* Nafarroako Gobernua, Euskarabidea
Globalera ohitu gaituzte. Zirraragarria da munduko edozein txokotako informaziora iritsi ahal izateko gaur egungo aukera. Zoratzerainokoa, hainbeste leiho ireki zaizkigunean. Klik bakar batean. Baina munstro handi bat ere bada, irensten gaituena bere seduzitzeko gaitasunarekin... [+]
Izan duten ibilbide aitzindaria omentzeko, Gure Irratia, Irulegiko Irratia eta Xiberoko Botza irratientzat da aurtengo Merezimenduzko Argia Saria. 40 urtetik gora daramate Euskal Herriari eta euskaraz emititzen, ezinbesteko ekarpena eginez.
Streaming plataformetan euskarak duen presentzia urriari aurre egiteko martxan jarritako Pantailak Euskaraz ekimenari eman diogu aurtengo kanpaina onenaren Argia Saria, denbora gutxian herritarren nahiari ahotsa eman eta ardura dutenak mugiaraztea lortu dutelako.
Ulu Mediak eta EITBpodkastek ekoitzitako Artxipelagoa fikzio podcast seriearentzat da aurtengo irrati ataleko Argia Saria. Ulu Mediako kideek jaso dute saria.
Badok.eus atariarentzat da aurtengo Interneteko Argia Saria, Internetek gure bizitzetan duen gero eta presentzia duen garian euskal musikarentzat eta haren zaleentzat ezinbesteko itsasargi izateagatik. Jon Eskisabelek jaso du saria.
Aiaraldea hedabidearentzat da prentsa ataleko aurtengo Argia Saria, Laudioko eta Amurrioko Tubacex-eko langileen greba, erresistentzia eta bizipenak hurretik kontatzeagatik. Bertako kazetariek jaso dute saria.
Azpeitiko Kulturaz Kooperatibaren ekimeneko DAPA ikus-entzunezko narrazioak dira aurtengo ikus-entzunezko Argia Sariaren irabazlea. Kulturaz Kooperatibako kideek jaso dute saria.
Oraindik hilabeteak falta dira Argia Sarietarako, urtarrilaren amaieran izaten baitira, baina hauen prestaketarako makineria abian da jada. Prozesuaren kate-begi garrantzitsuenetakoa da hautagaien bilketarena.
Atzo esan dit lagun batek: “Iraila joan zaigu, berehala ordu aldaketa, eta horrekin batera jada Gabonetan sartzen gara”. Ez ditut denbora salto azkarregi horiek atsegin. Etzikoan ere pixka bat pentsatzen duten horietakoa naiz, baina unean unekoa eta tokian tokikoa... [+]