Donapaleun 26. urtez egingo dira Otsail Ostegunak, Zabalik elkarteko Mattin Irigoienek Irulegi Irratian honela definitu dituenak: “Ematen diegu plaza bat Euskal Herrian batean eta bestean lan fina egiten dutenei euskaraz, eta beste aldetik horiek entzun nahi edo horiekin solastatu nahi dutenei ere ematen diegu parada biltzeko, hori da gure funtsa: euskarazko momentu bat jakitate edo informazio trukaketa batentzat”. Oinarri horretatik abiatuta, 26 urteotan dozenaka hizlari egon dira Donapaleun klase guztietako gaien inguruan beren jakintza partekatzen bertara bildutakoekin.

Otsail honetan, lehenbiziko osteguna huts eginik, 9an izango dute lehen hitzaldia, Txomin Povedak emango duena: Praktika eraldatzaileak gure lurraldean : zer eta nolaz?.

Poveda Soziologian doktorea da, Iratzar fundazioko langilea eta berrikitan abian jarri den Bagira prozesuaren koordinatzailea. Zabalikeko antolatzaileek honela aurkezten dute: “Lurraldeen behar sozialei erantzuteko, praktika militante klasikoak erabili ordez, herritar geroz eta gehiagok alternatibak eraikitzearen bidea hautatzen du. Ipar Euskal Herriak, praktika eraldatzaile horren dinamismoan berezitzen da. Hainbat eta hainbat sektoretan tresna herrikoiak eraiki dira herri aldarrikapenei aterabideak sortzeko: tokiko ekonomian, monetan, euskaran, irakaskuntzan, laborantza herrikoian, energian, kulturan, hedabide parte hartzaileetan, etab.

UPPAn aurkeztutako soziologia doktoregotza bati esker, Ipar Euskal Herriko alternatiben eramaileak galdezketatu ditu Txomin Poveda-k. Hitzaldi hortan, Ipar Euskal Herriko alternatiben ibilbide historikoa oroitaraziko da baita esplikatuko zergaitik eta zein logikarekin lurralde huntan hainbeste emazte eta gizon eraldaketa manera hortan inplikatzen diren”.

Otsailaren 16an Xan Aire ariko da Murgiltzetik plazara: haur eta gazteak euskaratik euskarara titulatu duten mintzaldian. Aire euskara teknikaria da, 14 urtez Seaskan arizatu da eta gaur egun Plazara kooperatiba sortzen ari da, hizkuntza jendarteratzeko xede duena, komunikazioa, aholkularitza, formakuntza eta elkarrekintzatik. Ekitaldi berean ariko dira Kea elkarteko Lorea Etxeberria eta Antton Seichal ere abiatu berri duten esperientziaz hitz egiteko.

Mattin Irigoienek azaldu duenez, Xan Airek idatzi du artikulu bat soziolinguistikaz saritua izan dena; bertan aztertu du Uztaritzeko ikastolan gelaz kanpoko jardueretan, kirolean eta beste, nola antolatu dituzten gauzak haurrek gauzak beren gain gehiago eta euskaraz hartzeko maneran. Etxeberria eta Seichalek berriz Ortzaizeko esperientzia kontatuko dute; hemen gurasoak dira elkartu zerbait egin nahian haurrek ikastolatik kanpo ez zutelako euskara baliatzen, klubek eta oro har kirol guztiak frantsesez funtzionatzen baitu. Gurasoen ahalegina izan da alde batetik euskara kirolean ere erdigunean jartzea eta, bestetik, haurren ahalmenak garatzea, klubek kirol zehatz baterako hartu ala ez urtero bost kirol ezberdinetan probatzeko aukera izan dezaten.

Otsailaren 23an Elorri Garat psikologoak landuko du Kalapitatik jazarpenera : taldean bizitzeak eragiten dituen dinamikak hitzaldia, haurren artean baina baita guraso eta gainerako helduen artean ere dauden gatazken inguruan.

Aste horretan bertan, otsailaren 26an izango da Donapaleun Amikuzeko Libertimendua, formaz deus ikustekorik ez duena hitzaldiekin baina mamiz, antolatzailez eta izpirituz hari berarekin josia datorren inauteri-antzerkia. Igande horretan goizeko 10:00etan hasiko da kabalkada karriketan eta ondotik 11:00etatik aurrera Merkatu plazan ikusi ahalko da Libertimendua bere dantzari, zirtzil, eta bertsolariekin.

Martxoaren 2an Xebas Kristi Alda mugimenduko koordinatzaileak azalduko du ALDA mugimenduaren esperientzia : nondik eta nora... . Duela bi urte sortu zuten Alda Iparraldean, jendeen bizi baldintza materialak hobetzeko asmoz beren eguneroko bizi ingurunean (etxebizitzan, auzoan, lanarendako sarbideetan, garraioetan, eskoletan, administrazioan, banku eta zerbitzuetan, kontsumoan, osagarrian, ingurumenean, etab.).

Azken orduan Zabalik elkarteak bostgarren ostegun bat gehitu du urtero laukoa izaten den programan: martxoaren 9an Mattin Aiestaran eta Juantxo Agirre Mauleon ARANTZADI zientzia elkarteko arkeologoek aurkeztuko dute Irulegiko zorion eskua; Zabalikekoek hitz jokua egin dute horrela iaz Iruñerriko indusketa famatuan aurkitutako “Zorioneku” idazkiarekin.