Pandemia garaian areagotu egin dira Amerikako Estatu Batuetan alkoholak eragindako heriotzak. Azken bi hamarkadetan gorazko joera izan du, eta urtez urte %7 inguru handitu izan da kopurua. 2020an, baina, %23 gehiago izan dira alkoholaren kontsumoak sortutako gaixotasunez hil direnak: orotara, 49.000 pertsona, 100.000 biztanleko hamahiru. Gaixotasunen Prebentziorako eta Kontrolerako Zentroak egin duen ikerketa batek eman ditu datuok.Azken 40 urteetan AEBetan izandako zifrarik altuena da. Hainbat hedabide estatubatuarrek jaso dute informazioa.

Dozena bat gaitz baino gehiago identifikatu dituzte alkoholaren eraginpean sor daitezkeenak; heriotza kasu guztien erdiak gibeleko gaixotasunengatik izan dira. Hortaz gain arriskuak ditu pankrean kalte egiteko, arterietako presioan, bihotzean eta sistema kardiobaskularrean.

Gizonen heriotzak emakumeen kopuruaren bikoitza baino gehiago dira, eta gehienbat 55 eta 64 urte bitarteko pertsonak hil ziren. Hala ere, pandemiaren lehen urtean gorakada handiagoa izan zen 45 urtetik beherakoen artean.

Datu hauek ez dituzte jasotzen alkohola bigarren maila bateko eragilea izandako heriotzak, baina CDCk argitaratu du hori ere: hirukoitza izan ohi da zifra, beraz 2020an 150.000 inguru hil ziren kausa nagusi ez baina edaria tartean zenean, esaterako minbiziaz edo kotxe istripuz.