Alaia Martin nagusitu da Amurrion eta oraingoz Aitor Bizkarrak ezarri du finalera sartzeko langa
1.250 bertsozale elkartu ziren azaroaren 19an Amurrioko Bañueta kiroldegian. Finalaurrekoetako bigarren itzulia hasi zen bertan: Alaia Martinek eskuratu zituen puntu gehien eta finalean da honezkero. Finalean sartzeko lehian dauden bertsolarietatik Aitor Bizkarrak eman zuen pauso bat aurrera; Oihana Iguaranek hurrengo bi saioetan zer gerta zain egon beharko du eta Agin Laburuk txapelketa amaitu du, Onintza Enbeitarekin eta Miren Artetxerekin batera.
Finalaurrekoetako bigarren itzuliko lehen saioan, Alaia Martin nagusitu zen, 676 punturekin. Bigarren egin zuen Aitor Bizkarrak 651,5 puntu lortu zituen; Oihana Iguaranek (poto bat eginda) 632,5 puntu; Onintza Enbeitak 632,5; Agin Laburuk 624; eta Miren Artetxek 595,5.
Bertsoa.eus atarian ikusentzun daitezke Amurrioko saioko bertsoaldi guztiak. Alaia Martinek egin zuen ganbarakoa izan zen bertsoaldi puntuatuena.
Hemen irakur daiteke saioaren ostean Eli Pagolak Agin Labururi egin zion elkarrizketa.
Finalerako langa 1.330 puntutik gora?
Hemezortzi bertsolari daude sailkatuta finalaurrekoetako bigarren itzulirako. Bertsolari hauetako bakoitzak beste saio bana egingo du (lehena izan zen Amurriokoa) eta saio honetan jasotzen duen puntuazioa batu egingo da finalaurrekoetako lehen fasean jaso zuenarekin, batura horretatik zazpi finalistak hautatzeko. Bertsolariek egin beharreko lanak aldatu dira finalaurrekoetako lehen itzulitik eta bertso bat gutxiago kantatzen dute, horregatik da bigarren itzuliko puntuaketa baxuagoa.
Amurrioko saioan Aitor Bizkarrak ezarri du, oraingoz, finalerako langa non egongo den. Izan ere, finalaurrekoen lehen fasean 700 puntutik gora atera zutenak bost bertsolari izan ziren (Alaia Martin, Aitor Mendiluze, Beñat, Gaztelumendi, Joanes Illarregi eta Sustrai Colina), eta finalerako dauden beste bi txartelentzako sei bertsolari daude lehian: 686 punturen bueltako Oihana Iguaran, Amets Arzallus eta Julio Soto, eta 673 punturen bueltako Agin Laburu, Aitor Bizkarra eta Nerea Ibarzabal. Seikote honetatik hiruk kantatu dute Amurrioko saioan, eta Aitor Bizkarrak egin du puntuaketen taulan jauzia: 651,5 puntu eskuratu ditu Amurrion, eta lehen itzulitik zituen 677,5 puntuei batuta, 1.329 puntu lortu ditu. Beraz, finalerako txartela eskuratu nahi dutenek 1.330 puntuen langa dute begiz jota.
Oraingoz sailkapen taulan eta bi saioak eginda Alaia Martin da lehena, guztira 1.405,5 punturekin: Amurrion 676 puntu eskuratu zituen eta lehen itzulian 729,5 (lehen itzulian puntu gehien eskuratu zituen bertsolaria da).
Hemen ikus daiteke sailkapen taula osorik.
Hurrengo bi finalaurrekoak, Baionan eta Bilbon
Azaroaren 26an Baionan jokatuko da hurrengo finalaurrekoa, eta azkenekoa berriz, abenduaren 3an Bilbon. Sarrerak eskuragai daude bertsosarrerak.eus atarian.
Abenduaren 18an, Euskal Herriko Bertsolari Txapelketako finaletik bueltan jarritako bertsoak.
Abenduaren 18an Nafarroa Arena euskararen erresonantzia kutxa bihurtu zuten 13.300 bertsozalek. Finala lehenengoz Nafarroan jokatzeaz gain, historiko bihurtu du finalisten osaerak, lehen aldiz hiru emakume aritu baitira kantuan, eta 55 urteren ondoren, nafar bat (edo... [+]
Txapeldunaren azken agurra bularrean kolpeka, bertsozalea bakarrik doa kotxera bidean. Sentsazio arraroak, berriak ditu eztarrian korapilatuta. Atea ixtearekin bat, orain bai, orain lasai askatuko du negarra.
Euskal Herriko txapela lortu du hirugarrenez Maialen Lujanbiok abenduaren 18an Iruñeko Nafarroa Arenan jokatu zen bertso finalean. Aldaketaz beteriko finala aipatu du jada txapelketako beterano denak, bai taldearen konposizio, bere sentsazio pertsonal eta lekuarengatik... [+]
Ezin ekidin Nafarroa Arena BEC-ekin alderatzea. Publikoa otzanago antzeman da, olatuak ez dira berehala altxa eta burrunbatik ere, amaiera arte, gutxi. Behin lehertutakoan, ordea, uhin expantsiboa hedatu da plazan. Egun lantsua izan dela nabarmendu dute eguneko protagonistek... [+]
Goizeko eta arratsaldeko saioetan zortzi finalistak aritu ostean, Amets Arzallus eta Maialen Lujanbio pasatu dira buruz burukora. Saioa buruz burukoan lehertu da, eta bi txapeldunek lazo gorriz biribildutako saioaren ostean... Maialen Lujanbio Zugasti da berriz ere txapelduna. [+]
Goizeko saioaren ostean, eguerdia hankak luzatzeko eta indarrak hartzeko baliatu dute entzuleek. Bati eta besteari entzunaz, buruz bururako izen ugari jasoko ditu galdetzen duenak, eta Ametsek bi bider botatako "parte" hitzen interpretazio anitzak ere bai... [+]
Hona egun osoan zehar Dani Blancok harrapatu dituen hainbat momentu:
Hona Bertsolari Txapelketa Nagusiko finalean goizeko saioan kantatu dituzten puntu-erantzun guztiak.
Iruñea bertsoaren hiriburu bihurtu da egun oso batez. Lehen aldiz bertan aritu dira jokatzen Txapelketa Nagusiko finala. Maialen Lujanbiok bere txapeldungoa jokatu du honako bertsolariekin: Aitor Mendiluze, Alaia Martin, Amets Arzalllus, Beñat Gaztelumendi, Joanes... [+]
Orain dela hiru hilabete abiatu zen Bertsolari Txapelketa Nagusia eta gaur amaituko da Iruñeko Nafarroa Arenan. Ibilbide honetan finalean abesteko txartela honako bertsolari hauek lortu dute: Aitor Mendiluze Gonzalez, Alaia Martin Etxebeste, Amets Arzallus Antia,... [+]
Nafarroa Arenan elkartu dira gaur zortzi finalistak, abenduaren 18rako motorrak berotzeko. Lehen aldiz Iruñean egingo den Txapelketa Nagusiko finala handia izango da: 13.000 ikusle elkartuko dira, nazioartetik 30 gonbidatu izango dira eta 350 lagun arituko dira antolaketa... [+]