Oyarzabalek zehaztu zuenez, PP Araban boterean zegoen 2015etik ari da lotunea Gasteiztik egitearen alde, eta estatu mailako PPk ere bat egin du ikuspegi horrekin. Eta bai, Iñigo de la Serra PPko Garraio ministroak hori zehaztu zuen 2018an Iruñera egindako bisitan. Orduan isilik egon zen bisitaldian ondoan izan zuen UPNko buru Javier Esparza, nahiz eta UPN Ezkioren aldekoa den.

Ondorengo 2019ko foru hauteskundeetan Nafarroako eskuinak bere iritzia argi utzi zuen Navarra Sumaren eskutik: “Lotunea Ezkiotik nahi dugu, bestela Europako tren garraio linea nagusitik baztertuta geratuko gara, Gasteiz eta Logroñoren alde”. Eta PSNk ere argi utzi zuen, “gu ere bai, Ezkioren alde”.

Baina uda aurretik, Garraio edo Sustapen ministroak Iruñera hurbiltzean eta oraindik erabakia hartu gabe zegoela iragarri zutenean, PSN ez zen ausartu Ezkioko lotunearen alde egitera: ez da horren garrantzitsua nondik, “funtsezkoena da egitea”, arrapostu zuen Bernardo Ciriza PSNren foru gobernuko kontseilariak.

Geroa Baik ere argi du, Ezkiotik bai ala bai, eta guztiz bat egiten du UPNrekin horretan, bestela Nafarroa baztertuta geldituko delakoan. Eta Ramiro Gonzalez Arabako ahaldun nagusiaren esanak esan, EAJk ere argi du: Ezkiotik bai ala bai.

Ezkiotik hiru aldiz garestiago

PPko Oyarzabalek, ostera, argi utzi du: “Moncloara iristen bagara, Gasteizko lotunea hobetsiko dugu”. Espainiako Gobernuan PP edo PSOE egon, biek ala biek hobesten dute Gasteizko linea, eta kontuan hartuta azpiegitura Madrilek ordaintzen duela, ulergarria da, are gehiago aurrekontuen ezintasun garaiotan: Gasteizko 75 kilometroen gastu aurreikuspena 704 milioi eurokoa da, eta Ezkioko 55 kilometroena 2.061 milioi eurokoa, ia hiru aldiz gehiago.

Pentsatzen zen Espainiako Gobernuak aurten emango zuela hautuaren berri, baina ez, PSN oraindik ez dago Ezkioko aukera bazterrean uztekotan eta Nafarroako Gobernuak Ezkioko linea konplexuaren –30 kilometroko tunela Aralar azpitik– ikerketa geotekniko eta geotermiko gehiago eskatu ditu. Horrek, gutxienez, beste urtebete atzeratuko du hautua. Bitartean, Castejonetik Iruñera eraikuntza lanek aurrera jarraitzen dute, baina erritmo geldoan oro har, erreportaje zabal honetan berriki azaldu dugun moduan.