2016an hasi zen egituratzen Tantaka Telebista Sozialaren proiektua, Euskadi-Cuba, Mugarik Gabe eta Paz con Dignidad Gobernuz Kanpoko Erakundeen elkarlanaren bitartez. Hemengo eta hango errealitateei era globalean begiratu ezean, errealitatea aldatzeko aukerak hutsera murrizten direla sinetsita ekin zioten lanari. Bi urteren ostean, telebista martxan jartzea lortu dute.

Tantaka proiektu politiko eta estrategikoa dela adierazi dute honen sortzaileek, zeinarekin “interes partikularren edo merkatuaren interesen aurrean pertsonak erdigunean jarriko dituen politika aldarrikatuko” den. Komunikabide hegemonikoetan tokirik ez duten ahots eta borrokei tarte bat eskainiko die telebistak, komunikazio kritiko eta alternatiboari bide eman asmoz. Jendartean pentsatuz eta honen baitako borrokak konektatzeko helburuarekin sortu dute telebista, eta bokazio sozial horretan ardaztuta, “nazioarteko elkartasunaren erreferentzia izango da, eta aldi berean, topaketarako eta ideien eztabaidarako kanala, askotariko programazioaz osatua”.

Tantakaren helburu nagusia, azaldu dutenez, zenbait gai nagusi lantzea da: sistemaren agenda hegemonikoa (migrazioak, merkataritza libreko hitzarmenak, enpresa transnazionalak, indarkeria eta abar barne hartuz), honen alternatibak (ekonomia soziala, feminismoa edo elikadura-burujabetza, besteak beste) eta komunikazioa, hurrenez hurren. Ikuspegiari dagokionez aldiz, masa komunikabideek eskaintzen dutenaren oso bestelako ikuspegia eman nahi du komunikabide jaioberriak, mundua internazionalismotik, feminismotik eta subjektuen aniztasunetik begiratzen duena.

Informatzeko eskubidean, formakuntzan eta mobilizatzeko gaitasunean ardazten da proiektua. Hau da, telebistak informazioa eskainiko du ikuslearengan politikoki eragin eta hau ekintzara bultzatzeko.

Hasieratik elkarlanean

Herri mugimendu eta borroka askotarikoak elkarreragiten jartzeko xedeari hasieratik heldu dio proiektuak. Telebistako edukiak sortzeko Hamaika Telebistarekin akordio batera heldu dira, eta estudioak partekatzea adostu. Horrez gain, proiektuaren GKE sortzaileez aparte, Euskal Herriko eragile gehiago ere ari dira beraiekin batera lanean. Eragile horietako jendea eta beste zenbait norbanakorekin Batzorde Politikoa osatu dute, edukien ildo politikoak bermatzen direla begiztatu eta Tantakaren komunitatea handitzea helburu duena.

Funtzio soziala eta elkarlana are gehiago indartzeko asmotan dira hala ere. Helburu horrekin, herri mugimendu eta eragileei Tantakarako programa propioak ekoizteko aukera emango diete, behar izatera bideo grabazio eta edizio formazioak eskainiz. Horrez gain, nazioarteko ikus-entzunezkoak ere zabalduko dituzte beraien kanalaren bidez, han eta hemengo herritarrekin sarea eratuz.

Telebista eredu berria

Telebista berritzailea da Tantaka. Bai eduki zein formatu aldetik, hasieratik erakutsi du hedabide hegemonikoen konbentzionaltasunarekin hausteko asmoa. Ikuspuntu kontrahegemonikoak nabarmen ezberdinduko baditu ere, formatu aldetik badu berezitasun bat telebistak: sarean emitituko da. Edukiak web orrian jartzen joango dira, eta sare sozialetatik (Twitter, Telegram, Instagram eta Facebook) ere zabalduko dituzte.

Inaugurazioa

Azaroaren 15eko ostegunean, arratsaldeko 19:00etan, eman zitzaion hasiera Tantaka Telebistaren inaugurazioari. Proiektua jende artean abiatu zuten Bilboko Bilborock aretoan, eta hainbat gonbidatuk girotu zuten aurkezpena. Hasteko, komunikazio kritiko eta herrikoiaren bueltako mahainguruan parte hartu zuten June Fernández, Fakun Aznarez eta Maialen Kortabarria kazetariek. Ostean, bertso saioa eskaini zuten Oihana Bartra eta Miren Amurizak. Amaitzeko, Pompom Antzerki Konpainiak umorez eman zion itxiera ekitaldiari.

Batzuen eta besteen artean, telebistako kideek hartu zuten hitza, eta aurretik daukaten bideari so, zera azpimarratu zuten hainbat konturen artean: Espainiako Gobernuak herri honetako medio asko itxi dituen arren, kolpeak kolpe, Euskal Herriko jendarteak hedabideak irekitzeko gaitasuna erakutsi duela. Eta hortik sortzen dela, hein handi batean, Tantaka Telebista.