84 pertsona hil dira Sudanen ekainetik izan diren euriteetan
Ekainetik urrira arte, euriteen sasoia izaten da herrialdean. Aurten, 84 hildako eta 67 zauritu eragin dituzte uriolek, eta 102.000 pertsona gehiagori eragin diote; tartean, Hego Sudaneko errefuxiatuei. Hainbat GKEk biztanleak arrisku guneetatik ebakuatzeko deia egin dute.
Uriolen eraginez, dozenaka biztanle hil dira elektrokutatuta, eraikinek zapalduta eta itota. “Guztira, 84 pertsona zendu dira eta beste 67 zauritu zenbatu dituzte Sudaneko hamaika estatutan, euriteen sasoia hasi zenetik”, azaldu du Abdel Jalil Abdelreheem herrialdeko defentsa zibileko bozeramaileak. Halere, kasuek gora egin dezakete, euriteak ekainetik urrira arte luzatu ohi baitira Sudanen.
Nazio Batuen Erakundeak argitaratutako datuen arabera, euriteek 102.000 pertsonari eragin diote. Gainera, urak 8.400 etxe suntsitu ditu eta beste 27.000 kaltetu. Bizilekuak eta jabetzak galtzeaz gain, herritarrei epe luzeko eraginak ekarriko dizkie gertaturikoak. Izan ere, gune askotan nekazaritzatik eta abeltzaintzatik bizi dira, eta urak uztak galtzea ekarri du.
Nazio Batuen Gai Humanitarioak Koordinatzeko Bulegoak kaleratutako txostenean, iraila hasierako datuak bildu dituzte. Hilaren 4 eta 6 artean, euriteek Nilo Zuria estatuko 53 herriri eragin diete. 61.000 pertsonak (12.000 familia) jasan dituzte bere efektuak: horietatik 35.000 Hego Sudaneko Errepublikako errefuxiatuak izan dira.
Ibaien ur maila 16 eta 17 metro bitartera heldu da. Inguruetako herritar asko lekualdatu egin behar izan dituzte, eta beste hainbat hurbileko eskoletan eta osasun zentroetan sartu dira babes bila. GKEk biztanleak arriskutsuak diren guneetatik ebakuatzeko eskatu dute: Nilo Zuriko estatuko Laguntza Humanitarioko Batzordeak eta Sudango Ilargi Gorriak ontziak erabili nahi dituzte ebakuazioetan laguntzeko. Bereziki Juda, Kilo 8, Kilo 4 eta inguruko herrietan dute jomuga erakundeek.
2020ko datuak
Duela urtebete, Sudanek hiru hilabetez luzatu zen larrialdi egoera ezarri zuen euriteen ondorioz. 2020an, gutxienez 100 pertsona hil ziren. Bestalde, 650.000 lagunek jasan zituzten euriteen eraginak eta 110.000 etxe suntsitu eta kaltetu ziren, Iheslarientzako Nazio Batuen Goi Mandatariaren Bulegoaren arabera. Orduan ere, ibaiak 17 metro inguruko ur mailara igo ziren, eta errefuxiatuen kanpamentu ugari urperatu zituen.
2019ko iraultza popularrari esker lortu zuten 30 urtez presidente izandako Omar al-Baxir boteretik haizatzea. Armadaren laguntzaz bota zuten presidente ohia, baina trantsizio demokratikoaren alde segitu zuten borrokan, herritarrek soilik osaturiko gobernu baten sorrera helburu... [+]
Sudango gerrak milaka errefuxiatu eragin ditu; horien bila ez da inor joango, Europak ez du artatzeko dispositibo berezirik abiatuko, ezta korridore segururik zabalduko ere. Gerra Afrikan gertatzen ari da, eta NBEren arabera sortu dituen 800.000 errefuxiatuak inguruko herrietan... [+]
Armadaren eta Laguntza Azkarrerako Indarrak talde paramilitarraren arteko gatazkak eztanda egin du asteburuan, batik bat Khartum hiriburuan. Herrialdeko agintaritza osatzeko trantsizio epean daude bi aldeak, baina botere gatazkak borroka odoltsua eragin du.
Akordioa gaitzetsi dute Abdalla Hamdok estatuburuaren koalizio kideek, eta herritarrek ere protestan jarraitzen dute. Orokorrean nazioarteak txalotu egin du militarren eta zibilen arteko “krisi politikoa konpontzeko” adostasuna.
Armadak atxilotu egin ditu Abdalla Hamdok estatuburua eta beste hainbat ministro. Demokraziarako trantsizioan, lider zibilak eta militarrak boterea partekatzen aritu dira, baina euren arteko tentsioa lehertu egin da orain. Larrialdi egoera honetan, Trantsizio gobernuak adierazi... [+]
Sudango Gobernuak debekatu egin du nesken mutilazio genitala eta urrats historikotzat jo dute emakumeen eskubideen defentsan. Dena den, kezka dago legea ez dela nahikoa izango sozialki oso errotuta dagoen ohitura hau ezabatzeko.
Sudango Medikuen Batzorde Nagusiak salatu du 101 pertsona hil eta 326 zauritu dituztela, demokrazia eskatzeko manifestazioetan. Asteazkenean Nilo ibaitik 40 gorpu erreskatatu zituztela gehitu dute.